#ليته يعلم(أحببته منذ الصغر)

البارت ٥٩

صعدت فوك تا اكعد صادق عالسحور..فتحت الباب جانت الغرفه ضلمه
باوعت مغطي راسه
تقربت منه.حجيت بصوت ناصي
رنا: صادق صادق
صادق:ها
رنا:اكعد تسحر
وخر الغطه
صادق:من يأذن كعديني
رنا: ليش ماتتسحر.انت ماماكل شي
صادق: كتلج من يأذن كعديني
رنا:.......يعني ماتاكل ابد
صادق:يرنااا
رنا:ماشي
نزلت جوة ضجت حيل لان مانزل يتسحر
جده:وين صادق
رنا:مايقبل يتسحر
جده:خلي اروح اني اكعده
رنا:لاتروحين لحيت علي مايقبل
جده:شوكت اموت واخلص من هالعيشه
علاوي:يووم شكاعد تحجين شبيج...هس عوفي خما صغير هو مايريد ياكل لاياكل
جده:اووف لوبس تشوفون كلبي شبي
احنه تسحرنا والجامع بدأ يقرأ
كلت اصعد اوديله مي قبل مياذن لان بقى دقايق
صعدت للغرفة
رنا: صادق اكعد اشرب مي هس راح يأذن
كعد تعدل
صادق:شغلي الضو..انطيته المي وشغلت الضوة
اذن الجامع نزل جوة تسمح ورجع صعد فوك..
اني هم صليت ورجعت جوة نمت بفراشي
كعدت بساعه ١١تقريبا.
جانو هس كاعدين... هم جان الوكت ممل جدا
بسبب هاي السالفة أجواء البيت حيل كأبه
العصر بعد ماخلينا الفطور عالنار.رحت سبحت
طلعت من الحمام..صعدت فوك لغرفتي
ماجان موجود بيها..مشطت وره شوي نزلت جوة
رحت عزلت البيت ونضفت الاستقبال.. اخذت موبايلي
ورحت لغرفه سرى صايره مقابيل غرفه جده .كعدت عالتخت وكمت اكلب بالموبايل..جانو ناشرين على مود الامتحانات.. النتائج وره العيد ينشروها
عبر الوكت وقرب موعد الاذان ..اجت صابرين جانت جايبه وياه من الفطور اللي هي مسويته
صابرين:ها شلونكم
رنا: ماشي الحال
صابرين:جبت فطور لصادق .. اعرفه يحب الكبه
رنا: البارحه ماتسحرت
صابرين:هااا..وينه هس
رنا: ماموجود
صابرين:امي شلونها
رنا:زينه
بعد شوي اجه صادق..طب جوة للاستقبال جان ويه فراس
حضرنا سفره الفطور
صابرين حضرت صينيه فطور اله وفراس بوحدهم ودته الهم.اذن الجامع واحنه تفطرنا بوحد.كملنا وشلنا الاكل.
اجت صابرين شايله صينيه الاكل.باوعت مو ماكلين هواي
صابرين حضرت جاي الهم
بديت اغسل المواعين اني وسراب ..حسيت بطني توجعني ..عفت المواعين ورحت تمددت..هودت عليه ورجعت كملتهن
طلعو للحديقه صادق وصابرين ..سمعت صوته يحجي ومتعصب
صادق:وليششش كتلن الهاااا
صابرين:ترا عادي
صادق:لاا موعادي..ماتكدرن تسدن حلگجن شوي ابد.اله تحجنننن
طلعت للطارمه
صابرين:يعني اول وتالي راح تعرف
صادق: تعرف مني اني مومنجن
صابرين:ماردنا نحجي.بس سمعتنا وسألت
صادق:من تريدن تلفن سالفه تلفنهااااا.. سبحاااان الله
رجعت طبيت جوة.عرفته ضاج لان كاللي
كعدت بالصالة شوي عالتالفزيون ويه جده بعدين حسيت معدتي حيل تاذيني..حاولت ازوع ماكدرت. وصيت حسن يجيبلي ببسسي
جابلي شربت بس معدتي بقت مضوجتني..
صابرين راحت وهو راح للجامع.. بقيت متخربطه
رحت على جده اخذت مسكن..خف الالم شوي
بعدين حسيت بعد اكو الم..رحت فوك لغرفتنا
تمددت بيها واخذتي النومه...كعدت على صوت الباب نفتح.باوعت هستوة جاي
تعدلت تااكوم
صادق:لاتكومين ابقي
رنا: شكد الساعه
صادق:١٢ ونص
رنا:وين جنت
صادق: موجود...
خله الموبايل عالشحن ..وطلع ملابس
صادق: اسبح واجي لاتنزلين
رنا: ماشي
بقيت متمدده بمكاني.. بعد نص ساعه اجه
طب للغرفه .سد الباب... نشف شعره
وخله معطر..اجه يمي
صادق: سويلي مجال
رحت شوي لي وره
اجه تمدد يمي ولف ايده على خصري
رنا: ماكتلي وين جنت
صادق:طالع بشغله
رنا:اوك
سكتنا شوي بالبدايه
رنا: اكلك
صادق:ها يروحي
رنا : ترا اني عرفت بالصار
صادق:اي......ماعرف شكلج اوووف
نور هدتلي حيلي..دمرتني بهاي عملتها
لوميته ولامسويه هيج.....وبعدني خايف
رنا: من شنو
صادق: عليها.بعدني خايف عليها
رنا:ليش
صادق: شون ليش...ترا هاي موعمله عاديه ولاشغله فلان يكره فلان وسوه هيج..هاي مصيبة عالبشر هاي شرك بالله اليموت على هذا الشي يخلد بجهنم... لحد الان مامستوعب عملتها...
رنا:من وره خالاتها هنا علمنها ع هاي السوالف
صادق:اني لحد الآن ماخلصت حسابي وياهن..لوو بيدي اخخخ لوبيدي
رنا:سمعت شغلات من صابرين وسراب
صادق:شنو سمعتي
رنا:عساس نهال حاطه عينها عليك
صادق:اي صحيح
رنا:اني مادري ولامره سمعت
صادق:موضروري ولأمهم تعرفين
رنا:هااا ليش عود
صادق:يرنا ترا هواي سوالف وأمور..خما كلشي واحد يحجي ويكول خليني ساكت
رنا:لا احجي اني اريد اعرف
صادق:يعني اللي تتحرش برجال وهي على ذمه رجال ثاني....شنو تترجين منها
رنا:تحرشت بيك؟؟!
صادق:اي ٣مرات... اولا اني بعد نهائيا ماسمح عيلتي يروحون عليهن ابداا.اما نور فهاي قضيه ثانيه..راح الگي طريقه واعرف شون اتصرف وياها
رنا:زين سؤال...وين اخذت نور
صادق:......
ماجاوبني من سألته ..سكت عرفته مايريد يحجي عاد غيرت الموضوع
رنا:بعد العيد النتائج مالتنه
صادق:ان شاء الله
دك موبايله...
صادق:الو.....هلا عمي..... بخير الحمد لله انتو شونكم...... على الله.....بعد......اها.......ماشي ان شاء الله..هلا عمي
بقينا نحجي لحدما قرب وقت السحور
رنا:اكوم اسويلك شي تاكله
صادق:الشوربه اللي جابته صابرين احميها الي وبس
رنا:بس شوربه؟؟
صادق:اي
نزلت جوة سويت سحور للبيت وهم كعدت سرى
حميت الشوربه اله وسويت قليه بصفحه كلت خاف يريد ياكل..
صعدت سحور اله فوك...
صادق:اكعدي وياي اكل
بقيت وياه.. حسيته يريدني يمه .واني هم جنت اريد ابقى يمه لان اصلا كلش مشتاكلته .. سويتله واهسس .فتحت هواي مواضيع مختلفه
ومواقف تضحك على عمي ابراهيم وكت جنت يمهم وسالفه جرت سالفه
حسيت هواي تغيرت نفسيته  ..
كام الجامع يقرأ
صادق:اشربي مي زين..لان راح تعطشين
رنا: ليش
صادق:حجيتي هواي
رنا........
صادق:هههههه
رنا:.......
صادق:ههههههههاي
رنا:هههه...بعد ماحجي وياك
صادق:لا شلون ماتحجين..اني ماكدر بدون سوالفج
بس ردت اذكرج لان حلكج يبسس
رنا:ماشي ماشي
نزلت جوة شربت مي وصعدت اله هم
اذن فجر صليت وبديت غلست المواعين...خلصتهن .جان البيت هدوء وكلها نايمه..اني رحت تانام  تمددت بمكاني سمعت صوت صادق يحجي بصوت واطي
صادق: سراب وين المفتاح
كعدت سراب طلعت المفتاح من مكتبت جده انطته اله وراح
اني جنت بفراشي سويت نفسسي نايمه بس سمعت وشفت
بعد شوي حسيت اكو صوت...ماكدرت ابقى بفراشي صار عندي فضول
طلعت من الغرفه سمعت صوت باب الصاله انسسد باوعت من شباك المطبخ..شفت صادق ونور وياه..طلعو من البيت
بقيت بحيره ياترى وين اخذها وبهيج وكت!!!
حيل صار عندي فضول..ردت اتصل بس كلت لا
عفت السالفه ونمت كعدت ثاني يوم..جان الوضع شوي احسن وطبيعي
العصر هم صار عندي وجع ابطني نفس وجع البارحه ماهود اله اخذت مسكن.. بالليل وره الفطور بساعه ٨ هيج
هم كامت توجعني كلش ....كل شوي يهود الوجع ويرجع
اخر شي رحت تمددت بغرفه جدة... كل شوي اغفى واكعد
بعدين اخذتني نومه عميقه.. كعدتني سرى
سرى: كومي تسحري
رنا:ماريد خليني نايمه
سرى:ليش
رنا:ماريد عوفيني
راحت سرى واني بقيت بفراشي..احس مابيه حيل اكوم
وره شوي اجه صادق
صادق: رنا حبيبي اكعدي
رنا: ماريد اكوم بطني شوي توجعني
صادق:شبيها بطنج
رنا:مادري من العصر توجعني
صادق:شو ماكلتي
رنا:من اخذت مسكن صرت احسن بس هم رجع
صادق:يعني هس توجعج ؟
رنا:يعني اكو وجع بس موهواي
صادق:مابيها مجال تكومين تاكلين لكمه
رنا:لا ماريد موجوعانه..
صادق:لعد ابقى بفراشج...
راح هو واني بقيت بفراشي..بعد شوي هم اجه
صادق:كعدي شربي مي
كعدت شربت مي
صادق:شونج هس
رنا: أحسن
صادق:خوش
شربت مي وصليت ورجعت نمت
الصبح تقريبا بساعه ١٠ كلها نايمه
كعدت على وجع بطني شي فضيع احسن مصارين بطني تتگطع من الوجع .لااكدر اكوم ولااكدر انام.نوب حيلي نهد
كمت ازحف حتى اكعد سراب
كعدتها بالكوة
سراب:ها رنا
رنا:كومي كعدي جده خل تنطيني مسكن
سراب:شبيج
رنا: بطني حيل توجعني
كعدت وكعدت جده .. طلعتلي مسكن اخذته.وبقيت اللوب
جده:شجاج
رنا.......
آخر شي گمت اصرخ من قوة الوجع
جده:امشي صيحي ابوج
احس لحم بطني يوجعني بشكل موطبيعي ابد
راحت سراب ورجعت
سراب:بابا ماموجود.
دكت علي جده
جده:الو هاا وليدي وين انت.......بدوام حسبالي هنا......ماعرف اشو رنا تصيح وتستريح من وجع بطنها ماعرف شبيها........
رنا تكدرين تحجين وياه
هزيت راسي يعني لا
جده:ماتكدر تحجي......هس اشوف علاوي
سدت الخط من يمه
جده: امشي سراب كعدي علاوي
كعد علاوي وسرى..
علاوي:هس اشوف سياره واخذج
جنت اللوب من الوجع اول مره بحياتي هيج اشوف وجع 💔
سرى لبستني شال  وعبايه ..اني جنت لابسه تراك سود
اخذوني واجت جده وياي
بطريق دك صادق على علاوي
علاوي:هلا......اي هس بطريق والله بعدها.....اي ماشي
ودوني لطبيب اخصائي باطنيه
اخذلي سونار واشعه كال:مايبين اكو شي.. بعدين كتب فحوصات هواي وسونار ملون
هم اخذتهن كلهن
الطبيب:تحاليل نضيفه والسونار هم مابي شي
جده:لعد شنو هذا الوجع
الطبيب: راح انطيها هس ابره  ومسكنات
ماكدر انطي غير شي لان فحوصات مابيها شي..
شكلت كانولا.. لان كال هاي الابره بس بالوريد تنزرق
ضربتها ..وره دقايق راح الألم حسيت نفسي ارتاحيت
طلعنا وجده خابرت صادق
جده:هاا ابني....اي ضربها ابره هس أحسن....
اخذي يريد يحجي وياج
رنا:هلا
صادق:ها شونج
رنا:هس زينه
صادق:نفسه وجع الليل مو
رنا:اي بس صار اقوى بهواي
صادق:ماشي هس ارجعي للبيت ارتاحي....ماتاخر واجي
رنا:ماشي
رجعنا للبيت نزعت.العبايه وتمددت  بفراشي وغفيت
بهذا الوكت الساعه ١٢ ونص
كعدت العصر بعد ساعتين على صوت صادق
صادق: يعني الفحوصات مابيها شي
علاوي:والله الدكتور يكول كلها نضيفه
جده:هي من اول البارحه شكت من وجع ابطنها
جنت اسمعهم يحجون.. بعدين كعدت
صادق:هاا وضعج
رنا:زينه مابيه شي هس...
اجه كعد يمي ..حسيته حيل قلق.
رنا:ترا مابيه شي.. وجع وراح
صادق:ان شاء الله يروحي..بعدج صايمه
رنا:اي
صادق:خير ان شاء الله
رنا:روح نام..والله ماكو شي
صادق:هس رايح..وانتي ترجعين تنامين
رنا:لا هاي هيه شبعانه نوم
صادق:ماشي
صعد فوك.. واني بقيت كاعدة جنت اگلب بالموبايل شوي والعب العاب بعدين عفته
العصر هم رجعلي الوجع بس جان خفيف..ماردت اكول واحجي ..رحت اخذت من علاج الطبيب بس مافاد
بعد شوي صاحتني سرى حتى اعاونها بالتحضيرات لان الاذان قرب
رحت وياها بس بالكوة جنت اشتغل
اذن وصبينا الفطور اجه صادق وفراس  وعلاوي كلهم التمو
رحت للمطبخ ماعرف شتاجيب...حاولت هواي اسيطر على نفسي واتحمل بس ماكدرت ..كعدت بالكاع
اجت سرى
سرى:هاا شبيج
رنا:حيل متوجعه بس لاتكوليلهم خلي يتفطرون هس
سرى:ياربي شجاج جنتي مابيج شي
رنا:لا والله جنت متحمله بالكوة
سمعت صوتهم يصيحوني اني وسرى
سرى:امشي كومي هس بلكي اذا تأكلين احسن
كومتني سرى ورحت كعدت يم جده .. ماخليت اي شي بحلگي..صادق انتبه عليه
صادق:شبيج
رنا:شوي واجي
كمت ورحت لغرفه جده وتمددت من الوجع
بعد شوي اجه عليه
صادق:شبييج رنا
رنا: الوجع رجعلي
صادق:وجع بطنج
رنا:اي كلش مأذيني
صادق: استغفر الله ...بس لو اعرف شنو هالوجع
اجت جده وعلاوي
جده:ها شبيها
صادق:امشي وياي
رنا:وين اجي .ترا ماكدر اكوم والله
بقيت ماسكه بطني والوجع بده يزيد اكثر واكثر
هم كمت اعيط واصرخ ..اخر شي معد اشوف اي شي..فقدت وغمى عليه ..ماكعدت اله واني يم الدكتور
الدكتور:اسمعيني
هزيت راسي
صادق:صار ٣ ايام الوجع يتكرر عدها.. اليوم هم اخذناها لطبيب يكول مابيها شي
الدكتور:هس هم اخذلها سونار وخلي يطلع الفحص ونشوف
اخذلي سونار وطلع الفحص وكله تمام
هم ضربني ابره .وشوي هود الوجع
رجعنا بالطريق جانت جده وعلاوي ويانا
اني جنت بس ساكته احس بخمول فضيع اباوع عالناس بالشارع والمحلات مليانه ناس..اكول والله زين بيهم حيل واكفين ويفترون من كد ما جسمي تعبان ومهدون
صادق هم ساكت بس حيل معصب مبين.اعرفه زين من يعصب
جده:يعني والله عجيب هالوجع ويطلع كلشي مابيها
علاوي: دكاتره كلشي مايفهموون
وصلنا البيت..نزلت وكبل رحت كعدت عالقنفات بالصالة
سرى:ها شونج
رنا:شوي احسن.بس جسمي تعبان حيل
رحت تمددت ونمت ماكعدت للسحور اكلت شوي ورجعت نمت...ثاني يوم جنت زينه..هم المغرب قبل الفطور صار عندي وجع خفيف بالليل.اجت صابرين تسلم عليه لان جده كالتلها... صادق جان بصلاة التراويح
صابرين:شكم يوم صار تشكين من بطنج
رنا:٣ ايام تقريباً
فراس طب للصاله
فراس:ها شون صرتي
رنا:يعني نص ونص
فراس:مابيج غير العافيه
رنا:الله يعافيك
كال هيج وراح ماسلم على صابرين
صابرين: الناس ملتهيه بالعيد وفرحانه واحنا يوميه سالفه غاثتنا
جدةكولو لروحكم.... رمضان راح يخلص ويجي العيد وانتو حتى سلام ماكو بينكم ..مع الأسف عليكم
صابرين سكتت ماردت ...
اني الوجع مستمر عندي
رنا:اني اريد اتممدد
سرى: روحي تمددي بغرفتي
رحت تمددت بغرفه سرى ونمت.ماجنت مرتاحه بنومتي ابد
كل شوي اكعد وتكلب سمعت صوت علاوي يصيحني
طبت سرى للغرفه
سرى:رنا صادق يصيحج
طلعت من الغرفه.. جان واكف ابدايه الدرج وبأيده مثل الضرف الأبيض
صادق:تعالي
اجه مسكني من ايدي وصعدني فوك للغرفة
صادق: أخذي هذا يومي إدهني جسمج بي
باوعت علبه بيها زيت مختلط
رنا:شنو هاي
صادق:هذا زيت مرقي علي يفيدج..ادهني جسمج بي يوميه مرتين بنهار وباليل..
اخذته منه
صادق:هس روحي خلي سرى أو صابرين تدهنلج
رنا:ماشي
باسني من ركبتي
صادق:يلا روحي
نزلت جوة وكلت لسرى
طبيت وياها للغرفه  .. قفلت الباب ونزعت ملابسي بقيت بالأتك.بدت تدهن جسمي
سرى:منين جابه
رنا:ماعرف
سرى:معقوله بعده مآثر عليج
رنا:يجوز....اني نفسيتي حيل تعبت ماريد شي ياذيني بعد لاجسدي ولانفسي.اريد ارتاح
خلصت دهن لجسمي ولبست ملابسي.. كعدت شوي وياها عالتخت..جان اسمع صوته وصوت صابرين عالي
طلعت اني وسرى من الغرفه ....
شفته هس نازل من فوك..جان معصب حيل وطلع بره
صابرين جانت فوك...صعدت عليها
شفتها هس قفلت الباب مال الغرفه اللي بيها نور
رنا:شاكو
طبت لغرفتنا ولحگتها
رنا:ماتحجين
صابرين:ماكو شي بس صادق طب للغرفه وحجه على نورر
رنا:ليش
صابرين: يعني ليش..لعد هاي حالتج عالخالي بلاش..تأثير فعلتهن لي هس بيج ...طب عليها كاللها اذا يصير اي شي لرنا اموتج هنا والله
خفت كلش..كلت يعني معقوله يصير بيه شي
صابني رعب من كلام صابرين
نزلت جوة وياها بس بعدني خايفه
كعدنا بالحديقة اني وياها وسراب وسرى
صابرين:صدك رنا ماحجالج شي وين اخذ نور
رنا: سألته ماجاوب..وراها هم شفته الفجر اخذها
صابرين:الفجر!؟؟
رنا:اي
صابرين: سراب ماكالج وين اخذها
سراب:لاماكال
رنا: صابرين يمكن راح اجي وياج لان نفسيتي تعبانه اريد اجي يمج
صابرين:اي امشي وياي..
رنا:اريد ابقى يومين ٣ يمج
صابرين:اي يلا كومي حضري هدومج
كمت طلعت هدوم اللي خليتهن بجنطه ورحت وياها
طبعاً خلاص مافكرت اخابر صادق أو اكوله... ماعرف شون هيج فجأة كلت لصابرين..وحتى صابرين ماكالتلي كولي لصادق اثنينا طلعنا بدون تفكير
رحت وياها مشي..جانت الشوارع مليانه جهال ونسوان رايحه وجايه كلها تفتر بالسوك على مود تحضيرات العيد
صابرين: شوفي شوفي الناس بشنو ملتهيه واحنه بشنو ملتهين ...اني اخذت قطعه دزيتها على خياطه صار اسبوع بس بعد ماكملته
رنا:هاي عود عساس وره العيد نزوج
صابرين:صدك ترا انتي دوبج تلحگين تحضرين نفسج
رنا:شحضر
صابرين:شنو شتحضرين..ترا وراج كومه شغلات تشترينهن..يراد اقل شي مرتين ٣ نروح للسوك
رنا:والله عاد غير انتو تفطنون..
صابرين: بلي فطنانين بس من وره هاي السالفة مال الچلبه نور التهينا...يلا بلكي هالاسبوع او حتي وره العيد نروح نكون مفكرين احسن
رنا: ميخالف نشوف شون ترهم
صابرين:صايره تسولفين مثل صادق..ترهم ومعرف شنو
رنا:ههههه
صابرين:ههه عابت
وصلنا البيت..
رنا:اريد افوت اسبح هس
صابرين:فوتي للحمام مابي احد
طبيت للحمام سبحت وطلعت
صابرين:اني جوعانه وانتي
رنا:اي جوعانه
صابرين:راح احمي الفطور
رنا:اي احمي
حمت الفطور..جانت مسويه برياني
كعدنا ناكل اني وياها وجهالها ..
رنا:زلمتج وينه
صابرين:طالع مايجي هس للسحور
خلصنا اكل..ودزت على حبشكلات
اني جنت لافه شعري بعدني مومشطته.طبيت لغرفتها
فتحت شعري مشطته وخليت كريم علي
سمعت صوت صابرين تحجي بالموبايل .بس مافهمت عليها
اجت الغرفه
صابرين:وين موبايلج
رنا:بالجنطه
صابرين: خابرني صادق معصب حيييل داك عليج هواي
وكام يحجي لان جيتي وياي
رنا:صدددك؟!!
صابرين:شوفي هس راح يجي شيحجيي ششيكوول لاتردين  علي ولاتفتحيين حلگج .......يتتتتبع