#ليته يعلم(أحببته منذ الصغر)

البارت ٣١ الجزء الثاني

البارت ٣١ (الجزء الثاني )
#ليته يعلم
للكاتبه #شفاء الموسوي

جانت هاي الفتره كلش صعبه على صادق.زلم تروح وزلم تجي ومخبوص بقضيه اخوه.وعيلته يمنا بقو
جده مكضيه وكتها تصلي وتدعي لفراس
اجو زلم من الساعه ٨ تقريبا
اني جنت بالمطبخ اغسل مواعين وسرى وياي
علاوي:سون جاي بالقوري الجبير
سرى:هس اسوي
سوت جاي سرى واني حضرت الاستكانات
جنت انتظر الزلم يروحون حتى اروح اشوفه اشوف وضعه واحجي وياه
صارت الساعه ١٢ الاربع تايالله راحو
طبيت للاستقبال..جان مليان دخان جكاير واستكانات وهوسه
صادق:فتحي الشباك
فتحت الشبابيك والباب ..لميت الاستكانات ووديتهن للمطبخ ورجعت عزلته كامل
هو جان كاعد ويباوع للكاع
كعدت مقابيله ع القنفات
رنا:اسويلك جاي يصفي راسك
صادق:لا ماريد بزعت من الجاي
رنا:ماشي ...شراح تصير بشغله فراس
صادق:وكلت محامي وانتظر .بس ان شاء الله ماينحكم
رنا:ان شاء الله..انت شونك؟
تنهد بعدين رد عليه
صادق: الحمد لله على كل حال
رنا:اريد اسألك
صادق:اسألي
رنا:شون عرفت بولاء.اقصد شون عرفتو انو رحاب مواعدته بهااليوم
صادق:شوفي رنا.. اني بالاصل شكيت وكلبي لعب بس ماجنت اتوقع ولاء الهالدرجه تسوي
جنت اشوف مكالمات هواي بينها وبين رحاب.سالتها كالت بس هيج نححي وندردش..
فراس دك عليه وكالي تعال .جيت هنا الصبح انتي جنتي بدوام
شوفني سكرينات لمحادثات بين ورحاب والولد ...
كتله اصبر خلي تمسكهم مسك احسن حتى محد بعدين يحاججنه
رنا:يعني فراس عرف ورحاب جانت هنا مو
صادق:ايي.جان يكلي ماتحمل ياخوي اريد ابلش
كتله تبلش هيج بدون مستمسك قوي موصحيح
شلت هاالفكره من راسه..ماجنت اريده يكتل احد حتى ماينسجن ويتبهدل.بس بنفس الوكت الواحد كلبه مايبرد بهيج موقف .بعدين دزلي سكرينات محادثه بينها وبين ولاء
ولاء طلعت تعرف بكلشي وتقبي عليهم.نوب رادت يصير ابيتي هالشي..جبتها هنا غضبا عنها رجعت تكول لرحاب صادق جابني گوة روحي يم اهلج
تعمدت اني اجيب العيله بهاليوم هنا..ماعرف فراس من جاب البندقيه.جان قافل انو يكتلهم....رجع يتنهد نوب ماكمل كلامه
رنا: تعرف شغله
صادق:شنو
رنا:اني جنت اعرف انو ولاء تدري
من كلت هيج باوع عليه وفتح عيونه
رنا:اقصد بساعتها من وكت توفه ابوك .شفت رحاب وحسام بالبيتونه وولاء وياهم.يعني عدها علم
رد عليه بنترر
صادق:زين انتي ليش ماكلتيلييي
رنا:بوكتها محد صدكني لمن حجيت على رحاب.نوب اكول ولاء ..وحتى شغله نور لمن دك رقم غريب هم هي لان سمعت نور تلوم بيها تكول صوجج
صادق: اريد اعرف شغله وحده انتي بيج شيييي..
رنا :شون يعني
صادق:ليششش ماحجيتيي بساعتهااا جان واحد حذر منها اكثرر..وثاني شي اني موماصدكتج بوكتهاا.بس كتلج مانكدر نحجي اذا مااكو دليل صحححح لو لااا
رنا:اي صحيح..بس بوكتها راحت الشغله ونست
صادق: تعديتيي من ماحجيتيي مفروض تكوليلي
صيحيي نورر
ضجت من عاتبنيي ماحسبالي هيج حيضوج.رحت صحت نور
رنا:نور ابوج يصيحج بالاستقبال
نور:ليشش
رنا: تعالي وتعرفين
حسيتها خافت كلش
رحت وياها للاستقبال
صادق:تعالي كعدييي هيين
راحت نور كعدت يموو
صادق:سولفيلي شون رحاب انطتج رقم الولد
نور:ها ياولد
رنا:ذيج المره وكت صارت السالفة.ترى سمعتج من كلتي صوجج
عرفت شنقصد.بالبدايه بلعت ريگها
صادق:يلاا احجييي
اني طلعت من الاستقبال كلت تحجي مع ابوها وحدهم أحسن
فتحت الباب باوعت سراب بوجهي
سراب:شيريد بابا من نور
رنا:هيج بشغله قديمه
سراب:ها شنوو
رنا:بعدين احجيلج ترى حيل تعبانه
سراب:ماشي
رحنا للصاله لكيت مصطفى وجده كاعدين. جده تقرأ قران ومصطفى ماسك موبايل صادق ويلعب بي
وعلاوي وسرى بغرفتهم
رنا:ها حسن ماتنام
حسن:لا
كعدت شوي وياهم .سمعت صوت صادق ارتفع بس خفت لاجده تسمع وهي البيها مكفيها
جان تطلع نور من الاستقبال وعيونها حمرر
راحت لغرفه جدة.
بهاي الفتره البنات وحسن ينامون بغرفه جده ويانا
اجه صادق للصاله
صادق:سراااب جيبيلي فراش للاستقبال .
اجه على ابنه واخذ الموبايل من عنده
صادق:رنا نومي مصطفى.الوكت تاخر
رنا:هس.. رحت نومت مصطفى .سمعت صوت علاوي جوة وصادق يحجون ويه جده
طلعت لكيتهم بالصاله يتسولفون بنفس الموضوع وجده شايله هم فراس حيل
كعدت وياهم بس ماحجيت شي بس جنت اسمع
علاوي:اني لحد الان مامستوعب الصار
جده:كابوووس والله كابوسسس
صادق:ابتلائات ربنااا هاي
حسيت نفسي حيل نعست.رحت للغرفه.تااتمدد بفراشي جان اسمع صوت.مثل البجي
تعدلت والغرفة ضلمه باوعت سراب وره البرده تبجي .رحت يمها
رنا:شبيج سراب
بالكوة ردت لان جانت تشهك
سراب:اني مقهورة حيل عالصار.رحت قبل شوي من الممر باوعت على غرفه فراس ورحاب.اكول معقوله هيج صار وياهم..هو بالسجن وهي بالمستشفى.رنا قبل اسبوع جانو سويه كلشي مابينهم هييج بسااااع
نزلت دموعي من حجيت هيج
اجت نور يمنا وكلنا كمنا نبجي
سراب: شوفي مصطفى خطيه.اليوم يسألني وين بابا وماما
ماعرف شكلو
نور: حتى اني اليوم سألني.نكزت قهر علييي
سراب:وبابا هم حيل تعبان...ولاء ليش سوت هيييج..
نور:حسبي الله عليهن
جنه
طب صادق
صادق:هاا نام مصطفى
رنا:اي
باوع علينا ملتمات ودموعنا ع وجوهنا
شغل الضوه اجه كعد يمنا
صادق:شبيجن
ماردينا..بس عرف ليش كاعد نبجي
صادق: ميخالف ميخالف.خلي يطلع فراس وكلها مگضيه
الله عز وجل يختبر عباده..شوفن احنه وضعنا احسن بجثييييير من وضع اهل رحاب وولاء ..لان هنا اللي خانن واللي ارتكبن محرمات وماخلن الله بين عيونهن..
يعني رحاب سواء عاشت أو ماتت العار طول عمرها يلاحكها ويلاحك اهلها.وولاء تطلگت واهلها عرفو بسوالفها وابنهم مخطر..اصلا اني اكول شون اهلهن راح يتحملون هالشي الصار .هيج اغلاط طول العمر ماتنسي ولاجرحها يخف
رفع حاجبه وكال:يعني برأيجن منو وضعه أصعب
سراب ونور كالن سويه:اكييد هما
صادق:احنه شمايكون مارضينا الغلط والحمد لله عرفنا راسنه من رجلينا.ولو متأخر بس كلشي بي اراده
حضن سراب ونور وكاللهن
صادق:اللي اريده منجن تسمعن كلامي واي شي يصير وياجن تبلغني ابد لاتخافن من شي
نور:ان شاء الله
صادق:يلا نامن ...باوع عليه وكال:خما عندج دوام باجر
رنا:ايي...بس ماراح اروح
صادق:ليش
رنا:ماريد ماليه خلك.سئلت البنات كالن ماعدنا امتحان
صادق: بكيفج
طلع من الغرفه وسد الباب
رغم كلشي يبقى يشجعنا ويخفف الآمنا ويقوينا ..مع العلم هو محتاج هالشي اكثر 💔
نمنا وكعدت الصبح بالكوة لان نمنا متأخرين حيل
باوعت البنات نايمات والجهال حسن ومصطفى هم نايمين بس جده كاعده
رحت غسلت وطبيت للمطبخ.جان علاوي بالصاله لكيت سرى كاعده تسوي ريوك لعلاوي
هم اجت جده للصاله
سوينا ريوك سويه وخلينا بالصاله
جده:رنا شوفي صادق كاعد خلي يجي ياكل لگمه البارحه مااكل شي
رحت للاستقبال شفته نايم ماصخيت اكعده .عاد رحت وعفته . اجت صابرين الضحى
العصر جنه اني وصابرين كاعدين بالحديقة نسولف
اجه صادق كاللنا: شوفن اريد منجن على وكت مجالجن تفوتن لغرفه فراس وشكو شي يخص رحاب تخلنه بگونيه وتنطنو لعلاوي يحرگه .وتقفلن الباب وتنطني المفتاح
هزيت راسي
كال هيج وطلع بره
صابرين:تصدكين ماريد حتى افوت على غرفتهم
رنا:ولااني...
بالليل صار عدنا مجال
طبينا اني وصابرين للغرفه
كبل كلبنا انعصر
كمنا نطلع بهدومها ونخلي بالكونيه .
ملابس البيت والطلعه والغراض كامل
صابرين:وللج جان مدللها ولايكوللها شي وبكيفها.حتى صادق جان يكوله انت ماتحاسب مرتك ابد..يمگرود ضامتلك هالضميمه..نوب القرچيه ولاء حسبي الله عليهاا شون صل جايف الله ينعلهن ..تدرين من اتذكر اكول ان شاء الله تموت رحاب لان تستاهل الموت بهيج وضعيه
اجت جده وباوعت
جان تكعد بالكاع وتگهد
اله خلتنا نبجي.اجن البنوات وسرى هم
نشيل الغراض من جبهه ودموعنا من جبهه
صابرين:يوم كافي تبجين هس ضغطج يرتفع
جده:عفيه على كلبي شيريد يتحمل بعد
اجه صادق ..وتعصب حييل
صادق:ادررري اني شكللللت ...
ماتعرفن تقفلن الباب وتشتغلنننن.كلجن ملتمات مسويات لطمييه عليششش..گلعه تگلعهاااااا ان شاء الله
جده:احنه مونبجي عليهاااا.احنه نبجيي عالصار ويه فراسس .لعد هس بالسجن شحالوو
صادق:لا حول ولا قوه الا بالله....انيي انجاز بفراسسسس يطلع لاتخافين
شو طب مصطفى للغرفه.طبعا مصطفى عمره ٤ سنوات.مخلي إصبعه بحلكه ويباوع علينه راح يركض للجرارات تايطلع العابو.باوع ع الگواني والكنتور فارغ
مصطفى:هاي شمسووين
صادق معد يگدرر .باوع عليه كالي
صادق: أخذي من هين
رحت اخذته وطلعته للحديقه كمت اللهي بي وناديت حسن يلعب وياه .
رحت للغرفه .سرى اخذت جده والبنات طلعن من الغرفه
اني وصابرين كملنا..خلينا شكو شي يخصها بالكونيه
وانطيناها لعلاوي وحرگهن
ثاني يوم صادف جمعه جنه كاعدين ع الريوك
صادق:سراب نور.خلصن ريوك تاخذجن للبيت جيبن هدومجن وشغلاتجن التحتاجنهن وهدوم حسن هم لاتنسين
راحن البنات وياه.واجن جايبات هدوم الهن والحسن وغراضهن هم. وهو هم جاب كم شغله اله وعلگهن بكنتور جده..صادق بقى هنا هو والعائله مايكدر يخليهم هناك والبنات مايعرفن لايطبخن ولاشي وهو هم يروح للدوام فرجعو حالياً هنا
وره يومين جنت بدوام.وبالي كله يم البيت بمدي ولااداوم هاالفتره
رجعت من الدوام جان اشوف سياره عمو ابراهيم يم الباب
طبيت باوعت احذيه هواي يم باب الاستقبال
رحت غسلت وصليت. بعد شوي طبيت للمطبخ جان اشوف من الشباك
صادق وعمو ابراهيم وابن عمى منى الجبير ميعاد وعلاوي واكفين يم الباب يتسولفون .بس احسهم موتمام.يعني موسوالف عاديه
راحو عمو ابراهيم وميعاد..
اني رحت للغرفة نمت شوي وكعدت.. فتت سبحت ومشطت شعري
طلعت للحديقه جان صادق كاعد ع الكرسي وماسك موبايله
يخابر
صادق: اي اعرف شوي تعقدت الشغله هس اكثر من قبل........اي صحيح........فعلا......... انت رتبها من يمك وشكد تطلب تدلل...... ياهلا ياهلا مع السلامه
رحت يمو
رنا:ها شونك
صادق:هلا برناوي....جيبي كرسي وكعدي
رحت جبت كرسي وكعدت يمه بس قريبه علي
رنا:اخبار نفسيتك اليوم
ابتسم وكال:هه مليوصه
رنا:ليشش خما صار شي
صادق:الولد مات
رنا:صدددك
صادق:ايي
رنا:وشون هسس خما مايطلع فراس
صادق:يطلع بس شغله تعقدت شوي لوينحكم لو يطلع
واذا انحكم بلكت شي قليل.كاعد اشتغل ع كل الإحتمالات
رنا:زين ورحاب
صادق: بعدها بالمشفى
نزلت من الكرسي وكعدت مقابيله بالكاع وخليت ايدي وحنجي على جسع رجلو يعني ارتجيت عى ركبتو
رنا:وهس شلون
خله شعري وره اذاني
صادق:محلوله ترهم.مدام اشوفج يمي وكل يوم وقريبه عليه وبخيير
هاي هيه ترهم الأمور
ابتمست من كال هيج
اجت صابرين.كبل وخرت عنو
صابرين:هاا انتوو هين
صادق:لا كاعدين بالاستقبال
كل عقلها صابرين باوعت للاستقبال
كمنا نضحك عليها
صابرين: ماشاءالله ماشاءالله مسويني مضحكه
صادق:اي غير صدكتي وخليتينا نضخك.يعني مضحكه
صابرين:هااا صادق هااا شو حاط عليه اليوم
صادق: تعرفين شكد موفاضيلج وماعندي شغله وعمله عاد حطيت عليجج
كمت اضحك من كل كلبي من كال هيج
صادق:يولي نصي صوتج احنه بره ههه
صابرين:هس هس اخابر محسن يجي ياخذني ماضلتلي كعده هين
صادق: دقيقه هس اني اختبروا
طلع الموبايل من جيبه
صابرين معد تكدر
صابرين:لالا وين تخابره اشاقه يمعود
ضلينا نضحك عليها
عود صابرين كلش محبوبه وكوميديه وتحب العلوم والسوالف بنفس الوكت من اشوفها احس بطاقه ايجابيه..
طبينا جوه وعاونت سرى بالعشه .وره ماتعشينا عرفت جده انو الولد مات.وهم تخبلت وكامت تبجي خافت على فراس لاينحكم وصابرين جانت تهدي بيها ...
وره يومين .الوضع هو هو..صادق يخابر ع شغله فراس ويريد يفضها
سوينا اني وسرى عشه كبه وباميا وتمن
صبينا العشه وكعدنه تاناكل
جده:صيحن ابوجن يتعشه
راحت سراب تصيحو اجت وكالت:مايريد يكول موجوعان
جده:ايي حقوق حقووو بالو مشغول بأخوو يارب تسهلها يارب
وره شوي طلع من البيت
خلصنا عشه وغسلت المواعين .حسيت نفسي انتظره اريده يرجع
تاخر الوكت ومارجع.
اني والبنات فرشنا فراش بالغرفه مصطفى يم سراب وحسن كاعد يمي...كمنا نسولف وندردش
وجده بصفحه تقره قران وتدعي لفراس
سمعت صوت السيارةوالباب انفتح
سراب: بابا اجه...
رنا:ايي
ردت اكوم اروح اشوفه بس البنات كاعدات
معد اكدر كل شوي اريد اكوم
مسكت الموبايل اول مامسكته اجتني رساله منو (جيبي فراش الي وتعالي للاستقبال انتظرج)
طرت من الفرح
اخذت فراش وطلعت من الغرفه عدلت نفسي اول شي
رحت للاستقبال ......يتتتتتبع