#ليته يعلم(أحببته منذ الصغر)

تكمله بارت ٤٤

تكمله بارت ٤٤
#ليته يعلم ( أحببته منذ الصغر)
فجأة اجت نور للغرفه
نور: ارتاحيتييي هسسسس مووووو
تهجمت عليه ضرررب وغلططط
مارجعت ضربتها ..بس حاولت ادافع عن نفسي وأبعدها عني
عماتي سحبنها مني بالگوة وبقت تحجي وتغلط
جده ضربتها راشدي ورزلتها وكلهن رزلنها وطلعنها بره الغرفه
رنا:انتي ماتخافين الله وحقوده..ولج اني مانسى فعلتج وياي بأخويه..حسبي الله عليج
جده فطوم:عفيه لاتكولين لصادق ترا بالقران ينهيها نهي هس
صابرين: خليي يدريي على شنو تقبين عنها
عمى:لاتكولين اله شي خلنا متهني وفرحان
صح نور اجت وضربتني وغلطت عليه بس هذا ابد ماراح يخرب فرحتي اليوم ولااسمح بهالشي
منى:يعني فوك مايتيمه وماعدها احد هم هاي ملاحگتها على فرحتها
مها:گومي غسلي وجهج
كمت ويه مها رحت للحمام غسلت وجهي ومشطت شعري
اجه حسن
حسن:بابا يصيحج بالطارمه
رحت للطارمه جان واكف بصفحه وداير ضهره ينتظرني
جنت اباوع علي
هالمره النضره غيير ياناس .ماجنت مصدگه ابد انو هاي هيه صار الي
اندار وباوعلي
صادق:تعالي يمي
وكفت يمه
شاهد الله عليه بدون اي تزويد دمعت لااراديا💔
صادق:ليش تبجين يروحي
رنا:خفت وضجت لايتأجل العقد
صادق:كل عقلج اأجله .كلت اليوم يعني اليوم
ترا هاي سالفه نور..جوة نعالج والله.
لو البيت يشتعل اخذج اخذج
رنا:تصدك شغله
صادق:شنو
رنا:احس نفسي موبس حصلتك.. حصلت كلشي ❤️
باسني من راسي
صادق: أن شاء الله اكون كلشي الج
رنا:متأكده من هالشي
صادق: روحي فوتي جوة هس..بس يروحون اجيج
رنا:ماشي
فتت جوة والراحه الداخليه اللي حسيت بيها ماتنوصف
كل معاناتي وكل المشاكل اللي صارت وياي سابقآ حسيتها كلها راحت وره ضهري.وكأني بديت بحياة جديده وياه
طبيت جوة وكعدت يم مها
صابرين:هاا عيني تعاي سولفيلي شحجيتو وشنو شعورج وشعور صادق
رنا: يصابرين موشعور وبس ماعرف شكلج اوف
صابرين:يويلي يويلي عليج ..شگد تحبينو لعد
رنا:هواي كلش كلش.ضحكت وكلت:لي هس مامصدكه
صابرين:دكافيج عاد صدكي صدكي
مها:ههههه
رنا:ايي مامصدكه شسوووي
جنت انتظر البيت يفرغ والناس تروح حتى اكعد وياه
بعد شوي راحت مها و راحو الناس والبيت فرغ بس بقت صابرين.و بقى عمو ابراهيم وعدنان موجودين
كلت يلا مابقى شي
رحت خليت مكياج خفيف وتعطرت ورتبت نفسي
نور جانت فوك بالغرفه.وجده وصابرين كل شوي يروحن عليها حتى يتاكدن انو هي مامسويه شي بروحها أو غيره
اجه علاوي
علاوي: مبروك رنا تستاهلين صادق
رنا:يبارك بيك علاوي تستاهل العافيه
سرى:اي والله تستاهل رنا
صابرين:اني نعست اريد فراش ليه ولجهالي
سرى:هس افرشلج
صابرين:افرشيلي فوك بغرفه البنات
سرى:ماشي
سمعت صوت عمو ابراهيم وعدنان طلعو من الاستقبال
رحت باوعت من شباك المطبخ.جان يضحك ومبتسم ويه عمي وعدنان ومبين متونس
جنت اباوع علي وبهاي اللحظه شكو شي زين سواه وياي اجه بهذا التوقيت
اجه ابالي وكت عرف اني احبه وهو جان خاطب ولاء.مع هيج تعامل وياي بكل لطف..وكت صارت شغله رحاب وكالو انو اني اتهمتها ونكلبت الشغله ضدي هو الوحيد اللي وكف وياي ورجعني للبيت غصبا عنهم.وتذكرت وكت اجه هذاك مسعود الخطبني واني ماردته..هو اللي وكف وياي وخرب الخطبه..وكت صارت شغله العطر وولاء كلبت الدنيا.بوكتها ضربهاا ودافع عني..وكت رحت ويه اخوي علاوي وصار الحظر .اجه بنص الليل بدوريه وجاب كلشي وثاني يوم راح جاب علاوي..ووكت توفى اخوي هو اكثر شخص وكف وياي وساندني يعني بوكتها لوماهو وياي الله يعلم شيصير بحالي
وكت داومت بجامعه من ناحيه المصرف والاشتراك وغيرها وغيرها هووووواي مواقف ماتنسي
خجلت گدام هاي المواقف واستحيت كلش
وهو هم تعب ويه ولاء ومارتاح والسوته موقليل
كلت اريد اطيعه واسمع كلامه واحاول اتغلب على طبعي من ناحيه العناد وغيرها لان هو فعلاً يستاهل ....
يلا عااد روحو شو لزگتو اليوم
جانو واكفين يم الباب هما وصادق وفراس
تايطبون جوة اني كبل رحت للصاله جانت جده وصابرين  كاعدات بالصالة
فات صادق مبتسم..اني هم ابتمست
جده:تعال وليدي تعال ابوسك
باسها من راسها وباسته
جده فطوم:مبروك وليدي..انت تستاهل رنا ورنا هم تستاهلك
اجه گعد يمي
صادق:ها رناوي وضعج
رنا:حيل زينه
صادق:اي عفيه ..
تقرب عليه وكال:معنوياتج شونها
بعد مارديت.. صابرين كالت
صابرين:هس لاتكومون تتبشبشون كدامنا ..سولفو بصوت عالي نريد نسمع
صادق:شعليج..
صابرين:شون شعليه اريد اسمع
صادق:سوالف خاصه ماتخصج
معد تكدر من كال هيج..اني بس اضحك عليها
صابرين:اذا خاصه لاتكعدون كدامنا...ترا اني ماتحمل اشوف احد يسولف بصوت ناصي..انجلط
صادق:شوكت تنجلطين
سالفه جرت سالفه وجفصت صابرين ياربي ماتكدر على لسانها
صابرين:شوف صادق اني موعلى مود شي.بس خلي نور تكعد راحه ويه رنا ..
صادق: لاتخافين اخلي حدود مو حد وويه الكل هم..اني انجاز
صابرين:كون موبس كدامك حتى وراك ماتسوي شي.لان بعد مامسكتو عقد هجمت على رنا وضلت تضرب وتغلط عليها ..مستهتره حيييل نوور
اني ماردتها تگلو ابد لان اعرف شراح يصير وراها
صادق:صدك تحجين
صابرين:اي والله
شو كبل كام وصعد فوك
جده:ليششش حجيتيي ليشش
صابرين:اي ها هيه احجي ....
جده لحكتوو ..بعد شوي بس اسمع صوت هوسه موواضح شي.ردت اصعد بس خفت
نزلت سرى وجده
سرى:اريد اعرف منو كال لصادق
صابرين: أني كلتله خلي يرربيها انتن عليش تختختن عليها
سرى:وللج خلص عليهااا ....حتى علاوي ماحجزو عنها
اني متت خوف..رحت لغرفه جده وكمت ابجي
وره نص ساعه تانزل
كبل اجه عليه للغرفة
صادق:ليشش ماكلتيلييي ..اني موكتلج اي شيي يصير تكوليلي
مارديت علي بقيت ابجي
صادق:ليششش تبجييين
رنا:كاافي كاافي ترا تعبت
كعد مقابيلي . جان رافع اردان الدشداشه ودمارات ادينه كلها تبين شكد مومعصب
صادق: ووولج انيي ماريد ابد أحد يمددد ايده عليج لو يغثج..اذا مامن هسس اخلي حدد باجر وعگبه يتكرر إلفعل.لعد انييي شنوووو هنااا..هاي نور خبلتنيي اريد اعرف شنوو علتهااا وياج
رنا:هي ماتحبني شسويلها قابل.عوفها
صادق: بسيطه بسطيه يصير خير ..يلا كومي
رنا:وين
مسك ايدي واخذني للصاله
صادق:صابرين روحي سوي شي ناكله
صابرين:هسس
راحت صابرين تسوي اكل
جنت كاعده يمه وماسك ايدي بقوة.احسه بعده معصب
رنا:شبيك
صادق:مابيه شي ..بس غاثتني كلش نور..يعني كاعد يدور ابالي تساؤلات هواي
رنا:شنوو
صادق:ترهم ترهم
رنا:يمكن تغار ؟
صادق:ان شاء الله بس هيج
وره شوي اجت صابرين .شايله صينيه اكل
صادق:صيحي امي تجي تاكل
رحت صحت جده تاكل ويانا..بس ماقبلت كالت اريد انام لان حيل تعبانه
رجعت للصاله
رنا:تكول ماريد..تريد تنام
صادق:ماشيي.تعاي كعدي انتي
كعدت اكل لان فعلاً جوعانه ماتعشيت
اجت سرى
سرى:فرشتلج فوك انتي وجهالج
صابرين:تعيشين يلا اروح انام حيل نعست
رنا: خلي اروح افرش فراش لجده واجي
صادق:افرشي فراش الي هم وتعالي
رنا: تمام
رحت  فرشت فراش لجدده ولحسن ولمصطفى وهم فرشت الي.
خطيه جده كبل نامت
اخذت فراش ورحت للاستقبال
صادق: تعالي يمي
هالمره الشعور غير كلشي يختلف احس اكثر بعد صار حب
صادق: تصدكين اني عبالك اول مره اعقد ..ماعرف شسويتي بيه انتي.لختيني لوخ
جان يحجي واني بس اباوع علي
صادق:احجي شي
تقربت كلش علي
رنا:احس صرت اريدك اكثر من قبل
صادق: لعد خليني اشوفج اني شكد اريدج هس
ماحسيت اله مسكني من خصري.وباسني بكل قوة
تقريباً ربع ساعه هو مستمر وياي
اني من غير شي شلوني نوب هيج سوى وياي
تسكربت كامل
جانت هاي اول مره هيج شي يصير بينا
صادق: تريدين بعد
رنا:لا كافي
صادق:ليش
رنا:موزين نطول
صادق:اممم لاتخافين اعرف حدودي وياج..صح صرتي مرتي شرعاً بس مخلي كلشي لوكته
رنا:اي زين..
صادق:اكلج اني باجرعندي دوام بس أن شاء الله بعد باجر اخذج لصايغ حتى تشترين ذهب وحلقه .. اهم شي الحلقه حتى محد يجي حولج
رنا:وانت ماتاخذ حلقه
صادق:لا
رنا:ليش
صادق:ماتعجبني اضوج منها
رنا:اممم ماشي.وشنو.راح اشتري بعد
صادق:بكيفج اي شي تريدنه تاخذي ...
رنا:ان شاء الله
صادق:انتي نعستي كلش روحي نامي
رنا:اي نعسانه بس ماريد انام
صادق:لاا روحي نامي وارتاحي
رنا:ماشي رايحه
رحت لفراشي تانام.
احداث اليوم براسي ماتروح.بس كلها بچفه والشي اللي ردته وصار بچفه
نمت هالمره نمت مرتاحه رغم كلشي سيء صار اليوم وياي
بس يبقى الاحلى هو انو صرنا لبعض ❤️
نمت وكعدت الصبح على صوت صابرين وجده
كمت على حيلي رحت غسلت وتذكرت فجأة انو صرت مرته وخصوصا القبله الطويله اللي صارت بينا....بمدي أكررها هواي
رجعت للغرفة
صابرين : بالكوة نامت نور كل الليل تبجي وتشلع..
جده فطوم:لاحول ولا قوة الا بالله
رحت سويت ريوك.وكعدت سرى وسراب
وكلنا التمينا عالريوك .كمنا نحجي بالصار البارحه وصابرين تقلد وتضحك
صابرين:والله البارحه بالدفرات مسكو عقد صادق ورنا
سرى:هههههههه
سراب: اي والله
رنا: احلى عقد اصلا
صابرين: دسكتيي عااد نور رعصتكم رعص
سراب هههههه صار فلم هندي والله
رنا:يصابرين كافيج عاد
صابرين:والله شنووو كالو تأجل العقد ها هيه تأجل تأجل..بعد شوي نزل صادق ورنا يمسكون عقد نوب اني انقهرت على مكياج رنا خطيه منال ساعه تمكيج بيها....والله خبلتونااا صاعدين نازلين
متتنا ضحك ع هاي سالفتهاا
رنا:كافي يصابرين خلينا نتريك
صابرين:تريكي احد ماسكج لو اله يجي صدوقي يوكلج
رنا:اي والله فديته ...بس حرامات بدوام
صابرين:اكلج هييي مو تخبصينا كل شوي داكه عليي..
رنا:لا مادك علي..اعرف شوكت ادك
التهينا بالسوالف والضحك بعدين كمنا على شغلنا
نور لحد الان مانزلت
اني جنت انتظر يجي صادق.هو مرات يجي ب١ مرات اقل
يعني بهاي الأوقات
سوينا غده
وصارت الساعه ١٢ ونص... سمعت صوت سيارته طبكت
كيفت ورحت للباب
طب جوة
صادق:ياهلا برناوي
رنا:هلا بيك
صادق:اخبارج
رنا:زينه انتظرك تجي حتى نتغده
صادق: بسس حتى نتغده؟!
رنا:هههه
صادق:ههه
مسكني من حنجي خفيف
فات جوة
واني وسرى رحنا حضرنا الغده
صبينا وكلنا كعدنا.بس صابرين راحت تاكل بغرفه جده لان هي لي هس ماتحجي مع فراس وهو هم مايحجي معاها
صادق:وين نور
جده فطوم: فوك
صادق:سراب روحي صيحيها خلي تنزل
راحت سراب ورجعت
سراب :تكول ماريد
كام على حيله وصعد فوك
بعد دقيقه نزل وهي هم نازله وياه..بس جان حيل معصب ومخوزر منها
هو يريد من يكول شي تسوي حتى تكوم تخاف منه
كعدت تتغده ويانا.مااكلت بس قليل
خلصنا غده وغسلت المواعين.جنت واكفه عالسنك
شفت صادق وفراس يتسولفون وحدهم بصفحه
هم حسيت اكو شي بس اعرف من أسأله يجوز يثولها عليه
خلصت غسيل مواعين.عاد اجه وصاحني
رحت وياه للحديقه
صادق:اي وضعج امورج
رنا:,حيل زينه.. انت وضعك امورك
صادق:اني من عقدت عليج صرت بخير..امنت عليج يمي
رنا:شون يعني امنت عليه
صادق:يعني هس انتي موبس مرتي لا.اني اعتبرج امانه بركبتي
فهمت من كلامه ع مود اني يتيمه وماعندي احد هو هيج يحس تجاهي يعني مسؤوليه اكبر علي
رنا:اريد أسألك بشي
صادق:اسألي
رنا:شكو انت وفراس
صادق:ماكو شي سوالف عاديه
رنا:تمام
كاعد نحجي وندك الباب
صادق:يمكن جماعه اجو.فوتي جوة
رنا:ماشي
طبيت جوة.عاد نمت.كعدت العصر
جان صادق ماموجود هو وفراس اثنينهم طالعين
رجعو سويه المغرب ..وهم دايما الاحظهم يحجون حتى سرى حست
عبر الوكت وصارت الساعه ١١
جان الاستقبال بي زلم اوف شوكت يروحون.فرشت فراش وتمددت
اخذتني النومه.. حسيت بي يمي لان شميت عطره
صادق:ليش تنامين وماتنتظريني
رنا: والله راح ابتلي بجماعتك.ترا ديتاخرون هواااي
تعدلت شوي باوعت جده بعدها كاعده
رنا:امشي نروح للاستقبال
صادق: فراس كاعد
رنا:,هاا
صادق:لعد كملي نومتج كملي..اني راح الكي حل خما اضل انتظر فلان ينام لو فلان يروح
رنا:هه.. ماشي
صادق: نامي يروحي نامي
رجعت نمت
كعدت ع صوت بس ماعرف شنو الصوت
جنت لافه راسي جوة الغطه
فتحت عيني باوعت فراس شايل ابنه مع العلم ابنه نايم.وصادق يمه
وجده هستوها كاعده
صادق: ماكو شي يوم ارجعي نامي
اني مابينت اني كاعده
جده لحت عليهم وتحجي ويه صادق بصوت ناصي
جده:بس فهموني وين تاخذون الولد من الصبح شكوو احجو
صادق:بعدين يايمه بعدين
جده:والله ماتطلعون اذا ماتحجون الي الصحيح
مادري شنو كالو الها..بس شفتها لطمت على وجها......يتتتتبع