#ليته يعلم(أحببته منذ الصغر)

البارت٢٤

البارت٢٤
#ليته يعلم ( أحببته منذ الصغر)
ماحجيت ولاكلمه بقيت ابجي بحركه واشهك
صادق:الوو رنا
كمت سديته.رجع دك عليه ورفضته دك نوب وهم رفضته. دزلي رساله ع الخط(جاوبي)
دك نوب وماجاوبت
بقيت بفراشي ابجي لحد ماغفيت
كعدت الصبح ماجان عندي دوام رحت تااغسل عيوني مورمه من البجي
غسلت وألمي بادر ثلج لان الكهرب كل الليل طافيه شغلت الصوبه الكازيه  وانتظرته تصفى بعدين خليته بالغرفه.رحت للمطبخ خليت القوري ع النار
طلعت للحوش والكاع جلييد حتى العشب مشيب من البرد
يعجبني اضل اباوع على أغصان الشجر والحوش لان واسع وجبير.صار الجاي فتحت الثلاجه مابيها بس راشي(طحينيه) واني مو هالكد احبه .حضرت صينيه الريوك ووديتها ع الغرفه
كعدت علاوي حتى نتريك سويه.كعد وغسل خطيه المي بارد اجه كعد وياي
علي: البارحه خابرني فراس
رنا:هاا
علي:اي يسأل يكول شونكم شون وضعكم من هالسوالف
رنا:مرته هي السبب بكلشي نحسه بشكل وخبيثه
علي:اي هي الي سمعتني حجي .والله شوفي ولد عمي زينين مع الأسف ياخذون هيج نسوان
رنا:بس مرت علاوي زينه ....ايييه ايييه خليها سكته..
كملنا ريوك
علي:اني راح اطلع هس بلكي الكي شغل
رنا:بلكت يارب
طلع علاوي واني رحت اغسل مواعين الريوك
المي جان ثلج بالكوة غسلتهن.بعدين رحت جبت كارتونات الصوبات الي اشتريناهن
وخليتهن ع الشبابيك حتى مايعبر  البرد لان شباك المطبخ مكسور.
رجع علاوي الساعه ١١ ونص
رنا:هات لكيت شغل
علي:والله ماكو شغل بي خير هنا ..بس شغله وحده لكيت بس تعبها حيل جثير وفلوسها ماتصرف ابد
رنا:اووف وشون هس..زين شكد بقى يمك فلوس
علي:والله موكلش لازم الكي شغل... عالاقل اكدر اسحب خط مولده شي..هس كلشي مكدر اسوي
رنا:يلا انت دور بعد بلكي تلكي
علي:ان شاء الله
مر يومين والوضع هو ماهو
صادفت يوم جمعه والشمس طالعه
نضفت البيت وكنسته بعدين رحت اسوي غده جنت منكعه فاصوليا من الليل
خليت الفاصوليا ع النار وطبكت تمن.جنت مندمجه بالطبخ
علاوي جان بالغرفه شو فجأة طلع للطارمه يخابر اسمعه يكول
علي:ع ايدك اليسار...باب ازرك .....هيان جيت...طلع وفتح الباب

باوعت من الشباك شفت صادق وفراس
انصدمت من شفتهم وتخربطت كلشش ودكات كلبي تسارعت حيل وعركت رغم الجو بارد
طلع علاوي سلم عليهم وكال:استريحو...طبو جوة
باوعلي صادق وكال: شونج
رنا:زينه
فراس: شونج رنا شون وضعكم أموركم
علي: الحمد لله فوتو جوة....رناا جيبي مي وسوي جاي
فاتو جوة للغرفه..واني بعدني بالمطبخ انثولت كلش  حتى التمن شوي اشتعل طلعت ريحته  لان مانصيت النار
غسلت الطاسه نضيف وخليت بيها مي
رحت وديت المي تاانطي لصادق مدري شون جان طشيته علي.
علي:يمعوده لاتنكعينو بهالبرد
استحيت شوي رجعت انطيت المي لفراس
فراس:اي بعد اخباركم شجابكم هنا شفطنكم ع هاي المنطقه ليش استعجلت لو منتظرين
علي: والله زينين ...لا كافي واحد لازم يستقر هم انتو ماقصرتو ..رنا بقت يمكم هواي
اباوع على صادق  يباوع للبيت وحواجبه معقوده وموعاجبو الوضع
علي:وين الجاي
رنا:هس
فراس: مايحتاج لاتكلفون نفسكم شوي ونروح بس جينا نشوفكم ونسلم عليكم
علي:شنكلف نفسنا هو جاي. درينا يتامه وساكنين بايجار بس موالهدرجه ههههه
ابستم صادق وكال:وين المغاسل
علي:لي جوة ع ايدك اليمين..رنا دلي ع المغاسل
كام ورحت وراه..كتله هناك
بقى يباوع للبيت.
عرفت هو متعمد يكول هيج حتى بس يكوم يشوف البيت ويشوف الوضع
عفته ورحت للمطبخ تاصب الجاي جان بعده موصاير
جان يلحكني
صادق:ليش ماجاوبتي
رنا:ع شنو
صادق:من دكيت عليج
مارديت سكتت.
بقى يباوع للمطبخ وكال:متحمله الوضع هنا!؟
رنا:الي تحمل ضيم نسوانكم كلشي يتحمل
رفع حاجبه وكاال:صايره تعرفين تردين
رنا:اي عرفت ارد متأخر.لومن زمان اعرف جان سكتت جثير حلوك
صادق:لعد ليش مارديتي من دكيت عليج أكثر من مرة...
اسمعج تبجين وتشهكين .مخلتيني ابجيج ورحتي سديتي
خليتني كاعد للصبح مانمت ابد
رنا:.عبر شهر ونص ماسألت ولاخابرت ولا اي شي
صادق:اي صحيح ردت اعاقبج.لان سويتي البراسج.بس صدكيني ماعاقبت غير نفسي
رنا:تعاقبني على شنو.هو اني ماطلعت البيت لحالي.انحطيت بموقف نكسس وطلعت..بس ماتوقعت هاالكد انت قاسي وماتسأل
صادق: اييه اييه تحسبيني ماسأل ومرتاح .يمكن ماتصدكين اذا اكلج كل هاي الفتره اني مانام بالليل غير ساعتين بس ....ماتشوفين حتى من دكيتي كبل رجعت خابرتج
رنا: جده وصابرين خابرني وسألن احسن من عندك
صادق: لج شتحسبين اني موفطنان ترى كلشي اعرف حتى انتو بيا منطقه وبيا حي جنت اعرف
رنا: ومن وين عرفت
صادق:ماتسكتين بس.انتو رحتو لبيت خالكم يعني قابل وين راح تروحون توقعت هالشي
خابرت عماد... هو مورايح ويه اخوج يدورون عالبيت.كلشي كالي
رنا:اهااا
صادق: ترى اني مااحجي واسولف كلشي
رنا:ياريت تحجي...
صادق: الحجي الي مو بوكته زحمه كلشش ....
رنا:ليش مووكته
صادق:انتي تعرفين شي واني اعرف شي..
رنا:لوما دكيت عليك جان ماجيت اصلا
صادق:انتي تفكيرج محدود
رنا:هو انت ماترضى بتفكير احد اصلا
صادق: انتي تعاتبيني عالجيه لان ماجيت.ترى اذا عالجيه بس سهله. الشغله علكانه براسي
رنا: احجي بوضوح
ثولها ومارد جان يكول:جايج صار فحم
باوعت عود فعلاً صار فحم... راح للغرفة
صبيت ووديت الجاي الهم
علي:صار ساعه ننتظرج وبالاخير جايج ماينشرب
صادق:بس يمنا تعرف تسوي جاي
فراس:اي والله ....
صادق:يلا فراس خلي نتوكل
علي:عليش مستعجلين
صادق: لا والله مومستعجلين بس فراس عنده شغل.وهم تايودي مرته لأهلها
طلعو وطلع علي وياهم.واني اباوع من باب المطبخ عليهم
مابردت كلبي جيتو حمستني بزايد
مر الوكت وصارت الدنيا ليل
جنه كاعدين نتعشه اني وعلي.كلت لعلي يسحب راوتر بس كال مكدر اسحب اذا مالكي شغل لأن هاي التزام ولازم كل شهر ادفع
بيت العم سالم)الساعه ٧ مساءا
كاعدين يتعشون
جده فطوم: ها رحتو اليوم لرنا ولعلي
صادق: اي رحنا
جده فطوم:وليش ماخذتوني وياكم جان كلتولي ورحت وياكم حتى اشوفهم....زين شونهم زينين
فراس:هما زينين..بس مالهلكد وضع البيت..البيت بارد ويعوزه هواي شغلات
جده فطوم:اوف ياكلبي عليهم بعز البرد طلعو
اشتاكيتلها لهاي العجيه
نور:اصلا من راحت حتى ماضلت مشاكل
صادق:عساس انتن فقيرات لعد قبل شويه شنو هاي العيطه الكبت انتي ورحاب!؟
جده فطوم:والله من كثرت جناين البيت صارت المشاكل.اصلا هي مطيعه بس حضها فاين
صادق:موكتلج خلي ارجع لبيتي مجلبه بيه عليش
جده فطوم:خل يطلع فراس انت أبقى
رحاب:اي عمه اي انتي كل دكج عليه ادري بيج تكرهيني
جده فطوم:اني ماكرهج ولااكره احد بيكم.بس انتي ماتسمعين كلام وتسوين مشاكل
رحاب: مو لان رنا تركت البيت ترجعين علينا خلينا مرتاحين
سرى:والله خطيه رنا حبابه كلش اصلا
ولاء:انتي بس سكتي وين حبابه اثنينجن نفس الفهاوه
علاوي:فاهيه احسن من لسانها مترين
ولاء:ههههاي مدري شون جارعها انت ع هاي المياعه
صادق: عدلي الفاظج واحترمي الكاعدين
الساعه ٩ بيتنا المستأجر)
علي :رنا عندج رصيد
رنا:اي عندي
علي:انطيني بس اخابر شويه
انطيته الموبايل بعد شوي رجعلي اياه
عرفت عنده وحده يخابرها لان مرات أسمعه يحجي ع الموبايل ويه بنت
وره فتره هم دكت عليه جاوبتها وكالت علاوي يمج
جان نايم بوكتها كتلها اي نايم.فحجينا شويه اني وياها
حبيتها حيل وحسيته فعلا تحبه.هي ساكنه باربيل
الضاهر من جان هناك تعرف عليها
المهم مر كم يوم وعلاوي طلع يدور شغل بعدين راح على عماد حتى يدورون سويه
اني جنت بوحدي بالبيت صارت الدنيا مغرب
خابرني علاوي ويكول
علي:اكلج ترى اني بيت خالي وحالياً ومحجوزين
رنا: شنو محجوزين
علي:يعني اكو حظر تجوال ومعد نكدر نطلع .كل المناطق حظر
رنا:كل عقلك تحجي.زين شوكت يخلص الحظر
علي: ماعرف يكولون حتى إشعار آخر ....بس بلكي ينفتح المهم انتي سدي الباب زين ولاتطلعين
رنا:ماشي
ضجت كلش وقلقت بقيت الى الليل وحدي
طفت الكهرباء وشغلت ضو الموبايل.وشغلت الصوبه الكازيه هم.سديت كل البوب
وكعدت بالغرفه .كمت العب بالموبايل عندي لعبتين اضل العب بيهم
علاوي كل شوي يخابرني يطمن عليه
اني ماخاف من اكون بوحدي بس المشكله الكهرب جانت حيل موزينه واحنه موساحبين خط من المولده تطفي تقريباً ست ساعات وتجي ساعتين
تاخر الوكت وعلاوي ماجه فرشت فراش ونمت
كعدت الصبح كبل دكيت على علاوي
رنا:ها شونك...اخبار الحظر...ماتكدر تجي
علي:لج ياجيه ياجيه علكانه هي ناس تريد تطلع مضاهرات ومعرف شنو وسوو حظر محد يكدر يمد راسه حتى دوامات ماكو
رنا:يبوووو
سديته من عنده ورحت اسوي ريوك
طلعت تباوعت من الباب فعلا ماكو ولابشر
كعدت تريكت وبقيت احوس وانتظر
عود المشكله البيت موشل مابي كلشي
ردت اسوي غده مالكيت بس المرك مال البارحه
حميته واكلت منه..حضرت هدومي تااسبح
طبيت للحمام ع نص السبحه المي برد.طلعت ركض
بقيت يم الصوبه ارجف لحد مادفيت
بعد شويه سمعت صوت طلقات خفت كلشش
عبر الوكت وكلشي ماكو
كل شوي ادك على علاوي ويكول مانكدر نعبر
صارت ليل وطفت الكهرب كالعاده شغلت اللمبه ورحت تاااشغل الصوبه باوعت كازها خلصان باقي بس شويه
شغلتها وكعدت.بعدين كمت افتر ماعرف شسوي
وره ساعه شميت ريحه الصوبه باوعت لكيتها تريد تطفي لان خلص كازها
طفيتها ورحت تمددت بفراشي حسيت عضامي شوي توجعني لان اخذت برد من سبحت
نمت وكعدت هم كبل خابرت علي ونفس الشي
طلعت اباوع من الباب همرات وجيش منتشرين
الضاهر الوضع بعده موتمام
ردت اتريك مالكيت كلشي والثلاجه فارغه اي شي مابيها
بس موجود صمون
شربت جاي بوحده .نوب البرد معد يخلص وماكو لاصوبه ولاشي
رمش عليه علي رجعت دكيت علي :ها شونج شون وضعج
رنا:والله تعبان الوضع وكلشي ماكو انتظر الكهرب تاادفى
علي:زين اكلج ليش ما تخابرين صادق هو شوي عنده معارف بلكي يكدر يدزلي بكم شرطه اوشي حتى اكدر اجي
رنا:هاا ماعرف انت خابره
علي:ماعندي رصيد
رنا:والله ماعرف خل اشوف
علي:اذا مانفتح الحظر منا للعصر خابري .
رنا:ان شاء الله
سديته من عنده وكلت مستحيل اخابره تايكول هاا هم رجعتي تستعينين بيه.ولو ادري مايكول هيج  بس ماردت اخابره
تعبت حيل ومليت ونوب متت جوع كضيتها بس اكل صمون .صارت الدنيا عصر والحظر بعده
تمددت ونمت من سوء الوضع
كعدت على صوت الموبايل باوعت صادق رديت علي
رنا:هلا
رد عليه متعصب
صادق:هلاااا بيج.. ادري انتي بيييج شششي من اخوووج ماكو ووحدج بالبيت ليش ماخابرتينييي..يعنيي اله اخوج يرمش عليه حتى اعرررررف
رنا:واذا وحدي عليش اخابرك
صادق:شنووو واذااا لعد باقيه وووحدج وحال الضيم حالجج هييج احسن يعنيي
رنا:اي قابل شسسوي علي مايكدررر يجييي
صادق:اخوج لو بييي خيييرر مايكضيها فرات وعايفج وحدج
تعصبت وكلت
رنا:مووومكضيهااا فرااااات راح يدووور شششششغل
صادق:سبحاااااان الله الى تالي الليل يدور شغل
رنا: استغفرررررر الله
صادق:المهمممم شون وضعج هسسس
رنا:يعنيييي شوون وضعي ماكله ووووحل لا زقنبووووت لا كهررررب لا صووووبه لامي حاااار عيشت الجلبببب زييين
صادق:خرررررب ........ كتللللج لاتروحييين ركبتي راسسسج هاي تاليييهاا
رنا:لاترررجع للموضوع القديييم
صادق:اررررجع ونصصص اني اعرف هيج راح يصير اعرف راح تتبهدلووون تحسبووون المعيشه سوالف مووو والجايييكم اتعسسس بعد
رنا:بجهننننم شيصير بينا خلي يصيرررر عساس لحالي ومن كيفي قررت اروووح انت تدري زين شصاررر
صادق:الصار وياااج مو اسوووء من الوضع الي هس انتي بيييي..اخوج تبهدل وانتي تبهدلتيييي
رنا:ل. هسس عاااد كل مايصيررر شي تكليي صوجج
صادق:الحجييي الصحيح يزعللللج...يلااا بلكي هسس اشوف احد شيي حتى اجيج
رنا:لاتجيييي ماريددد مال نيتك ولامال نيه احددد ابدددد
صادق:اجييي وغصبااا عننننج واعرفي شتحجييين لااجيي اكسر راسسسج عااد
رنا:ايييي ماشاء الله بسسس هاي بقتتتتت
صادق:والله انتييي كاعدد تخوزكييينييي حييييل  تراااا
صار صوت طلقات هواي واحنه نحجي خفت كلشش
رنا: صوت طلقات هواي
صادق:لاتكفين يم شباااك ابدددد....هس هس اخابر وشوفلي احد
رنا:ماشي
سديته من عنده  وبقيت بفراشي وخليت غطايه وغطه علاوي حتى ادفى
بيت العم سالم) الساعه ١٠ مساءا
صادق: السلام عليكم......اكلك اريد مفرزة شي اريد اروح لمكان ضروري....اي عادي حتى لو ويه الجيشش المهم اروح ضروري.....اريد اصل لبيت وضعهم صعب هس بسبب الحظر.... تمام انتظر منك رددد
جده فطوم:ياابني الوضع موزين ليش تطلع
صادق:موبوحدي ارووح ويه العسكر ارووح
جده:انتظرر بلكي ينفتح الحظرر
صادق:شنتظررررر يوووووم البنيييه وحدها والبيت فارغ كلشييي مابيييي.
جده فطوم:لاحول ولا قوة الا بالله
اجت ولاء: وانت عليشش هالكد محرووك دمككك وتريد تروح بهيج ووووضع
صادق:اكللللج لاتدخليييين بهييج شغلاااات ابد..لااخلي قهرررري بييج
ولاء: ايييي مواني اصيررر مطبه من وره الحاله
جده فطوم:رووووحي لغرفتج لاتضلين تراددددين ..البنت بوحدها وحال الضيييم حالها شنووو ماعندج ضمييرر انتي
في بيتنا المستأجر)الساعه١٢ منتصف الليل
خابرتني جده
جده فطوم,ها شونج بنتي
رنا.زينه انتو شونكم
جده فطوم,والله احنه بالنا يمكم..صادق متعصب حيل وديخابر بلكي يلكي حل لاتخافين
رنا,ان شاء الله
سديته
باوعت موبايلي مابي شحن بسس ٤
طفيته ونمت.بس بالكوة نمت لان جنت ميته من الجوع
نمت وكعدت على صوت الباب يندك واحس اكو حركه
باوعت الساعه ٣وربع نص ليل ودنيا ضلمه لان كهرب ماكو
خفت كلش لاجيش أو مداهمه...خليت الشال على راسي
ورحت للطارمه وجانت تمطر الدنيا مطر خفيف باوعت ع الحايط..اكو همر يم الباب
متت خوف ..كام يندك الباب قوي
رحت فتحت الباب باوعت صادق
غير رجعلي دمي من شفته .يحجي ويه واحد ويكله : نزلهم هنااا تسلم ماقصرت ريسس
صادق: فوتي جوة تايفوت الولد ينزل الغراض
طبيت جوة الغرفه واسمع صوت هوسه وغراض
بعدين اجه للغرفه جان معكضض حيل ومخوزر حتى خفت منه
صادق:وين الصوبه
رنا:بره
طلع وطلعت وياه باوعت المطبخ مليان كراتين وعلاليك وجركان كاز .طلع الجركان وخله كاز بالصوبه
صادق:وين الجداحه
وديتله الجداحه وشغل الصوبه
صادق: روحي طلعيلج شي تاكلينه
رنا:ووين
اخذ العلاكه وانطاني اياها
جيبي الصوبه وتعاي اكلي بالغرفه
اخذت الصوبه للغرفه وكعدت فتحت العلاكه بيها دجاجه مشويه
عود اني ميته من الجوع جنت .اكلت اله ماشبعت وهو يباوعلي وبعده معكض
كملت اكل ورحت غسلت رجعت للغرفه
صادق:قبل ماتكعدين سوي جاي
رنا: انطيني موبايلك المطبخ ضلمه
انطاني موبايله ورحت للمطبخ اسوي جاي.اباوع للغراض جايب مسواك كامل
خدرت الجاي وحضرت الاستكانات
وديت جاي اله والي..
صادق:كعدي يم الصوبه
كعدت يم الصوبه وهو مقابيلي..
صراحه بوكتها جنت حيل فرحانه وشعور امان موطبيعي
بس جنت شوي مستحيه منو لان حجيت زايد بالاتصال
كعدنا نحجي جان حوار هادئ جدا
رنا:شلون كدرت تجي
صادق:رتبت الوضع وجيت
رنا: اشكرك حيل
صادق:ماريد تشكرين اريد بس تسمعين الكلام وماتعندين
رنا:صادق عفيه لاترجع تلومني
صادق:شوفي الوضع شوفي يعني هنا مرتاحه ؟زين اخوج مافكر لمن يلكي شغل ويروح..انو انتي راح تبقين بوحدج ؟!
احتاجيتي شي صار معاج شي .
رنا:زين اكلك اني طلعت بدون سبب؟! مو مرتك ضلت تغلط وتفشر وكطعت شعري شعندي ابقى شون راح اتحمل اباوع بالوجوه بعدين ؟
صادق: شوفي هاي سالفه الغيره مال ولاء مشكله وتعبر موفد شغله...اكو شغلات اكبر وأهم
رنا: يااكبرر بعد
صادق:مثل هس الصار موهذا اكبر. بوحدج ولااكل ولا دفو ولاكلشي
سكتت ماحجيت
رنا:اني موبس اخر مشكله خلتني أقرر اطلع.هواي صارت مشاكل وانت تعرف .اني حيل تاذيت هواي
صادق:لعد اني شكول
رنا:ليش انت شنو صار وياك كل الضيم براسي
بده يحجي بهدوء وحتى موكلش باوعلي من جان يحجي
صادق:تتذكرين من رحت للجامع بيوم الجمعه ومارجعت الى الليل من كلت اكو هواي امور براسي
رنا:اي اتذكر
صادق:من وكتها واني متلوع بيج
كلبي بده يدك عالرسيع
رنا:شون يعني
صادق:شفت الج رؤيه كعدت حلكي يابسس
رنا:شنو شفت
ماحجالي شنو شاف
صادق:من وكتها واني متلوع ..تفكيري كله انكلب
رنا: شتقصد صادق
صادق: هويتج اي هويتج
انتهيت من كالي هيج دكات كلبي موبس حسيت بيها سمعتها والله 💔..مارديت حتى
صادق: كلت معقوله انتي داعيه عليه حتى هالكد اتعذب بيج
جنت اسمعه وودموعي تنزل وهو يحجي .حجه كلشي بهذا اليوم
صادق: المشكله يارنا تفكيري بيج سبحان الله اجه بوقت صعب حيل وكانما الله يريد يضوكني الي انتي ضكتي
جانت المسألة ثكيله عليه يمكن هذا  جان اكبر اختبار مريت بي بحياتي 💔 حتى ولاء صرت مكدر...اندار بصفحه حتى ماكدر يكمل بعض الجمل
احس كلماته هزتني هزززز 💔.....يتببببع
بنات اعتذر كلش ع التأخير بس ضروف ودوام.ان شاء الله انزل بارتين باليوم