#ليته يعلم(أحببته منذ الصغر)

البارت ٢١

البارت ٢١
#ليته يعلم (احببته منذ الصغر)
رحاب :كومي كومي يلا تحضري راح يجونج خطابه
رنا:شنوووو ياخطابه
رحاب:تعاي لحكيني
تفاجئت من هالكلام ياخطابه يابطيخ
رحت للصاله جان واكف فراس وجده
فراس:اكلج رنا خابروني جماعه يريدون يتقدمون الج
رنا:منووو
فراس:بيت ابو سعود ابنهم سعود
جدة:اني ماهاالكد اعرفهم بس اعرف ام الولد
جنت بعدني مومستوعبه الحجي يعني فكرت الخطبه موابالي خلاص
رحاب:اي خوش ناس ماتلكون احسن من عدهم
فراس:من وين عرفتي خوش ناس هو اني ماهالكد اعرفهم
جدة: خلي يجي صادق وعلاوي هم نستشيرهم
صراحه ماعبجتني سالفه الخطبه ابد احس مووكتها خلاص
اجه صادق طب للبيت
جده:اي همزين جيت اكلك هذول بيت ابو سعود مخابرين على فراس يريدون يخطبون رنا
صادق:اي اعرف خابروني هم
باوعت علي وباوعلي بس ماكال شي
جدة فطوم: وشنو رأيك بيهم
صادق: بعد بعد اريد اسأل واتاكد
(اكول بكلبي اششتسأل اشتتتاكد💔)
فراس:كالو اليوم نجي.
صادق:وليش اليوم خلي نسأل ونشوف
فراس: عادي هس اخابرهم اكوللهم صبرو
رحاب:ليش تأجلونها خلي يجون واكعدو ويياهم
صادق: لازم افلام كارتون الشغله خابرهم فراس خلي يأجلون الجيه
فراس:ماشي
جده:وانتي رنا شنو رايج
رنا: مادري هو اني شفتهم عرفتهم حتى اكول رأيي
ولاء:لالازينين خوش ناس اني هم خابرت ماما تعرفهم تكول خوش ولد
احس هالخبر لخبط كلشي عليه.جنت مستقره وملتهيه بدوامي منين طلعت هالخطبه
مدري شون عبر هاليوم.حسبه تروح وحسبه تجي
ثاني يوم كعدت بساعه ٦ونص تااتحضر للدوام جانت الدنيا ضلمه والكهرب طافيه والجو غيم و بارد لان بدايه شته باوعت من الشباك الكاع رطبه لان ماطره بالليل
شغلت الصوبه الكازيه بالصااله وخليت الجاي ع النار
لبست هدوم الدوام وطلعت من الغرفه
باوعت صادق ديغسل هو هم عنده دوام جان لابس تراكسود اسود
صادق:شنو هالبردد
رنا:شغلت الصوبه بالصاله روح يمها
صادق:اي زين...سويتي جاي
رنا:اي
صادق:صبيلي بطريقج
رحت للمطبخ طلعت خبز و حضرت صينيه ريوك وصبيت جاي اله والي
خليت الصينيه يم الصوبه وكمت احمي الخبز ع الصوبه
كعدنا نتريك سويه
كامت تمطر قوي وصوت زخات المطر
وريحه الخبز من تحمص كلش طيبه
جانت أجواء حييل حلوة
جنت اباوع على تفاصيله وهو ياكل.بس ماحسسته ابد بهالشي جان شعور داخلي
تذكرت سالفه الخطبه وضجت كلشش
رنا:شنو رأيك باللي يريدون يتقدمون الي
بالبدايه سكت بعدين كال
صادق:والله يارنا موكلش عندي علاقه وياهم.هما شوي منعزلين .حتى استغربت من خابروني
باوع عليه ورفع حاجبه بطريقه سؤال
صادق: وأنتي شنو رايج
رنا: اني احس مووكتها واريد اكمل كلييه
صادق:اذا ماتريدين بكيفج
رنا:ماعرف والله ...انت شتكول ؟
صادق:ماكول شي حالياً الحجي الاخير يمج ولاتنسين هم كولي لاخوج...ايييه ايييه الله كريم
دك الموبايل باوعت صديقتي اللي بالاشتراك
رنا: الوو....ماشي هيان جيت... الاشتراك يم الباب
صادق: يلا توكلي لاتتاخرين اكثر
لبست البوت وطلعت.
صراحه جنت اريد تطول بعد هاي الكعده يعني السوالف وياه والاجواء حلوة
رحت لدوامي واخذت محاضراته
جنت أشوف البنات كله لبس غريب عجيب والضيك والمحتشم والقصير والطويل
اني جنت معتمده بلبسي على التنوره والسترات والتيشرتات .احب البس بنطرون وعلي ستره طويله للركبه بس صادق مايقبل
وكلها ماسكه موبايلات اخر موديل.
اني جنت استحي اطلع موبايلي كدام البنات لان نوعيته قديم.بس كلت ان شاء الله من يدزلي علي فلوس اجمع شوي شوي واشتري موبايل زين
رجعت للبيت وصلت الساعه٣.. الوضع هدوء
كلها نايمه رحت للمطبخ حميت الغده اكلت وصليت ورحت لغرفتي انام.
نمت وكعدت بالساعه ٦ تقريباً
جدة: اليوم يجون الجماعه....مخابرين على صادق يكولون خلي نجي ونكعد ويصير خير
توترت كلشش وضجت..
خابرت علي علي وكتله السالفه
علي:والله يااختي اذا خوش ناس وافقي اني اكلج وافقي
رنا:صدك تحجي
علي:اي صدك... أحسن من ضلتج أبيت عمي.اني اصلا جنت مقرر بعد فتره اجي واخذج من هنا
اذا خوش ناس وافقي واخلصي احسن الج
ضجت بعد أكثر من كلام اخوي.هو صح كلامه صحيح واعرف زين شيقصد بس مع هيج مومرتاحه جنت
باوعت ع البيت احسهم فرحانين ويريدون هالخطبه تصير
ولاء ورحاب ونور مكيفات وحتى فراس
صارت الساعه ٨ واني بالصالة كاعده اجه علاوي
علاوي: اجو الجماعه
احس كلبي يدك ع السريع حتى عركت
نور:صددك
رحاب:اي خوشش خلي نتباوع نشوفهم
كلهن مجتمعات عالشباك واني بالكوة اباوع
طبو رياجيل اثنين كبار بالعمر لابسين غتره وعكال وواحد شوي سمين لابس جاكيت وبنطرون وواحد ضعيف لابس بنطرون وقمصله جلد.فراس وصادق سلمو عليهم وفاتو للاستقبال
نور:اتوقع الضعيف هو الخطيب
رحاب وولاء كالن:اي هووو
نور:شون عرفتن هو
رحاب:قديم جان صغير يجي علينا شبيج بيت ابو سعود
نور: مادري والله
اجه فراس: حضرن مي وسسون جاي
رحاب:سويت سويت
نور: رنا ماسمعنا رايج لحد الان
رنا:مامقتنعه كلش
ولاء:لايمعوده بالعكس خوش ناس..انتي بس اكعدي ويه الولد راح تقتنعين اكيد
سراب:ماعرف اني اكول لوتكملين كليه وبعدين تزوجين احسن
رحاب:اي تريدينها تصير عجوز خلي تزوج كافي
سراب:رنا شكد صار عمرج
رنا: راح يصير ٢٢
رحاب:وتكولين صغيره الي بكدها تزوجن وخلفن
ولاء:اصلا هما يعرفونها تدرس وماعدهم اشكال
سراب:شدراج
ولاء:شنو شدارني مبينه ترى لعد من اجو خطبو قابل مايعرفون هي تدرس
بقيت افتر ومحتاره واريد شي ينهي هاي السالفة
طلعت للطارمه اشتم شوي هوى ...اوف شهالوضع شهاالحيره.اني ماريد ازوج بهاي الطريقه ابد.اني كضيت طفولتي وعمري احب شخص ودايما جنت اتخيل نفسي وياه صح هو تزوج وانتهى الأمر.بس كلبي مديتقبل فكره يكون شخص غيره بهالمكان.يمكن اني السبب لان حبيت زياده وتخيلت وتعلقت هواي.فحاليا الأمر عندي كارثي
من تاافوت جوة واني كاعد امشي انفتح باب الاستقبال باوعت صادق تايطلع
شفته وصفنت شوي علي وهو هم صفن بيه
اجه يمشي لي عندي
صادق:تعاي اريد احجي وياج
طبينا جوة وجانو العيله كاعدين بالصاله.هو من شافهم ماراد يحجي وياي كدامهم
صادق:لحكيني....طبينا لغرفه جدة
صادق: سمعيني.. إني ماعرف شنو رايج بالضبط..بس حالياً كاعدين نحجي وهما حسب كلامهم انو الولد زين ويصلي
وكاعد يلحون علينا هواي..اني سألت الناس عليهم اللي أسأله يكول نفس الحجي يعني موكلش اجتماعينين ويطلعون منعزلين شوي
اني كتلهم البنت تدرس كالو ماعدنا اي عارض...هما يريدون جواب
دنكت راسي وماعرف شجاوب
صادق:اذا ماتريدين كولي هس ارردلهم خبر
رنا:ماعرف
صادق:راح اكوللهم اسبوع ونردلكم جواب
هزيت راسي بمعنى تمام
راح صادق واجن كبل عليه
رحاب:هاا شكالج
رنا: يسألني اذا اوافق اولا
رحاب:وشكلتي
رنا:بعددد
رحاب:انتي كل عقلج
رنا:شبيج لحيتي قابل سوالف كبل اكول موافقه
بقيت افكر ومحتاره .
كمت اكول بيني وبين نفسي اذا اني مشكلتي صادق والحب
صادق مو الي خلاص خلي اتقبل هالشي
زين لعد شنو انتظر اني ؟!
بعد يومين يوم خابرني علي وكالي راح ادزلج فلوس.عود اني جنت اجمع حتى اشتري موبايل حديث
كلت لعلاوي يروح للمكتب يسحب الفلوس.سحبهن واانطيته الفلوس اليمي وكتبه جيبلي بيهم موبايل
اجه علاوي المغرب جايبلي موبايل حديث
كلش فرحت من شفته كمت اطك بي صور ومتونسه
علاوي:خلي ع الشحن حتى يمتلئ
خليته ع الشحن بالصاله
اجيت علي وره العشه .لكيته مليان كمت اكلب بي
صادق شاف الموبايل
صادق:منو جابلج الجهاز
رنا:علاوي
صادق:ومنيلج فلوسه
رنا: جمعتهم
صادق:شو انطيني خل اشوفه...... يعني زين بس موكلش نوعيته مضبوطه ....والله من نجحتي ردت اني اشتريلج بس التهيت
رنا:تسلم ماقصرت وياي بشي اصلا....رادو من عدنا نسوي حساب الفيس ع مود ينشرون المحاضرات بالكروب
صادق:ماشي هس اني اسويلج
سوالي صفحه
صادق:شنو تريدين اخلي اسم
رنا:امممممم زهره النرجس
صادق:والله خبصتنا الفيس كله زهور وووورد
رنا:هههههه لعد خلي بكيفك
كتب اسم(هدوء الفجر) وخله صوره هيج مثل الشروق بوقت الفجر
حيل حبيت الاسم.
علمني عالفيس وشون استخدمه وكذا
صادق:لاتوافقين ع كل طلب يجيج بس صديقاتج الي تعرفينها
رنا: ماشي
اجت ولاء وشافت من سوالي حساب
ولاء:اني هم سويلي صفحه
صادق:ماضروري
ولاء:ليش بله شو رنا عادي
صادق:رنا عدها دوام وتحتاجو.. اني اعرف هالشي
ولاء:ماعليه تسويلي
صادق:الله كريم
اخذت الموبايل وكمت اكلب بالفيس شكد حلو الصور والمنشورات جنت فرحانه كلش.باليل جنت اكلب بالصفحات اللي دازيلي طلب صداقه طلعتلي صفحته كاتب اسمه عليها واللقب ومخلي صورته وافقت ع الطلب بس ماتراسلنا
نور هم من شافت الموبايل والصفحه كالت اله اقنع بابا يشتريلي جهاز ويسويلي صفحه
ثاني يوم اجه فراس عليه وراد يقنعني ويكلي وافقي ومعرف شنو .حسيت رحاب هي كاعد تلح علي وتبعي براسه
جنت بالمبطخ
ولاء:انتي ليش لحد الان مارجعتي جواب للناس شمنتظره ؟!
رنا: بعدني افكر
تقربت عليه وكالت
ولاء: بشنو تفكرين..اللي ابالج راح شكو بعد منتظره هناا
رنا:هاي حياتي مالج علاقه انتي
طلعت وعفتها بس حيل انقهرت من عدها
بعدني بحيره من امري.. جان عندي فضول اعرف رايي صادق بالموضوع.رحت على صادق وكتله
رنا:انت شنو رأيك حابه اسمع رأيك
سكت وماجاوب..لاول مره تصير قضيه تخصني وأسأل صادق ومايجاوب
رنا:ليش ماتحجي شي
صادق:والله بكيفج انتي
قلقني كلش هالسكوت وزيد الحيره عندي
اني جنت مقررة انو مااوافق بس من اتذكر الصار وياي وحسيت كلهم يريدوني اوافق خصوصا الحيايه قررت اوافق حسيت نفسي مجبوره اوافق💔
(عندما نحتار كثيرا في أمر ما الضروف تقرر نيابه عنا)
رحت على صادق للاستقبال باوعت علي وكتله
رنا:خابرهم خلي يجون اني موافقه.بالبدايه صفن
صادق: متأكدة ؟
رنا:ان شاء الله
صادق:ماشي
طلعت من الاستقبال بس كلبي منتهي 💔
الحبايب فرحتهن وضحكتهن مدري وين وصلت لمن عرفن اني وافقت
ثاني يوم اجو واجه الولد وأمه وياهم
اني بس لبست فستان بسيط.وولاء ورحاب مكياج طوخ مخليات محتفلات
سلمت عليها
ام الولد: ماشاءالله ياربي كلش حلوة انتي واحلى شي بيج دمج كلش محبوبه
ابتسمت من كالت هيج
بقيت شوي كاعده وياها
بعدين اجه فراس وكال: حدينا المهر والولد راح يطب يشوفج وانتي هم شوفي واكعدي وياه
توترت كلش
طب الولد وكعد مقابيلي
باوعت علي..هو هم جان يباوع عليه
ضعيف واسمر .يعني كشكل موكلش حلو
سعود:انتي تدرسين مو
رنا:اي
سعود:ياقسم
رنا: كيميه
سعود:حلو قسمج
كعدنا شوي بعدين راحو
من راحو واني كلبي مومرتاح ابد.يعني ماجاني شعور طمانينه اوشي خلاص
رحت ثاني يوم للدوام بس احس نفسي بغير عالم
كلما التهي بالمحاضرات والدوام ارجع اتذكر كلبي ينعصر
بعد اسبوع اجه الولد تايشوفني ويكعد وياي
كعدت وياه بالاستقبال
سعود:شونج
رنا:زينه وانت
سعود:زين....انتي حلوة
رنا:شكرا
سعود:انتي ياقسم
رنا:كتلك كميه
سعود:هااا اي
ماعرف ليش حسيته مونضامي ابد ولا يعرف يحجي ومن يضحك سنونه ابد ماحلوات وعنده حركه كل شوي يسويها (يهز براسه)
سعود: ضليت افكر بيج بعد ماتحمل كلت اجي أشوفج
رنا:ايي
انفتح الباب باوعت صادق.من شافنا كبل سد الباب ورجع
سعود:يعني شون نبقى هنا
رنا:شنو يعني
سعود:اريد نكعد بغرفه وكون محد يفوت
رنا: مايحتتاج ... تقرب مني كلش
سعود:اصلا كلش يحتاج
وخرت عنه
سعود:شبيج ليش وخرتي
بقيت ساكته...
حسيت نفسي مخنوكه كلش
ماصدكت ع الله يروح حتى اخلص منه
رحت لغرفتي وجنت حيل مزعوجه
جده فطوم:هلا اخبار خطيبج.حجيتي وياه
رنا:اي حجيت بس بعد موكلش متاقلمه
جده فطوم:يلا شوي شوي تتعودين
وره يومين هم اجه.جان صادق ماموجود
لح عليه نكعد بوحدنا
كعدت وياه بغرفه جده
لزك بيه لزك موطبيعي وكل شوي يسوي نفس الحركه
سعود:عيونج حلوات
رنا:اي ادري
سعود:اقفلي الباب
رنا:ليش؟
سعود:هيج اقفلي
رنا:لا ماقفله
جان يكوم ويقفله
رنا: مايحتاج تقفله محد راح يطب
سعود: ميخالف هيج احسن
جنت اباوع علي واكول.اني عشكت منو وجاني منو
الفرق كلش جبير.صادق ثكيل وحلو ومرتب ونضيف بشكل ويعرف يحجي بالكعدات وآله كلمته وسمعته الحلوة وابتسامته بس تكفي💔
تقرب كلش وباسني من لحكيي
دفعته قوي
رنا:وخررر عني
سعود:ترى اني خطيبج ومن حقي
حسيت لعبت نفسي منه
معد اتحمل كتله راح اروح للمغاسل
رحت للحمام وسديت الباب.وكمت ابجي بحركه اوف ياربي شجابه هذا عليه اني شورطني
طلعت من الحمام وعيوني مورمه باوعت صادق بوجهي
دنكت راسي ورحت للغرفه
سعود:تاخرتي عليه....
رنا:ااييي
ضجت منه اريده بس يروح من كام تايروح كيفت طلعت وياه للباب.رجعت وصادق صاحني وكال
صادق: اكعدو بالاستقبال مايحتاج بالغرفه
كلت بداخلي عساس اني رايده ومكيفه
سديت باب غرفتي وكمت افكر اكول اذا هس بس باسني هيج لعبت نفسي شون اتحمل الزواج منه.. ماكاعد اتخيل هالشي ابد.
جانت كلش صعبه هاي الفتره عليه عبالك بكابوس الليلي ليل ولانهاري نهار
كل يومين يجي سعود.
صادفت بيوم اجه وكعدنا بالاستقبال
هم لزك بيه
سعود: نروح الغرفه يلا
رنا: لا ماروح
سعود:ليش
رنا:مايقبلون البيت
سعود:ليش بله اني خطيبج عادي ترى
رنا:هما مايقبلون واني اسمع كلامهم
طبت رحاب بيدها صينيه بيهاا شربت وكيك قدمت النا
رحاب:هلا اخباركم ان شاء الله مرتاحين
سعود:مرتاحين مرتاحين.
تااطلع وكالت
رحاب:يلا اخذو راحتكم
سعود:ياراحه هناا مخلينه بالاستقبال كل شوي واحد يطب نريد غرفه
رحاب:ههه والله صحيح.رنا روحو لغرفتج اكعدو شعندج هنا
رنا:هااا لا مايحتتاج
سعود:موتكولين البيت مايقبلون.طلعتي انتي
رحاب: مايصير يارنا خطيبج يريد ياخذ راحته وياج.يلا كومي لغرفتج
سعود:يلا امشي بعد أحسن
لحو عليه وخلوني اروح الغرفه
اول ماطبيت جان هم يقفل الباب
تقرب مني جان يمسك صدري
رنا:وخرر ايدك
سعود:ماوخر وبكيفي وشريد اسوي
رجع نوب مسكني.
رنا:كتلك وخرر ايدك
سعود:ماشي ماشي..اول وتالي راح نزوج واسوي بكيفي
عذه شكد مكروه ومايفكر ولايسولف بس بهاي الشغلات
جنت اريده يروح حتى ابجي براحتي
لمن راح طبيت لغرفتي وقفلت الباب.وضليييت ابجيي لحد ماهلكت
صارت الساعه ١ تقريبا وكلهم نايمين واني بعدني مونايمه وعيوني مورمه من القهر
كمت اكلب بالموبايل جان اشوف صادق نشط..راسلته ودموعي تصب
دزيتله لايك وكتبت:وين انت
ردلي:بغرفتي .ليش
رنا:اريد احجي وياك
صادق:راح اروح للصاله تعالي
باوعت بالمرايا عيوني حمر شحالهن
رحت للصاله لكيته كاعد..باوع عليه
صادق:شكوو ليش عيونج حمر
رنا:عفيه ماريد
صادق:شنو ماتريدين
رنا:ماريد ازوج عفيه..سوي اي شي بس عفيه خرب الخطوبه......يتببببع