မေမေ့ဆိုင်ကိုလာရင်း အန်တီ့ဆိုင်ဘက်ကိုဝင်လာခဲ့လိုက်သည်။ ကိုနေအိမ်ကထွက်သွားပြီးကတည်းက အန်တီ့ဆီကိုမကြာမကြာဝင်ထွက်ပြီး အဖော်ပြုပေးနေရသည်။
ကျွန်တော်တို့မိသားစုရဲ့ ကံဆိုးတဲ့နေ့ရက်တွေအပြီးမှာတော့ အန်တီတို့ဘက်ကတစ်စခန်းထလာသောကြောင့်
အတော်ဗြောင်းဆန်ခဲ့တဲ့နှစ်တွေလို့ ဆိုရပါတော့မည်။ မထင်မှတ်ပါဘဲသိလိုက်ရတဲ့ကိုနေ့အကြောင်းက ဆွေမျိုးအသိုင်းအဝိုင်းကြားမှာရှက်စရာတစ်ခုလိုဖြစ်သွားခြင်းကြောင့် မိသားစုအတွင်းပြဿနာများစွာတက်ခဲ့သည်။
အိမ်ကနှင်ချခြင်းခံရတဲ့ကိုနေကလည်းပြတ်ပြတ်သားသားကိုရွေးချယ်သွားနိုင်သူ။ ကိုနေ့ပုံစံကိုကြည့်ပြီး ဒီလောက်ခေါင်းမာလိမ့်မယ်လို့မထင်ခဲ့တာကြောင့် အမျိုးတွေကြားတော်တော်ဂယက်ရိုက်သွားခဲ့တာပေါ့။
အဖြစ်အပျက်တွေကြားသိခဲ့ရတဲ့ကြီးကြီးကတော့ ရင်ဘတ်ကိုတီးကာဖြင့်နှုတ်ဝဋ်လည်တာဟုပြော၍ ငိုပါတော့သည်။ မင်းထက်နိုင်ကိုကဲ့ရဲ့စကားဆိုခဲ့မိလို့မှမကြာ တူဖြစ်သူကလည်းဂေးနေပါတယ်ကြေငြာတော့ ဝဋ်လည်တာပါလို့ပြောပြောငိုခြင်းဖြစ်သည်။
ကြီးကြီးကိုကြည့်ပြီး ကျွန်တော့်မှာလိပ်ပြာမလုံနိုင်ပါ။ ကျွန်တော်ကရောဘာထူးလို့လဲ။ လူမသိသူမသိကွဲကြေနေရတဲ့နှလုံးသားက မျိုးတူယောက်ျားတစ်ယောက်အတွက်ဆိုတာကို မသိကြသေးလို့ပါ။ သိများသိသွားရင် ကြီးကြီးသေများသွားမလားရယ်တွေးပူမိ၏။
"မင်းအစ်ကိုနဲ့ရောအဆက်အသွယ်ရရဲ့လား"
"ရပါတယ်၊ အမြဲမဟုတ်တောင်ဖေ့စ်ဘွတ်ကနေသူဘာလုပ်တယ်၊ ဘယ်သွားတယ်ဆိုတာကိုမြင်နေရတာပဲ။ ကိုနေကအဆင်ပြေပါတယ်၊ အန်တီသာနေကောင်းအောင်နေ၊ ကျန်းမာရေးကိုဂရုစိုက် သိပ်ပြီးစိတ်ပူမနေပါနဲ့"
"သားကိုမေးရဦးမယ်၊ မင်းအကိုမှာချစ်သူတွေဘာတွေရှိနေပြီတဲ့လား။ အန်တီသိချင်လို့ပါ"
"အဲဒါတော့ကျွန်တော်လည်းမသိဘူးအန်တီရဲ့၊ ကျောင်းတုန်းကလည်းဘာသံမှမကြားမိခဲ့ပါဘူး။ တွဲသွားတွဲလာလည်းမတွေ့ဖူးသလို ရှိတာလည်းကိုသွေးသစ်နဲ့ပဲရှိခဲ့တာလေ"
ВЫ ЧИТАЕТЕ
ဆုံစည်းခွင့်
Любовные романыစစ်မှန်သောချစ်ခြင်းတရားတိုင်း ဆုံစည်းခွင့်ရှိစေ။ #Firstlove #Boy Love #Romance #Drama #Complete (Unicode)
