كواكب امي

الجزءالثاني_البارت الاول

مساء الورد
البارت اليوم راح يرجعكم لداخل بيت ليلى راح نستذكر طبيعة وشخصية كل كوكب من كواكب ليلى
اتمنى اكون كدرت ادخلكم واعيشكم بأجواء هذا البيت المليان بنات المليان دفو وحنية وسوالف حلوة🖤
احبكم

#كواكب_امي
الجزء الثاني-البارت الاول

لو جئتَني لوَجدتني
سحباً تراكم دمعُها
ويكادُ يهطُل
في ثنايا احرفي
لو جئتَني لوَجدتني
يعقوب اعماهُ الفِراق
وليسَ غيركَ يوسفي

2009
بعد الفاجعة ب 5 شهور ،مثل ما كلت قبل
ايقنت ان محد يموت ورى احد ،بس اكو جزء من روحنا هو الي يموت وينفقد
اكو اشياء تطفى ،لمعة عينا ،اللهفة،الفرحة الكاملة،الضحكة من القلب ،حب الحياة وهواي شغلات بعد
كلها راح تطفى وتزول
ونبقى عايشين عالهامش ،مجرد نواكب الايام ونتماشى وياها لان الي انطه الروح هو الله تعالى حتى لو تعبنا وملينا منها راح نبقى ننتظر الي انطاها هو ياخذها بس كلشي بوقته وكلشي مكتوب ....

الغرف الي بناهم ابويه فوك جانت عالاساس وحده لامير اخويه ووحده للبنات لان الغرفة الجوة ما تكفيهن ما شاء الله هن اربعة

بس بعد موت رائد ورجعتي لاهلي غرفة امير صارت الي اني وجهالي محمد واكرم واسيل
اسيل الما شافها ابوها ولا خلاها بحضنه ،،
اكبر واحد بيهم حمودي عمره خمس سنوات واكرم على راسه واسوله عمرها شهور.

بدلت للجهال الضهر ولميت الغرفة
عدلت فراشي وسحبت التيشيرت مالته من جوة المخدة جان من ضمن غراضه الي رجعوهم من الخارج ويا جنازته ،
اخذوهن كلهن مني بذيج الايام الي جنت بيها بدون عقل ولا وعي
جان الجنون مسيطر عليه ،حاولو بكل قدرتهم يطلعوني من الحالة الجنت بيها اخذو غراضه مني وعبالهم هيج راح يقللون من حرگة گلبي الي صار رماد وما بقى بي ركن صاحي

بوقتها بس هالقطعة كدرت اضمها جوه ملابسي
وادفنها ويا روحي وكل ليلة تكون هي مرجعي وهي ملاذي الوحيد
حتى لو ريحته خفيفة بيها ،يكفيني هي شي منه واني اتخيل عطره وروحه بيها ،

لزمتها بيدي وشميتها بقوه
عن اي قوة احجي واني جسد خاوي ،وروح معلكة بگشه ،نزلت دمعتي واحس حتى الدمعة يابسة ومخزون الدمع عندي خلص وانتهى ..

مسحتها بطرف اصابعي وضميت التيشيرت بالكنتور بالخانة الفوك حتى لا يشوفوها خواتي ..
حسيت بأيد حمودي لزم دشداشتي وحجى

حمودي: مال بابا هاي ؟!

شمس: باوعتله بعيوني الحمرة والي حتى جهالي تعودو عليها
ابتسمت بوجع ورديت
اي حبيبي مالت بابا حبيبك

حمودي: شوكت يجي هو ،صار هواي هواااي اني ما اشوفه
يحجي ويأشر بيده

شمس : اصعب شي ان رغم الوجع البيك وانت تحاول تقنع بطفل وانت حتى روحك ما مقتنعة بالفراق ،جريت حسرة ورديت بحسرة اكبر