كواكب امي

البارت الاول

مساء الخير والحب والورد عليكم حبايب قلبي 🖤
رجعت وياكم برواية جديدة
روايتنا اجتماعية يعني من احد بيوت عراقنا الحبيب ،وتعرفون اسلوبي بالكتابة احب اذكر كل تفصيل بشكل مرتب ومتسلسل
حتى لو جانت الاحداث ببعض البارتات تحسوها مملة ،اكيد مو كل البارتات راح تكون اكشن وقهر او فرحة لان هاي حياتنا وهاي بيوتنا
كلشي تتضمن وكلشي بيها

واني من اختاريت هالرواية اختاريتها لأجل كل تضحية بيها وكل عبرة ناخذها من ام او اخت وكل صبر نشوفه من ابطالنا وكل غلطة تخلينا نتعلم منها وحتى تساعدنا نشوف المقابل بنظرة مختلفة ،

ومثل ما اتفقنا الرواية بين يوم ويوم ينزل بارت ،وهاي اول مرة راح اعقد وياكم اتفاقية 🙈والي هي
كلما تعبر الرواية ١٠٠ الف مشاهده اعتبروا نفسكم تطلبوني بارت هدية🙈شفتو اني شكد بسيطة لا طالبة منكم ملايين ولا ابد 🥺وحتى التصويت هم بقى يمكم ويم حبكم الي🖤

وهسه اكلكم اسفه طولت عليكم ،ومتابعة ممتعة اعزازي😍
احبكم ..

#كواكب_امي
للكاتبة روشان

البارت الاول

تغير كل ما فينا ...تغيرنا
زمان كان يسعدنا نراه الان يشقينا
وحب عاش في دمنا ،،تسرب بين ايدينا
وشوق كان يحملنا ..فتسكرنا امانينا
ولحنن كان يبعثنا ...اذا ماتت اغانينا
تغير كل ما فينا ....تغيرنا
.
.
.
صوت الديج يرن بالاذن مادري هذا بالحقيقة لو بالحلم ،
اذا هو صوته من كد ما عالي حتى بأحلام الصبح يفوت
نايمه ومخليه ايدي على اذني وراسي وضاغطتهن حيل حتى لا اسمع الصوت بس بعده يرن

كمت من نومتي بضوجه وملل باوعت الساعه ب٥ الا ربع ،،صحت بنتره ونفخه
اويييييلي على هالصباااح ،شلون وياكم شلووون !!
بعد شويه وجيبو الديج بحضني

فزت اختي امينه الجانت نايمه بصفي وهي تباوعلي بقلق

امينه : شبيييج من الصبح تصيحين !! انتو لا مريض يرتاح يمكم ولا صاحي
انا الا اموت يلا اخلص من هالهوسه

ليلى: انجبي انتي الخ ،لعد اني المرتاحه ،هاي امج خليها تخلف وتذب واني ابتلي ، باسم طلع روحي كلساع كاعد بليل ولا جن عمره سنه
تكولين ابن نفاس ويتعزز علينا،
وفوك القهر ويا طر الفجر يبدي الديج يصيح ابن المنتوفه
اليوم الا انتف ريشاته وحده وحده ،

امينه: حتى ابويه ينتفج وراه مو تدرين روحه بي ،،
وانتي كافي سكتي فدوه لعينج رحت
خل ارجع اشبع نوم واستغل الفرصة اليوم محد يكعدني لان مريضه ،

ليلى: جنا نايمات بالحوش الصغير ،اني وخواتي واخواني الصغار
واحنا جاي نحجي طبت علينا امي بسرعة والقلق مبين عليها
وكالت ..يلا كعدددن بسرعة بسرعة ،
حجتها واندارت على اخواني وصاحت ..اكعد جعفففر