كواكب امي

البارت التاسع عشر

مساء الخير حبايبي 🖤

#كواكب_امي
للكاتبة روشان

البارت التاسع عشر

خــــيطلــك
بشــــر تفصــــال

هاي
النــاس مــو #ثوبــك
.
.
.
شمس:العصر من نزلت سمعت سناء
تحجي عليه بالتلفون الارضي ويا مرت اخوها الجبير

وتكلها (خل تولي هاي شنوو ههههه؟!! غير خبلتهم اليوم
حتى رائد خله وطلع ما بقى يمها
مادري اشايف منها شكد عنودي هو ،،،
كتله اني اشوفلك وحده
وهو چلب الا هي ....)

فارت اعصابي واني اسمعها
وبقيت بقصد واكفه اتسنط
اريد اعرف ويامن اني عايشه
وشنو هالبشر الما يوكف بعينه طيبه ولا خاطر لاحد

هسه حتى لو ما حبوني بس جان
عالاقل خلو رائد كبال عينهم ،جان كالت
لخاطر اخويه ما احجي على مرته
لان هو يحبها وجاي يشوفون حبه ودلاله الي
بعيونهم

بس نسيت ان حب ودلال رائد الي
هو الي حاركهم بتيزاب مو بس بنار

واكفه اسمع جان التلفون الارضي
مخلي بالصالة
واني واكفه ورا الباب واسمع
وهي مستمره بحجيها وضحكها والثانيه
ماعرف شترد عليها بالتلفون

واني واكفه صارت وفاء اختها الصغيرة
بوجهي شافتني واكفه اسمع
واني اعصابي فايرة ،هي شافتني رافعه حواجبي
بغضب وعفتها ومشيت

ورايه سمعتها تحجي لان فاتت للصاله بسرعه

وفاء: ولج سناء شجنتي تحجين ترى هاي شمس
يمكن سمعت كلشي

سناء: ويطبها الف مرض ،عساها سمعت

شمس: من حجتها ،حجت بصوت عالي متقصدة
تسمعني ،واني هم خليت وصعدت لغرفتي
بيومها بعد منزلت جوة وكضيتها اكوم
منا اكعد هنا وبس الوب
لان عالحجي السمعته والحقد والغيرة
حتى التقلصات مال حمل زادت عليه

للمغرب من رجع رائد هو صعد لكاني
متمددة والضوة مطفي
شغل الضوة وفات للغرفة على كيف عباله نايمه

واني كعدت

رائد: ها حبيبي كاعدة
مو كلت مو عوايدج تنامين هيج وكت !!

شمس: ابتسمت ،هزيتله راسي بثكل
اي كاعده بس هيج متمددة جنت
حجيتها وكمت طلعتله ملابسه حتى يسبح
ومابينت على وجهي اي شي حتى لا يبقى يسأل
وماريد اسوي مشاكل
هو ميستاهل شلعان الگلب من وراهن

مدد عالجرباية هو بسرعة مبين تعبان على ضايج
اكيد سالفه الضهر ومغثتها بعدها بباله
رحت يمه كعدت
لزمت ايده وكمت افرك بيها وحجيت

شبيك حبيبي ؟!
رائد: ماكو شي حبيبتي بس اليوم تعبان شويه
لان نزلت البضاعه وحدي
شريكي جان طالع ،،