كواكب امي

البارت السادس

#كواكب_امي
الجزء الثاني-البارت السادس

و إنتظرتَك
بين صَفنات ألليالي
و جَرح دُخان ألجگاير
و بين لچماتي و حَسرتي
و حيرتِي و كَسرة ألخاطِر
و بين مدري .. و وين صاير؟
و إنتظرتَك ..
هلبت تمُر بية طَيف
إيضمضُم دموعي أعلى باچر .
.
.
نجمة : مر اسبوع على وفاة الحجية الله يرحمها ويجعل مأواها الجنة
من يوم الفاتحة بعد مالي واهس ادخل لبيت حمايه وهي ماكو،،احسها مثل الضوة الجان منور البيت كله
وهسه خلافها وين ما انطي وجهي ببيتهم الكاها ضلمة ،،

واني ما معاشرتها غير هالسنة وكم شهر شحال ولدها وبناتها ،شحال حمزة المدلل مالتها
حمزة الي جان ما يفوت لبيته الا بعد ميروح يشوفها ويبوسها من راسها ،

وهسه هو من يوم الماتت لليوم اللكمة بالكوة تفوت لحلكة وصوته ما نسمعه لو يحجي كلمة كلمتين باليوم لو لا ،ومكضيها بس نايم بالغرفة وعازل روحه عنا ،حتى من جانت الفاتحة حمايه يكول العالم تطب للجادر وتطلع وهو كاعد بمكانه عيونه صايره دم وفاقد رايح بغير عالم ميدري منو اجه ومنو راح ..

بوقتها امي وخواتي ما تركوني ابد ،يوميه تجي امي من الصبح للفاتحة وتجيب وحده من خواتي وياها حتى يساعدوني لان اني وام زين بس الي جنا بالمطبخ وكل المسؤوليه علينا حتى لو هم جابو طباخ يطبخلهم بس لازم نجيب ونودي،فجانت امي يوم تجيب شمس ويوم ثريا يساعدوني وبالثالث جابتهن ثنينهن لان خالتي جميلة باقيه يم خواتي البقيه ببيتنا ..

وضع حمزة وسكوته جان حيل يخوفني جنت ما اكدر افوت للغرفة لو احجي وياه
لان ماكوعلى لسانة غير كلمة (عوفيني وطلعي )مهما حجيت وحاولت وياه اصلا مينطيني مجال للحجي ..فجنت بس بالليل اكدر ادخل للغرفه يعني بس وقت النوم ،

جنا بشهر الثاني 2010 ،الجو بارد كلش والهدوء يعم البيوت كلها بتالي الليل ،سمعت صوت شهكات خشنة ومبلوعة اول مرة اسمع شهكات رجال
حسيت گلبي انعصر عصر ومابقى بي ولا قطره دم
بداخلي اكول شنو من تعلق متعلق بيها حتى يوصل هالحالة ،
اول مرة خلال الاسبوع الفات كلة اسمعه يبجي بالليل لان اخر مرة بجى بيها من جانت جثتها كباله ومن يومها بعد ما نزلت دمعته
حسيته متحمل طول هالايام الفاتت،

بداخلي صوت يكول مراح احسسه اني كاعده حتى يبجي ويرتاح ويرجع صوت ثاني يمرد بگلبي ويكلي لتعوفي ما اتحمل اسمعه هيج ..
نزلت دموعي اني هم من وجعي على صوته وحالته كعدت من نومتي واتربعت يمه عالجربايه وهو جان نايم على صفحته ومنطيني ظهره
مسحت دمعتي بأيد وايدي الثانية راحت بدون وعي اتخلت على جتفه وكانما گلبي هو الي يتحكم بيها
وحجيت
حبيبي باوعلي فدوه ،حمزة لتكلي عوفيني هالمرة لو طردتني الف مرة ما اعوفك اليوم
اندار خليني احاجيك ،واذا ما تندار عليه اني اجي كبال عيونك

احجي وهو ساكت ما سوه اي رده فعل غير اختفاء صوت البجي مالته
كمت نزلت من الجربايه واتحولت صرت كباله
الغرفة شبه ظلمة كعدت على ركبتي مقابيله وايديناتي ثنينهن اتمسكن بجف ايده مثل الطفل من يجلب بيد امه بتوسل ..حجيت بغصه