كواكب امي

البارت الخامس عشر

عودة لاحلى متابعين من بعد غيابي بسبب حالة الوفاة 😘
اشكر دعواتكم وكل كلمة كلتوها حبايب قلبي ربي لا يحرمني منكم
وهذا احلى بارت لعيونكم راح يكون بارت مريح ورومانسي من الي يعجبكم 🖤وطبعا ما معدلتة بعدني
احبكم

#كواكب_امي
للكاتبة روشان
الجزء الثاني _البارت الخامس عشر

🍃

غفله عافونه ونسو هنيالهم
صايرين ..ولا نمر ابالهم
چنه احنه ..مو دمع بعيونهم
طيحونه ..وجابو اليردونهم
بعدونه ..وچنه مثل خيلاهم!
.
.
ثريا:بعد ما جابلي الموبايل باسبوعين رجع يحوص يريد يشوفني ،واحنا ابويه قافل على هالسالفة ابد ماعنده بيها تفاهم ..اخر شي جاي نحجي مكالمة وكال
زين :احجي ويا امج وهي تدبرها

ثريا : يمعود شحجي والله استحي ،يعني اروح اكوللها زين يريد يشوفني ؟!
زين : بت الاوادم شنو صاحبتي انتي !!!حتى تستحين ..ليش تخليني افور ،غير رجلج انيي كدام الله والناس كلها
اذا يعجبني هسه اجي اخذج من اهلج وشحده اليحجي ويايه ...
ثريا : شبييك هسه اني شكلت يا حبيبي بس اكول خاف عيب من امي تكول انطيتهم مجال مرة انوب انجلبو علية

زين: والله ما مچلوب الا انتي ..شو صايره هواي تمسلتين بالحجي ،راح اسكت هسه بعدين اعاقبج ،،وروحي حاجيها فد شويه ،ترى امج خوش مرة وتعرف الحق عدل ..وهذا حقي عليج مرتي انتي وحلالي شوكت ميعجبني اشوفج اشوفج ...
ثريا : ماااشي ماشي راح احاول احاجيها ،اويلي عليك من تريد راده الا تسويها ...ضحك بنبرة خباثة وكال
زين : متشوفيني اخذتج
ثريا : اممم خلف الله عليه قبلت بيك
زين : هو شوفي لو اني لو جان بقيتي مكابله امج وابوج العمر كله
ثريا : وليش يابه !!
زين : اليوصل عتبة بابكم يطالب بيج ،ارجعه زحف لاهله ،،وبعدين سدي هذا الموضوع الماصخ اضوج حتى من افكر بي ،هسه المهم انتي المن صرتي ؟
ثريا : انسرد حلكي كله بالابتسامة ورديت ،لحبيبي زين
زين : فدوه ونذر لكل حرف فاهي طالع من لسانج
ثريا:بقيت مبتسمة وساكته مادري شرد عليه
شويه وحجى
زين : اني ادري بيج صح ساكته هسه بس بملامح وجهج الكه كل الحجي ،،متشوفين ارد اشوفج حتى اسكي روحي اليابسة واني اشوف ابتسامتج وزروف خدودج الحلوات

ثريا: هههه هاي شوكت صار اسمهن زروف !!!
زين: اني اسميهن زروف لان زرفن گلبي زرف ..
ثريا: اسم الله على گلبك حبيبي ،شوكت تروح لشغلك
زين: هسه حبدل واطلع للصيديلية وروحي انتي حاجي امج حتى اذا قبلت اجيج مناك للبيت .

ثريا : اتفقت وياه احاجي امي بس اني مستحيه منها ماعرف ليش ،كلت احسن حل احاجي شمس وهي الي تكوللها
صعدت على شمس جانت ضهرية والكل نايمين
فتحت الباب بدون ما ادكها لان عادي احنا كخوات متعلمين على هالشي بس امي ميدخل علينا الا يدك الباب

من فتحت الباب هي فزت وجان بيدها شي و ضمته جوه مخدتها بسرعة وكعدت من نومتها عدل جانو جهالها نايمين
اتقربت يمها جانت تحاول تبتسم بس احس الابتسامة جداً صعبة عليها بهاللحظة
كعدت بصفها ،اباوع عليها بقلق ...شبيج ؟