كواكب امي

البارت الرابع والعشرون

صباح الورد على احلى ورود 🖤

#كواكب_امي
للكاتبة روشان

البارت الرابع والعشرون

عن يا دمـــع
عن يا بــچي
عن يا حجــي
عن يا سوالف غافيه 🍂
مغـــيم وامطر قـهــر
من ضيــمي اكتب شـعــر
وكـ يا شـعــر
ما بــين سطر و سطـر
كلمـــاتي تطـــلع حافيه
.
.
شمس : بعد كل كلمة طلعت منه
اختاريت السكوت ..
اختاريت الم باقي اشلائي الي طشرهن بروده
الم كلشي بيه وابتعد

ثاني يوم من رجع من شغله الضهر اتغده ونام
للعصر اني جنت مجهزة كل غراضي
نزلت على خالة نجية كلت الها راح اروح كم يوم لاهلي ..

نجية: ليش يمه شعجب ؟! اول تالي ترحين وتبقين
هو انتي حتى بيتوته ما تباتين عدهم ،،

شمس: درت عيوني عنها وجاوبت والحسرة تارسة حسي لان اتذكرت شلون جان ميخليني حتى تبات يمهم ويكلي ماكدر انام بدونج ..

مو قنعت رائد وكتله مشتاقه لخواتي وهو قبل ابقى كم يوم يمهم ،،

نجية: ديلا شعندج ...عود سلميلنا على امج والبنات

شمس: يوصل عمة
كمت من يمها صعدت فوك لكيت رائد كاعد من نومه
كعدت الجهال بدلو وبدلت اني وطلعنه وياه بالسيارة ..

الطريق كله ما حجى ولا كلمه
واني انتظر منه وكلساع اكول راح يحجي وراح يكول
لتتأخرين عليه حبيبي
ويكول خابريني بليل اجي اخذج

بس جان مجرد انتظار مني ومجرد تخيلات
وصلنه للباب ونزلنا وهو بدون اي نفس
دار السيارة ومشى
بقت عيوني وراه واعاين عالدرب لما انفتحت الباب ودخلت

اتلكوني امي وخواتي
وجانت بس قمر تعرف بوضعي
والكل عبالهم جايتهم زيارة عادية
الجهال ملتهين يلعبون سوى وخواتي كل كعدتهن ونومتهن سوى لان ماعدهم بس هالغرفة

وكلما قمر تريد تحجي بالموضوع تجي وحده منهن ،،لحد ما اشرتلي بسكوت كالت تعالي فوك
اريد اشر هدوم الجهال

صعدت بيدها نجانة الهدوم واني اخذت ابني اكرم بيدي وصعدت وراها..

وكفت يمها وهي تشر بالهدوم

قمر: شصار وياج بعد
ماحجى شي بعد ..؟!

شمس: كلشي ماكو قمر ..كمت احس روحي مجرد خيال يمه
خيال مابي لون ولا طعم ،،عيونه الجانت تركض ورى خطاي
هسه كمت حتى لونهن ما اشوفه من كد ما يصد عني ،،

قمر: جريت حسرة واني اباوع لملامحها الحزينة
عيونها ذبلانه
صح متبجي بس ذبلانات من الحسرة الي بداخلها ،
مو ذيج اختي الجانت تلمع بحب رائد وتلمع عيونها وياها ..
رديتلها بلا حيلة

لتنقهرين شموسه
كلنا نعرف رائد شنو من شي
رجال ومتطلع منه العيبة ،،بس والله حيرة
مندري شبي هالفترة
وامره محير وغريب !! بس مثل مكتلج خليج هنا كم يوم وشوفي ردة فعله وعسى ولعل الله يهدي عليج ،