كواكب امي

البارت الخامس

مساء الورد غوالي 🖤
وهذا بارت مليان اكشن لعيونكم

وبعدني ما معدلة🙈

#كواكب_امي
للكاتبة روشان

البارت الخامس

امشي أعوَج واليهملك 💔
هم اهمله

الموس من يمشي عدل
محد يحمله💔
.
.
.
ليلى:مشت امي كبالي وكفت يم باب ودكتها ،،هنا اني حسيت وجلي رخت من التوتر
لحد ما انفتحت الباب ،
وطلعتلنا مرة جبيرة بس مبينة گوية مو متعوبه ،،
باوعتلنا بأستغراب وخاصة على امي بقت تستكشف بوجها جنها تعرفها
وكالت

المن رايدين عيني ..

صبيحة: وين بنيتج

ليلى: عقچت وجها وباوعت لامي بأستغراب وكالت بتسأؤل
-منهو حسنة؟؟!

صبيحة: چا منهو اميييي الخايبة ..هو انتي شعندج هي بس هالبنية
دصيحيها يعيني عدنا سالفه وياها ..

ليلى:بقيت اني فاكة حلكي بصدمة شنو حسنة ؟!!! شذكرها امي بيها وليش جابتنا لبيتها ..!!!
وترجع السالفة تطخ براسي وافهم غرض امي شنو وليش انتظرت جالجم شهر لما خلصت عدتها
يعني رادت الا هي تاخذ حيفها منها بيدها ،،

واني جنت مو ناسية بس جنت اتناسى موضوعها وحجيها الي حرك گلبي من شفتها بالكاع ،كل هالفترة الفاتت واني اغشم روحي وانسي نفسي الحجي السم الي طلع منها ،بس اليوم ومن رجعت سمعت اسمها وفوكاها واكفين ابابها احس روحي
رجعت اغلي وافور واتخيلها لو صارت كبالي شسوي بيها ؟! وشلون اطلع نار كلبي بيها ..

فتحت المرة الباب وكالت
-تعالن خشن جوة ،شعدجن نسوان واكفات عالباب بهالضهاري،

ليلى: هي فتحت الباب وامي هم ما جذبت خبر بسرعة دخلت واني وراها
وكفنا بطرمة صغيرة جانت حياطينها طين ومقابيلنه تصير الباب مال بيت الداخليه ماعرف اذا تطبب على مطبخ لو صاله ..

عافتنا المرة وراحت حتى تصيحها ..وبقينا اني وامي واكفات
باوعت لامي وقبل لا احجي احسها فهمت نظرتي وكل الاسئلة الي بداخلي وحجت

صبيحة: لا تحجين ولا تفكين حلكج ...لا عبالج انا جنت ضعيفه كدام ابوج وجبروته ،بس انا ما اضيع حگي ..
انا من منعتج من الكاع لان ماردتج تسوين شي غلط ويبقى لازك بيج العمر كله
وصارلي شهور وانا انتظر هاليوم الي ابرد بي كلبي وكلبج
مو جنتي تتحلفين بيها بوكتها وسكتج وكعدتج بالكوة ،،
هسه انتي اذا بيج حظ وبنية امج وابوج اريدنج تطلعين حيفج بيها مال كل لوعة ولچمة عيشتنا بيها هالخايسة ام الزلم ..

ليلى: اخاف اني ما مفوله عليها وهالنوب حجي اني شحني شحن
بعدني صافنه بوجه امي وكبل لا احجي طلعت الچلبة وصارت بوجهنا
حسيت قطرةدم ما بقت بوجها من شافتنا كبالها
الوجه اصفففر كل حيله ،وشفافها رجفت وعيونها علينه