كواكب امي

البارت التاسع والعشرون

#كواكب_امي
للكاتبة روشان
الجزء الثاني_البارت التاسع والعشرون
.
.
سديم : بعد ما سمعنى خبر افراح مرت يومين ابويه ماله صوت وعينه مكسورة رغم ميدري بعمي حجالنا كلشي ،بس الموقف الي صار والحية الي جان سنين راكض وراها بوعي او بدون وعي تالي طلعت هيج وصخة وشرفها بالحضيض هالشي خلاه يتدمر نفسياً بدون ميحجي كدامنا

بعد هاليومين لاحظنا موبايله رجع يدك هواي اذا هو موجود او لا ،مرة جان بالكراج يصلح شغلات بسيارته وهم دك موبايله شفت الرقم نفسه مال افراح اتخبل ..بيا وجه جاي تدك عليه بعد
سديته بوجها ورجعت دكت وتقريباً 5 مرات تدك واسده اخر شي بعد مدكت
فتحت الموبايل ودخلت عالرسايل مالتها ،بيوم الداخله للمستشفى مراسلته تشكي وتكله اخواني كتلوني وسحلوني للشارع لان شافو اوراق زواجنا اني وياك وعرفو بالشقة واخذو المفتاح مني وهسه اني بالمستشفى نايمة ومحتاجتك

طبعاً كل هالحجي وابويه ما راد عليها اي شي مجرد فاتح الرسايل وبعد ملحتها وتحايلها عليه مفجور بيها وكايللها ان هو عرف بكلشي مسويته والزلم المتزوجتهم غيره

انصدمت بردها اله بكل برود
افراح : عادي اني ما غلطانة متزوجه بالحلال ،شسويلك اذا صارلك جم شهر توهم بيه ويوميه تكول باجر اجي اخطبج من اخوانج ومجاي تخطب ،بعد شتريد مرتك وماتت والبيت صار جاهز الي شنو تنتظر !!

ابراهيم : واذا اني اجلت الخطوبة ،ترحيييين تتزوجين كل مررررة شكل ؟؟! ووينه حبج مو تكولين احبك واحبببك
افراح: مثل ما انت رجال وعندك احتياجاتك اني مرة وهم الي احتياجاتي ،حتى لو ما حبيت غيرك
حبيبي صدكني كلشي صار هو امر عابر بس انت الوحيد الي گلبي اتعلق بي وماريد افاركك ابد ومحتاجتك توكف بصفي حتى ارجع اوكف على رجلي من جديد ونرجع نتزوج

ابراهيم : ما اتزوج هي وحده اني لو تطلع نخلة براسج
افراح : تتزوجني وكول افرااااح كالت

سديم : لعبت نفسي من كمية الانحطاط العدها ،بيا حال هي متكفيها الفضيحة الي وكعت بيها والكتله الي اكلتها وجاي تراسل وتتصل وفوك كل هذا لحد الان لازكه بي ومتقبل تعوفه،الي بعمرها وتنكتل هيج كتله المفروض حتى من روحها تخجل ..

حجايتها الاخيرة كلش خوفتني من شفتها تحجي بثقة رغم كل الصد والحجي مالت ابوية..وطبعا خلال هاليومين راجعة تراسله وهو ميرد عليها بس الي خبلني ليش مجاي يحظرها ويخلصنا ويخلص روحه ،شنو منتظر ماعرف ،،رجعت سالفة سحورتها تدك براسي ،وهي اكيد بسحورتها تكدر ترجع تفر راسه وهالمرة يقبل بيها بكل عيوبها مهما كانت ...
اخر شي البارحة بالليل دازتله تكله اني طلعت من المستشفى ورايحه يم بيت وحده تعرفها منا لما ترجع مفاتيح شقتها ...من كالت هيج گلبي لعب هاي ما ناويه تجوز منه واكيد راح ترجع للشقة وهالمرة لا اخوانها ولا صداد ولا رداد الها وبعد تكف ردانها علينا لما تهجم بيتنا اكثر