كواكب امي

البارت التاسع عشر

مساءالحب لاغلى الحبايب
اعذروا اخطائي الاملائية ممراجعة البارت😘
اليوم البارت فوك ال3000 كلمة لعيونكم الحلوات

#كواكب_امي
للكاتبة روشان
الجزء الثاني -البارت التاسع عشر

تألمت كثيراً ورغم جميع اوجاعي
بقيت بوجه ضاحك وقلب يحلم بـ
سعادة..
.
.
ليلى :
سديم: سادس بنية لليلى مواليدي 2000 يعني كل عمري هسه 15 وراح قريبا اطب ب16 سنة ،،صغيرة صح ..بس صارت مرحلة الوعي عندي والانفتاح عالدنيا والمراهقة ويا ابشع احداث مرت على عائلتي والي اتمثلت بأفعال ابويه ووكعته من عينا ،وحال امي المتعذبة والمشلوع گلبها والضايع تعبها كدام عينها ،

هالامور خلتني اوعى بشكل جبير واكبر نفسيا وعقلياً بظلها ،والي ساعدني بعد هو طريقة تفكيري وذكائي الي تميزت بي عن باقي خواتي ،فجنت دايما اني امل امي وفرحتها بدراستي وتقريباً اني الوحيده الحد الان من خواتي جاي انجح كل سنة وبدرجات ممتازة وحتى ظروف البيت مخليتها تأثر عليه اخر سنتين
وجنت على يقين ومتاكدة ان امي تدور تعويضها منا احنا مو من ابوية فلازم تلكي الفرحة بينا .

بعد اخر نقاش بينا اني وخواتي وبعد مكالمتهن ويا الما تتسمى وكلمتها الهن من كالت مو حرام
اول شي اجه ببالي ان ابوية متزوجها واذا متزوجها لازم اكو عقد زواج واكيد مراح يضمه ويا باقي اوراقه بالغرفة حتى لتشوفه امي
فلازم افكر واعرف وين ممكن يضمه ،ولهالسبب ما حجيت بالشي الجاي افكر بي لخواتي حتى ليخربطون افكاري كلها ،،

ضليت يومين افكر واراقب بحركته من يطب لحد ما يطلع وايدي على عينه دورت بمجرات الغرفة رغم اعرف ما يضم شي هنا ورجعت دورت بجيوب ملابسه من نام وهم مالكيت شي وجنت بكل مرة ما الكي شي گلبي نوعاً ما يبرد واتطمن ان بعدنا عالبر ،لحد ما مرة من المرات واني جاي اراقب تحركاته وشفته صعد للسياره وجان بيده اوراق حان يراجع بيهن قبل بيوم مبينات مال محكمة واول ما صعد السياره فتح الي يسمونها جكمجة السيارة وضم بيها الاوراق
ومنا جلبت بعقلي سالفة السيارة وكلت اكيد ضامهن هناك وين خله اوراقه هسه ..

بيومها بقيت الوب وفكرة تجيبني وفكرة توديني والف مرة دعيت الله كون ما الكي شي حتى اشيل هالفكرة من راسي بعد ،لحد ما اجه هو بالليل اتعشى ومن صارت ساعه 11دهل الغرفة ونام وطبعاً امي جانت لو تنام قبله لو تنتظره ينام يلا تروح وراه تنام

فأنتظرتهم كلهم ينامون حتى خواتي الي لحد الان كلشي محجيت الهن ..جنت فوك ومن شفت البيت صار هادىء عرفت الكل نامو نزلت اتسحب على روس اصابعي ،جان دايما يعلك مفتاح سيارته بمسمار يم باب المطبخ مدكوك ،
اخذته واخذت الجداحة الي يم الطباخ جان بيها لايت صغير ..وطلعت على كيفي للكراج

فتحت السياره ودخلت بيها جان الظلام يخوف بس اهم شي عندي احصل الي جايه ادور عليه ،فتحت الجمجمة كال سياره واني اضوي باللايت الصغير كلش مال جداحة وجان اكو هواي اوراق بقيت اكلب بيهن عالسريع لكيتهن كلهن يخصن شغله
رجعت سديتها وكمت ادور بالجنطة الصغيرة الي تصير بصف السايق هم ماكو شي ..ضليت صافنة ويا روحي مرة اكول اكيد الي مثل افراح حجت هيج بس حتى تضوجنا والا لو متزوجها جان لكيت عقد زواجهم يمه واكو شي بعقلي يرجع يكلي لا يجوز حجيها صح ويمكن يطلع ضام عقد الزواج يمها ...ضلت الصفنات تاخذني وتوديني واني مطفيه الضوه وكاعده بالضلمة ببطن السيارة وهمزين الجو جان بارد لو حارة جان انمردت هنا