كواكب امي

البارت الثاني عشر

صباح الورد احبتي 🖤

#كواكب_امي
للكاتبة روشان

البارت الثاني عشر
.
.

ليلى: بقيت صافنه بوجها واحس شفتي نشفت من الهبطة
لحد ما هي رجعت حجت

فرحة : شبيج عمة شو صفنتي

ليلى : هزيت راسي بثكل ،ورجعت باوعت بوجها
لا عمة وياج
بقت عيني بعينها منتظره الكلمة تطلع منها ....

فرحة : يمة اني وعمج رايدين نزوج حماج سليم
تدرين بعد هو كبر واحنا منحب الولد يبقى بلايا زواج
هم الحلال احسنله من الزايده والناقصة ،

ليلى: اني صافنه بوجها شلون الواحد هستوه فاز من كابوس
وبيني وبين نفسي الف الحمد لله كلت
يعني مو ابراهيم مو رجلي الحمد لله ربي ،

رجعت ركزت ويا عمتي بالحجي بعد ما حسيت روحي طلعت من قوقعة التوتر الجنت بيها ،
وعمتي مستمرة تحجي بسالفة الزواج واريدج تساعديني ورايدتها منج وتوكفيلي يالشغلة وانتي الجبيرة وانتي وانتي ...

كلام عمتي رجعني لنقطة البداية بالتساؤولات
حسيت راسي افتر وما فاهمه منها شتريد لحد ما كالت

فرحة : انتي الجبيرة وبمكان امج الله يرحمها
وكلت اكلج انتي تحاجينها كبل لا عمج يحاجي سعد ،

ليلى : ابتسمت ابتسامة خفيفه مثل الاطرش بالزفة ،وحجيت

منو عمة تقصدين ؟!

فرحة: جميلة اختج ،وين الكي احسن منها لسليم
هاي ترباة ايدج وتعلومج وكلشي ماخذته منج
والي يجرب الزين يريد بعد
واحنا مجربيج وما شفنه چنة مثلج ولا احد حملنا كدج

انتي بعز المشاكل والبنات جانو شالعين گلبج وحلكج ما فكيتي كوليلي عمة وين اكو هيج بت اصول ومتربايه وتحترم عمها وعمتها مثلج
واني علمود هالشي اريد جميلة لان الام الربت وحده مثلج نعم التربية اكيد ربت البقيه هم كلهن هيج
واذا امج اتوفت فأنتي الي ربيتي خواتج وراها ،

ليلى: رجعت ابتسمت بس هالمرة من الصدمة ،
وحجيت بتوتر
عمة صدك تحجين ؟!

فرحة : اي عمة لعد قابل اتشاقة بهيج موضوع ،شبيج چن الموضوع ما عاجبج ؟!!

ليلى: مو سالفة ما يعجبني ،بس شلون رهمتيها يا عمة
شجاب سليم لجميلة ،

فرحة: وليش شبي سليم ؟! وليش ما يرهمون

ليلى: مابي شي وعلى راسي هم
بس كلنا يا عمة نعرف سليم انتي وعمي ما كادريله
شلون تردين تاخذيله وحده مثل جميلة
فاهيه وفقيرة ونملة متعرف تأذي،شلون راح يتفاهمون بله

فرحة: ميخالف ليلى الرجال يتغير من يتزوج
وبلكت على ايدها الله يهديه ويعقله
ياما وياما زلم اكثر منه شقاوچية وعنتكة وعرگجية وبس يتزوجون الله يهديهم ويصيرون محبس بايد نسوانهم