كواكب امي

البارت الثالث والثلاثون

#كواكب_امي
للكاتبة روشان
الجزء الثاني _البارت الثالث والثلاثون

ريا : بعد دقايق طويلة من التحير ،بعد كل ذيج النظرات الماعرفت افسرها منه ،حسيت اسد بهاللحظة يريد يحتل عقلي ويدخل يدور بي عالحقيقة حتى يرتاح او ممكن لو جان غير شخص جان ضربني وما بقى ساكت على حرك الاعصاب الي عنده هسه بسبب انتظاره للكلام الراح يطلع مني ....قررت اختار واختاريت الجانب الي راح يخليني العمر كله مرتاحه مهما جانت النتيجة والعقاب ،
اختاريت الحقيقة ان رضى بيها او لا ميهمني المهم اني الي ارتاح

رفعت راسي وصارت عيني بعينه الي منظره مني الكلمة ،ايدي لا ارادياً صارت على خشمي وشفتي وصرت بين الي اكتم النفس وبين الي اضغط على خشمي بقوة احاول شلون مجان اقلل من التوتر الي احتلني

فركت كل وجهي بيدي ورجعت عيوني عليه وكلت
قبل لا تدخل بحياتي انت بسنتين اني جنت اعرف الي اسمه ياسر ..
سكتت وهو عيونه تترقبني وكأنما جملتي ما جانت مفهومة بالنسبة اله
دنك راسه وعيونه عليه بتساؤل وحجى بثكل وكان الكلمات بالكوة تطلع منه

اسد: كملللي
ريا : جنت احبه ...كلت كلمة بس جانت بالنسبة لاسد طلقة مسمومة فززت بداخله وجع ونار ،بلحظة وحده عيونه صارت حمرة ورفع راسه يباوعلي بنظرة حسيته بيها يصرخ ويكول كولي جذب
دنكت ماريد اشوف ردة فعلة حتى اكمل كلامي كله

جنت احبه بغباء بطيش وجهل ،عانيت هواي بسبب هالحب زعلت امي الله يرحمها مني وزعلت اخويه الوحيد وعاندت الكل وما صدكت بس حبي ،مجنت ادري الي جاي اعاند عليه يطلع واحد ناقص وعار وابو نسوان وما حبني مثل محبيته ابد..
جان ابن عم صديقتي اسمها مريم ،حبي اله كله وعلاقتي بي كلها جانت مجرد رسائل بالموبايل لا غير
لا بيوم طلعت من البيت خطوه الا على دوامي ولا يوم دزيت اله صوره حتى لايدي ولا حجيت وياه بشي مخل وعيب حتى لو بالرسائل ،كل كلامي وياه جان نفس بعض الصور الي وصلتك وطبعاً مو كلهن ،اكو صور متفبركة ومو محادثاتي هاي ،

بيوم الي عرفت بي خاين ويدور بنات وميحبني انسحبت من حياته ونسيت شي اسمه موبايل ومراسلات حتى بت عمه الي جانت صديقتي كطعت وياها من الاساس ولا بقيت اي خيط ربط بينا ،
وبعدها بسنتين يلا انت طلعت بوجهي

انت طلعت بوجهي بوكت اني گلبي ما مليان بحب احد بالعكس جان گلبي متحجر ونسى شنو الحب وما يثق بشي اسمه حب بعد حتى ماعرف شلون الواحد يحب من جديد...

عندي صديقتي الثانية اسمها نسرين هاي الوحيده الي بقيت وياها لان جنت اعرف بيها هي هم كطعت علاقتها بمريم بس اخر فترةطلعو راجعين يحجون ومن عرفت بيوم عرسي كايله لمريم ومنا بدا التخطيط ووصلتك هاي الصور وهاي المحادثات ماعرف اذا جانن من مريم لو هي وياه سوى
وهذا كلشي عندي حجيته الك ،قبل لا تصدكني او تكذبني اتذكر شغله وحدة