كواكب امي

البارت الاخير من الجزء الاول(٣١)

صباح الخير احبتي 🖤
اعذروا اخطائي لان البارت كاتبته بالليل وبعدني ممعدلته

#كواكب_امي
للكاتبة روشان

البارت الاخير من الجزء الاول (٣١)

گليبي من بعدك مرض ورويحتي
انترست حزن وايست من
العافيه
تدري بغيابك اشتعل
والشوگ يكتلني كتل
وعيوني بغيابك صفن مثل الشموع
الطافية
.
.
قمر: من سمعنا الخبر
كلنا التمينا ببيت اهلي
جانت تجمعنا الدموع وشهكاتنا وحسرة گلوبنا على رائد ،هالانسان القليل بحقة كلمة طيب وخلوق ورجل بكل معنى الكلمة

مات وضاع شبابه بسبب الما يخلفون من الله ،ومالحك حتى يفرح بشوفه بنته ..
يمكن كل دمعاتنا وحزنا لو انجمعت مراح تساوي الالم الجاي تحس بي شمس ..

وصلنا لاهلي لكيناهم جايبيها من المستشفى
ولافيها لف بالعباية
رحنا نركض عليها اني ونجمة وجهالها بقو يم ثريا وريا

اخذناها للغرفة جانت بس نفس وعيونها تنفتح وتنسد بثكل وبدون وعي
دشداشتها مشكوكه للنص وصدرها متملخ ووجها واثار اظافرها على جسمها ..

راحت نجمه تركض جابتلها غير دشداشة وبدلنالها واحنا نشهك ونمسح بدموعنا وهي مو بوعيها ..لحد ما كملنا ونومناها عالجربايه وغفت بسرعه

شكلها يصعب عالكافر
كمية الوجع التارس عيونها جان كفيل حتى يكسر گلب كلمن باوعلها ،،

بقت نايمه نوم بعمق ما كعدت ولا اتحركت لثاني يوم كعدت بدون اي كلمة
تتحرك ببطىء وهدوء شافتنا نتحضر حتى نروح لبيت خالتي لان الجنازة راح توصل

لبست وطلعت اول وحده بينا
اني امي ونجمة وابويه كلنا نحجي وياها
وهي حتى عينها متخليها علينا
مجرد جثه بس تتحرك بيناتنا
اخذناها وطلعنا لبيت خالتي جانو مسوين العزى وبيتهم مخبوص والوجوه مكلوبه علينا وبالاخص على شمس

شمس الجانت ضايعه روحها وما جاي نلكاها ،
وكاضيتها تتصفن بالوجوه بشكل مخيف ،
وكلمه ما تطلع منها
لحد ما وصلت الجنازه ودخلو تابوته للبيت
وهنا جانت اكبر فاجعه لشمس
حبيبها وحلمها وتعبها وسهر لياليها نايم كبال عينها بتابوت !!!

خالة نجية جانت منتهيه مكطعه روحها تكطع عليه وهي وشمس شمرن روحهن عالتابوت وامه تريد تفتح التابوت وتشوفه وما خلوها ولدها وهي تكطع بروحها
واحنا نجر بشمس الي انهارت بين صراخ وبجي ولطم وامي يمها
بدل ما تسكتها كامت تلطم وياها ...

جانت اجواء مرعبه
السواد تارس المكان والبجي والنحيب حسيته اخترق حتى الجدران ..
لحظات قليلة بحقها كلمة صعبة
جانت مثل النار الي جاي تسري بعروقنا من شدة وجعها...

لحد ما اخذو الجنازة وطلعو وماعرف منو راح وياهم من النسوان واكيد امه راحت وسناءوالباقي منعرفهن