#كواكب_امي
للكاتبة روشان
الجزءالثاني -البارت السادس والثلاثون والاخير
اشتاكلي..
اليعثر ابظله ايموت صاحي
واليعيش بلايه وعيه ابغير ظل
الشوج من ينبت بسجه ايبات وبنادم يزل
اشتاكلي..
اجروحي غلاتي
وعيبي صبري
ودفلتي السكته
ووحشتي بلايه هم
وحجتي الفشله التطشني تراب مايسواش لم
وهمي دنيه انبعت بيه اغيرك انت
وشنهو معناه الجرح من غير دم
اشتاكلي....
.
.
سديم : اجوي خواتي شمس وسهى هم شافنها سلمن وصفنن عليها امر من حالي وراحت منى للمطبخ تجيب مي واني ركضت وراها بسرعه حتى اسألها
وصلت يمها وحجيت بسرعه ..منو هالمرة احجي راح يطك گلبي ..ردت عليه ببرود
منى : شبيج خبصتي روحج خبص
سديم: دحجي عاد مو يبستي حلكي
منى: ولج هيج مرة خيرة اتكاطع دربنا وياها هناك يم الدكتور وبالصدفة عرفنا منها هي علوية و تريد تجي للنجف عدها شغلة يم ناس وما تندل عنوانهم وين بالضبط ،عاد من وصفته لابوج طلع يندله وقريب علينا فعرض عليها تجي ويانا نظيفها ببيتنا وباجر هو يوديها يم هالناس
سديم: اممم،شعجب ابويه امن بيها وجابها ! مو من عوايده
منى: غير هي صاحبة فضل علينا الله ينطيها الصحة والعافية
سديم : شلون يعني ؟!
منى: بس شافت نور هناك وهي كاعده يمي كالت هالطفلة مخروعة مبين من وجها ،عاد اني حجيتلها وضعها وشلون مجاي تنام هالايام واخذتها مني خلتها بحضنها وكعدت تقرا على راسها ايات وتسبيحات
بيني وبينج ما ثقيت بيها بس واحنا بالانتظار يم الطبيب والطفله نامت ذيج النومة شلون غطت غطه سوده عليه صارلها جم يوم منايمة عدل بس تتكبكب بالليل ،
سديم : خلف الله عليها لعد
منى : اي عاد من طلعنا ...يا عزه بعيني نسينا المرة بلا مي
خل نوديلها
سديم : دوكفي كمليلي الحجي هسه اني اودي المي واجي ،اخذته منها وانطيته لسهى من باب الصالة ورجعت يم منى لكيتها جاي تنزع الجواريب من رجلها
اي كملي
منى : اي عاد من طلعنا من الطبيب جانت بعدها كاعده المرة واني كلت لابوج على سالفتها وتريد تروح للنجف وابوج كال لعد تعاي نحجي وياها واذا قبلت تجي ويانا ننتظرها وناخذها
وهي من كنالها كيفت لان شفتيها مره جبيرة خطية مابيها حيل العبرية والنزلة كلساع بمكان
عاد رحنا وياها لباب بيتها جابت غراضها وطلعنه لهنا
سديم : واني اكول ليش اتأخرتوا
منى: اي جنا وياها خطية
سديم : باوعت عليها صفح وحجيت بشقى..لعد انتي مو علويه شو ما شفنا منج كلشي ،البنية تلكع ليل نهار يمج ومتعرفيلها
منى: اني !! من امداني شفهمني اني لا علم ولا فهم ..شفايتلي افتهم مثلها جان اكلت راسكم
سديم : دمشي امشي نروح يمها هو ربج هم يدري
صدك متعشين لا ؟
منى: لا والله طكنا الجوع
سديم: عزه شكد عيب لعد غير تحجين اول مدخلتوا حتى نحضر العشى دمشي روحي يم المرة ودزي البنات
راحت واني وراها بسرعه رحت للثلاجة والمجمدة طلعت منهن هالموجود من كبب وصدور دجاج اسويهن كص
واجني خواتي وبسرعة سوينا خوش سفرة النا احنا والمرة وطلعنا لابوية وامير وولد شمس وحد اتعشو بالغرفة
CZYTASZ
كواكب امي
General Fictionامٌ حنون لاخوانها ،وقلبٌ فاح منه الحب والعطاء لذاك الذي فتحت رمق عينيها عليهِ، وسماءٌ دافية احاطت ببناتها السبعة..... من سيأخذ بيدها ،ومن سيعبر من فوقها ... تابعو معي..
