كواكب امي

البارت التاسع

مساء الورد لاحلى ورود 🖤
هذا بارت وباجر هم بعون الله بارت اعوضكم لان قصير
واذا كدرت اكتب تكملة وانزلها لان والله اني اكثر منكم اريد امشي بالاحداث
وسامحوني عالتقصير
بعدني ممعدلة البارت🙈

#كواكب_امي
للكاتبة روشان

البارت التاسع

ﺍﻟﻠﻪ ﻣﻮ ﻭﺻﻪ ﺑﻜﺘﺎﺑﺔ ﺃﻋﻠﻰ ﺍﻟﻴﺘﻴﻢ ؟
ﻟﻴﺶ ﻣﺎﺗﻤﺸﻲ ﺃﺑﻜﻼﻣﺔ ﺍﻟﻨﺰﻟﺔ
ﺍﻟﻠﻪ ﻟﻮ ﻣية ﺳﻨﻪ ﺃﺗﺼﻠﻲ ﻭﺗﺼﻮﻡ
ﺭﻛﻌﻪ ﻣﺎﺗﻮﺻﻞ ﺍﺫﺍ ﻣﺘﻮﻛﻠﺔ
ﺍﻋﻜﺲ ﺍﻵﻳﺔ ﻋﻠﻴﻚ ﻭﺍﻧت ﺷﻮﻑ
ﻫﺬﺍ ﻟﻮ ﺍﺑﻨﻚ ﻣﺠﺎﻥ ﺍﺗﺪﻟﻠﺔ..!!
.
.
ليلى: مرت يومين بعد العزى ،واحنا باقين ملتمين ببيت عمي كلمن صافن بهمه ودموعة الي تنزل كلما اخذلة صفنة ودور بوجع روحه ولوبتها على هالانسانة الطيبة
لا ما اكدر اكول عنها انسانة ،امي ملاك
شكد تعبت وعانت وهي بعمر صغير،شكد ركضت ويا ابويه وويانه شكد اتحملت وتالي عافتنا بنص الطريق وهي بعدها بشبابها وعمرها بداية الاربعينات ..
هيج يا امي ما اتحملتي غياب ابويه عنج ،هيج استصعبتي وجودج وظلج علينا ..

ما جاي اوكف من التفكير بيها وبمنظرها وهي ميته بين ايدي ،كلما اكول اقوى لخاطر اخواني
وارجع انكسر واضعف ودموعي تغدرني وتنزل ،،

احس روحي مثل الجدار لاخواني بس هالجدار من فلين ومن الهوى يوكع لان ما عندي نقطة قوة
لا اخويه الي شفته لحد الان ولا رجلي الي مختفي ومايعرف بشنو جاي امر
محتاجه سند اقوي روحي بي حتى اكدر اوكف لهالاطفال .

وهاي من يوم الراحت واني ما شايفه بناتي بكد ما مكابله اخواني وكاعده احس روحي صارت بيهم اكثر من قبل ،وهم كبالي وكل تفكيري بيهم ،،

اثناء كعدتنا بالصالة واجه عمي هم كعد ،ورى شويه وكاظم حجى

كاظم : يابه ما اجه سعد اليوم؟!

سعود: بعده تلكاه شويه ويطب علينا ،هو من رد لبيته باليوم الثالث مال فاتحة وكال يومين واجيكم ..

ليلى: لاول مرة اسويها واحجي من يمي بدون ما يتوجهلي الكلام
بس حسيت بفوران بدمي مو طبيعي
حجيت بنترة
شعنده جاي هسه ؟!! وينه صار خمس ايام من ماتت امي
هسه اتذكر يجي يفوت ببيت عمة الي حاوي اخوانه وخواته ،هي الجان مزعلها وقاهرها
راحت لدار حقها بعد ،،واحنا منريده بعد لو هو ذاك الاخو السند والبي حظ جان من اول يوم اجه وسأل وكال اشوف تركة امي وابويه العافوهت بركبتي لان اني جبيرهم ،،

سعود: على كيفج يا يابه ،ترى اخوج حالته تصعب عالكافر هسه ،
ويكفيه الي اني سويته بيه بيوم الي اجه ،غسلته غسل ومن يومها وهو مدنك راسه بالكاع ,وبس كسرته على امه مكفيته وزايده ،،

كاظم: يستاهل بعد اكثر يابه ،لعد اكو واحد براسه عقل يسوي سوايته هاي بيوم وفاة امه ،

ليلى : امينه بصفي كاعده
من كال كاظم هالحجاية باوعت بوجهي باستغراب
بملامحها الباهته والمتورمة ماعرف اذا من كثر البجي لو بسبب حملها ،،
بس شدتني ملامحها لان صارلي كم يوم احس روحي ما مركزة بوجه احد