كواكب امي

البارت الثالث

مساء الخير حبايبي
مثل ما اتفقنا النشر لعيونكم حيصير بشكل يومي بس اكيد في حال صارلي ظرف معين راح اعتذر منكم عن التنزيل قبل بوقت حتى لا اتعبكم من الانتظار ،،

و وقت تنزيل البارت حيكون من ساعة ١١ الى ١١ونص لان حسب مرات الكهرباء تطفى ويتاخر النت فمو من اول دقيقه ورى ١١ تكولون وين البارت🙈😘كلت من هسه اكلكم لان ماحب اشغل بالكم

ومتابعة ممتعة حبايب گلبي
بعدني ممعدلة البارت 🖤واعذروني اذا قصير لان والله لازمني صداع ورغم هذا كلساع اكتب وارجع ارتاح 💔

#كواكب_امي
للكاتبة روشان

البارت الثالث

الى اين انت ذاهب بي ياقطار الحياة
اعدني الى الوراء
فقد اضعت في الطريق اشياء
وفقدت اشخاص وهربت مني امنيات
اعدني الى طفولتي فقد ادركت كم كان جميل ذلك الوقت
الذي فات ..
.
.
.

ابراهيم: ليييش جنتي رافضتني ؟!!!

ليلى: بقيت صافنه بوجهه مثل الواحد بلع لسانه ،
مصدومة وبداخلي تتضارب الاسئلة
منين عرف؟! منو حجاله وشمدريه هذا!!!
بنفس الوقت بقيت ساكته وعيوني بعينه ما شلتهن وهو يباوعلي بنفس نظرته
الي مره احسها تخوف ومره احسها نظرة عتب وقهر،
طال السكوت لحد ما هو انفجر ورجع حجى بعصبية.

ابراهيم: متحجيييين ....شبيج اخرسيتي ؟!!

ليلى: رديت عليه بهدوء وحجيت كلمة كلمة بدون خوف ..
واذا رفضت ؟! هذا شي راجع الي ارفض او اقبل محد اله حق يتدخل بيه
وبعدين انت شمدريك اني جنت رافضه؟!
وهم بكل الاحوال اجاك المضمون على شنو تسأل وتنتر وتزمخ بيه ..
كملت حجايتي وهالمرة هو الي فارت اعصابه
وحجى

ابراهيم: اجاني المضمون موووو؟!!
اي مو اني امشي بمزاجج شوكت ميعجبج ترفضين وشوكت ميعجبج تقبلين !!! مزعطططة احنا مووو؟!!
اذا انتي بت البارحة وعقلج صغير فلا تلعبين على ابراهيم لان مو زعطوط اني ،لا عبالج بهالتصرف راح تسوين قيمة لنفسج وتشوفين روحج عليه !!

ليلى: هو يحجي واني احرك بدمي على كل كلمة منه ،ما ادري اشايف روحه ،صحت بوجهه بدون وعي وكلت

هسسه شتريد؟!! مو ما تمشي بمزاجي مثل متكول ! لعد ما مجبور تبقى ويا وحده بت البارحة وتريد تسوي قيمة ومكانه لروحها براسك ،،
هاي اهلك واهلي موجودين وتريد هسه لو من الصبح روحلهم وكلهم ماريدها ..
ما اعتقد احد جابرك ولا يكدر يجبرك عليه ولا اني الي مچلبه بيك ...
حجيت اخر كلمة بنترة وعفته ومشيت بالظلمة كم خطوه ووكفت بمكاني من حجى هو وصوته مبينه بي رجفه الاعصاب

ابراهيم: لااا ما اعوفج واذا ما ربيتج على ايدي ما اطلع اني ابن ابويه ولا اسمي ابراهيم
وارد اشوف يا مرة الي تيبس راسها لو تستگوي ولسانها متر يمي .