كواكب امي

البارت الثلاثون

#كواكب_امي
للكاتبة روشان
الجزء الثاني_البارت الثلاثون
.
.
سديم:واني راجعه من الحمام صادفني امير الي اكتفى بالسكوت طول الايام الفاتت جان واكف عالدرج ويباوع بأستغراب
وحجى بحسرة مخلوطه بعصبيته المعهودة وهو يكول
امير : شنو هالصوت يعني ما ننطمر احنا اليوم لو شلووون!!

سديم : اشرتله واني اخلي اصبعي على شفتي ..اششش معلينا بيهم هسه شوي ويسكتون شنسوي عفيه لا تفك حلكه علينا ..هز ايده باستهزاء ورجع صعد لغرفته ورحت اني للغرفة يم خواتي
الي جانن مرة يضحكن ومره تاخذهن الصفنة المرة
والايام مشت وتقريباً هم عشر ايام على نفس الحطة وهي ما وكفت وساعدتنا بأي شي خلال هالعشر ايام
وابويه بدينا نحس بي يريد يعاقبنا بتصرفاته وياها لان وكفنا بوجهه ومخليناه يتزوج افراح ...بحيث اكله صار كله بالغرفة احنا نطبخ وتجي مرته عالحاضر تصب الغده وتاخذه بالغرفة

لحد ما مرت هالعشر ايام واني شفت الوضع اذا انسكت عليه راح يطلع عن حده ،وشمس من النوع الفقيرة ما تدخل نفسها بشي وشفت ريا اذا حجت راح تسوي عركة بلسانها المعروف فجان الحل الوحيد ان اني الي الكه حل وابدي بي ،فجنت كاعده يم شمس وجاي نسولف ومن وصلنا لموضوها كلت الها ..لازم نعلمها على اطباعنا قبل لا ابويه يبقى يتدخل ويقوي عينها علينا وبعدين منكدر نحجي شي وياها

شمس: وشلون تعلميها متشوفين احنا حتى عالاكل مجاي نشوفها
سديم: عوفيها عليه بس انتي اليوم ديربالج تسوين العشى معليج بي ،اني راح اكومها عالمطبخ بطريقتي اكيد منبقى العمر كله نوكلها عالحاظر احنا كلنا عدنا دراسه ودوام خوما يبقى كلشي براسج هم عندج جهال انتي ومسؤوليتهم جبيرة مو تجين تخدميها هم ..

شمس: مادري بعد انتي كيفج شسوين سوي
سديم : اي مو تصير ساعه سبعة الكاج واكفة عالطباخ حجيت بتوعد
شمس: لا لا معليه اليوم
سديم : انتظرت لليل قبل وكت العشى رحت طلعت الفلافل الي مشتهين نتعشى فلافل وامير جاب الصمون الحار ،ابويه جان ماكو رايح للمعرض
وخواتي بالصالة ،رحت اني عليها للغرفة دكيت الباب على منى مرت ابوية كالت تفضل
دخلت جانت جاي تمشط شعرها اتلكتني كعدت عالجرباية واني اباوع بأركان الغرفة روحي انقبضت لان كل ركن بيها يذكرني بأمي
كملت هي واحت كعدت يمي وحجت بأبتسامة

منى: نورت الغرفة اليوم
سديم : اشكرج بنورج ،كلت اجي اشوفج ونسولف لان مجاي تطلعين فكلت اني اجيج
منى : هلا بيج عيني شوكت ما تحبين تعالي
سديم :ليش ما انتي تجين يمنى وتختلطين بينا احسن ،انتي مو صرتي وحده من هالبيت ليش دائما وحدج
منى : والله مادري مرات اكول خاف يضوجون اذا شافوني افتر بالبيت او اخاف اسوي تصرف يضوجكم ،وهم من ابوج هنا ماكدر اعوفه وهو هم يكلي خليج كاعده لتطلعين
سديم : اي من يطلع تعالي يمنا على شنو نضوج بالعكس اختلطي بينا وصيري منا وبينا ،ابتسمت حسيتها فرحانه من كلامي
منى : اي هذا هو
سديم : دكومي وياي خل نسوي العشى سوى اني وياج هم تلتهين وهم تتعرفين عالبيت وادليج على غراض الطبخ لان لحد الان متندليهن
منى : اي يلا ماعندي شي هم اضوج من الكعده النهار كله
سديم : طلعنا اني وياها للمطبخ بديت اني اكلي الفلافل والبتيته والبيتنجان واحضر للفات وخليتهازهي بس تسوي الزلاطة وتحضر الطرشي يعني شغلات خفيفة لما تتعود علينا
انوب شافت امير جايب فواكه كعدت تغسل بيهن وترتبهن بدون ما اكوللها ..