(كواكب امي)
للكاتبة روشان
مشهد ١
باجر موعد التحاقه ،
جنت مخلصة العشى وغاسلة المواعين ورتبت البيت والكل راحو لغرفهم وهو جان طالع يم جماعته
كملت ترتيب وما خليت شي يعتب عليه ،حتى لا افتح عليه حلوك من الصباحيات ،
صعدت للغرفة بالكوه واني هلكانه من التعب والدرج صار عليه جبل حمرين مو درج طابق واحد ،وصلت للغرفة الهث وبطني لحلكي واصله ،
جريت نفس وكعدت عالجرباية شوي ارتاحيت ،اباوع لشموسه نايمه بفراشها وملامحها الهادئة تنكط برائة
كمت اتمشيت للكنتور فتحت الملحق بهدوء ووكفت على طارف اصابعي جريت منه الجنطتين ،
مثل كل مره احضر جنطه اله وجنطه الي ولشموسه ،وبديت ارتبله هدومه وراها خليت هدومنا اني وشمس،
كملتهن وخليتهن على صفحة واخذت هدوم والمنشفة ورحت للحمام ،،
امشي بالكوة من وره بطني واحجي ويا روحي ...اروح فدوه لايدك من سويت هالحمام فوك جان هسه حال الظيم حالي ،
سبحت وطلعت انشف بشعري وصلت للغرفه فتحت الباب على كيف،اشتميت ريحه الدخان من بين الظلام
ابتسمت قبل لا اشوفه وبس ضوه الشعلة مالت الجكارة جان مبين ،
شغلت الضوه واني ابتسم وشفته متمدد عالجربايه ويباوعلي بابتسامة
حجيت واني اسد الباب ورايه وكلت ،
هلا حبيبي
جر اخر نفس من الجكارة وطفاها بالمطفية الي عالميز بصفه
وعدل كعدته ولزمني من ايدي وجرني بهدوء كعدني يمه وعيونه تلمع مثل ما اتعودت عليه ،وكال
-هلا بمريتي هلا بالگيمر كله ،ولج انتي المفروض ما تسبحين ابد
ضحكت على كلامه وكلتله باستغراب واني رافعه حاجبي
ليش بله ؟!!
-انتي من الله تنكطين ورد وعسل وكلشي ريحته طيبه وطعمه حلو،
ابتسمت ودنكت راسي من حجيه الحلو ،
شكد متكون شخصيتي قوية بس هو يضيعني ويضيع كلشي بحجاياته الحلوه ،
ولحد الان بعدني اخجل وتحمر خدودي من اسمعه واشوف عيونه الي تعشق كل تفصيله بيه ،
سحبني لحضنه رغم كبر بطني وباس راسي الجان متبلل ،واتنهد وكال
-راح اشتاقلج يالغالية
رفعت راسي من صدره وكلت
واني اكثر
حجيتها بس بغصه وضوجه ودنكت راسي ،
منا روحته هو ومنا شايله هم للموقف باجر من اطلع وياه
هو كلبه يحس بكل حركة مني وكل شعور يبين على ملامح وجهي
رفع وجهي بيده وسألني بتوتر
-ليش ضايجه ؟!
رديت عليه بسرعة وبدون تردد وكلتله
خايفة من باجر هسه هم راح اشبع حجي وقال وقلت ،وليش رايحه ؟ وكعدي ببيتج وسكتي، وخل هم يحيرون بروحهم ومن هالحجي مال كل مره
رجع لزم وجهي وخلاه بين جفوف ايده وابتسم وكال ،،
-مالج دخل بأحد ،والي يحجي خلي يتعب لسانه ويسكت ،مادام اني قابل
فخل الكل تضرب راسها بأقرب حايط لان مالهم حكم عليج واني موجود،
.
.
.
مشهد ٢
كاعده ومتربعه بالكاع
عايفه الغرفة كلها وراكده بالكاع ومرچيه ضهري عالحايط
عيني احسها راح تزرف چرچف الجرباية المقابيلي من كد ما مركزه بي
عيني الي مركزه بي
بس عقلي وروحي وگلبي بغير مكان ،،هناك يم صورته يم عيونه ،ضحكته،سوالفه الحلوة وعشقه الي ....
دموعي تنزل مثل الشلال وياهن ابتسامه تشك الگلب مو بس الحلك
احاجي روحي واناغي بيني وبين نفسي ،
شلون انطاك گلبك تعوفني ؟!! الي يحب شلون يتخلى ويعوف حبيبه بنص الطريق !!
ملچومه وگلبي محروك ،اريد اجر النفس واحس الهوى صار دخان
الهي اني شسويت شسوييييت ؟!! حتى استاهل هيج عذاب !!!
رجعت احاجي روحي
اني ليش حبيتك ،ولك لو ادري هيج راح احترك چان عميت عيوني ولا خليتها تشوفك وتبقى تحلم بيك ،
جان دست على گلبي بيوم الرجف عليك
اتمنى ما حبييييتك ولا هالوجع والنار الجاي تسعر بصدري،،
واني بنص افكاري ودموعي الصارلها بالعشر ايام تجري ،سمعت صوت خواتي بره يم الباب
وحده تكول
-انتي طبي صيحيها اني معليه،ولج ياعيني متشوفين حالتها !! تكطع الگلب والله ،
ترد عليها الثانية
-ولج شصيح والله گلبي مشتعل عليها ،شلون اكول الها تعاي نزلي وشوفي منو جاي عليج!
ولج بكل عين صلفة جاية عليها لييش ؟!! تريد تدمرها لاختج بعد ،ليش ما اكتفو بالسوو بيها
شباقي بيها هي حتى تكمل عليها
-شنسوي غير سوالف امي والله محد طيح حظنا غير امي وگلبها الفطير
مو اني ردت اسحلها من عبايتها واشمرها بره بس ااااخ اااخ امي واكفه بعيني ،،
بقن خواتي يتهامسن يم الباب عبالهن اني نايمه عالجربايه
ميدرن اني كاعده بالكاع بصف الباب وجاي اسمع كلشي ،
لحد ما قطعن نقاشهم ودخلن للغرفه ثنينهن سوى ،
عيونهن صارت عليه بأستغراب واني على نفس حطتي ،مرجيه راسي وجسمي عالحايط وعيني عالجرجف،
كعدن مقابيلي وحده منهن لزمت جف ايدي بقلق مبين من رجفه ايدها ،
غمضت عيني بقوة وكأنما جاي اعصر الدمعات الاخيرة واعلن عن دقائق استراحتي من البجي ،
باوعت عليهن وهن عيونهن مدمعة ويايه والحجي بطارف لسانهن بس ما يكدرن يطلعنه خايفات مني ،،
جريت نفس بحسرة وكلت واني صوتي بالكوة يطلع،،
منو اجه ؟!
بينت نظره الارتباك على عيونهن و وحده باوعت للخ وحجن
-عمتج المصون اجتي وتريد تحجي وياج .....
...يتبع
انتظروني ويا رواية (كواكب امي)وان شاء الله بس احدد يوم لنزول اول بارت راح انطيكم خبر
ومن هسه نتفق
تنزيل البارتات راح يكون بين يوم ويوم 🖤لان تعرفوني انزل بارت طويل وبهالحالة التنزيل اليومي راح يسببلي متاعب وضغوطات واني اريد اوصللكم الرواية ومشاعرها بكل دقة بحيث تلامس قلوبكم مثل ما عودتكم
واكيد ما انسى البارتات الهدية 🙈بس اكيد تعتمد على تفاعلكم ودعمكم وياي للرواية
واعرفكم واعرف قلوبگم الطيبة ماراح تخلون تعب اختكم وحبيبتكم روشان يروح بالشط 🖤
انتظروني جايتكم بأسرع وقت بأذن الله
احبكم 🖤
#روشان
أنت تقرأ
كواكب امي
General Fictionامٌ حنون لاخوانها ،وقلبٌ فاح منه الحب والعطاء لذاك الذي فتحت رمق عينيها عليهِ، وسماءٌ دافية احاطت ببناتها السبعة..... من سيأخذ بيدها ،ومن سيعبر من فوقها ... تابعو معي..
