كواكب امي

البارت الثامن

مساءالورد حبايبي ،اعذروني عالتاخير كلت انزل البارت الصبح واني هسه يلا كعدت 🙈لان جنت سهرانه عليه
وبعدني ما مراجعته 😘اتحملو السحكات ..احبكم

#كواكب_امي
الجزء الثاني_البارت الثامن

روحِي يا روحِي شبعد بيها وألمها؟
شبعَد بيها اسرار تسوَه الضَم واضُمها
روحِي داسَوا فوگها وكِسروا عَظمها ..
وچانت إلهم .. آخ روحِي
شچانت إلهم !
حَتى مِن تنجرح تضحَك
تبتسِم بشفاف دَمها .
.
.
ليلى : البارحة شروق كالت اكو ناس يم بيت اخوتي هناك رايدين وحده من البنات لابنهم وهو خوش ولد خريج شاغول وشغله زين وكاعد وحده بصف بيت اهله ورايد مرة وامه شايفه البنات ورايده ثريا بالاسم (طبعاً ما جذبت بالمواصفات لان كلهن بي كلت اذا انطاني نجدة اكله على محمد )
شتكول انت ؟!بقى صافن بوجهي ورجع عينه للصينيه وكال ...

ابراهيم : كطنه وطلعيها من اذنج اي بنيه ما ازوج بالريف ولا انطيها لاحد مناك ،وهاي اخر حجاية عندي خاف بعدين تجيني فد بيوم على اخويه رايد مرة لابنه او اختي رايده لابنها من الاخير ما انطي اني وكوليلهم ابراهيم ميقبل ،وهيج موضوع من ينفتح وياج سدي بسرعه بدون ما توصلي الي

ليلى: كلامه وياي جان جداً قطعي واني بهيج امور نهائياً ما احب ابقى اناقشه لان ما احب اتفشل بشي ،من البدايه اخلي احترام وقدر لنفسي ،
بس لو حسيت الامر مهم واكدر اضعط على ابراهيم بي واغير رأيه ،لا بهيج حالة اتدخل ،،
بس موضوع زواج البنات دايما ما احب افرض رأيي بي حتى لا يوكع لوم ابراهيم عليه بيوم من الايام ،
اهم شي عندي هو يقنع والبنيه تقنع واني ويا رأيهم مهما يكون ..

راح ابراهيم لشغله وانتظرت شروق تكعد وحجيتلها موقف ابراهيم

شروق: مجان حجيتي وياه تحاولين تقنعي بكلمة حلوة منج

ليلى: شنو تعلميني برجلي ،غير اعرفه من يكون قافل على شغله يعني هذا هو ،وهم بيناتنا الحجي اريدها تكمل هسه خوما يطيح حظها مثل خواتها ،ادري بيها بس تتزوج بعد تكعد وتسكت لا دوام ودراسة

شروق: بس والله محمد خوش محمد ما يتفوت
ليلى :ادري بي خوش ولد وابن الغالية هذا بس ربج يكتبله الي تفيده وتسعدة اكثر من بناتي
اني هم ما ارضاها اله يجي لابراهيم ويتفشل ،كليله ماكو نصيب وعمك ابراهيم ميقبل ينطي ،

سدينا الموضوع والعصر رجعت شروق يم اخواني ومناك تروح لبيتها ،،طبعاً ما حجيت لاحد بالموضوع بس لشمس

شمس: ماما تدرين ،اني اشوف رأي ابويه بمكانه
ليلى: ليش بله؟!
شمس: الحياة هناك صعبة على ثريا او اي وحده من خواتي الصغار ،لان جيل هالوكت مدارس وسوك وروحه ورده حتى لو طلعاتنا قليلة احنا بس نبقى اسمنا بالمدينة يعني العالم غير شكل ثقافتهم غير عن الريف
بس هناك تلكين بس الولد عدهم مطورين روحهم ومتثقفين لان كليات وخريجين بس كمكان اقوى شي عدهم البساتين والزرع والماشية وهسه متأكدة لو تكولين لثريا هي هم راح ترفض هالعيشة
خاصة وراها تتخرج من السادس وتكمل كلية ان شاء الله والعمر كبالها ،،هاي احنا تركنا دراستنا واتزوجنا ،شنو الي شفناه من حياتنا ؟!