مساء الخير صباح الخير 🙈ممعدلة البارت عذروني
#كواكب_امي
للكاتبة روشان
الجزء الثاني _البارت الرابع والعشرون
نجمة: سديتها منها عيني على حمزة ،وهو يباوعلي باستغراب يريد يعرف شكو جنت من داخلي ادري بي ميقبل ومتاكده لان ميخليني اطلع لهيج اماكن بدونه انوب ابقى 3 ايام !!
حمزة: خيرج نجمة خوما اكو شي
نجمة: امي وخواتي باجر يرحون يزورون الشريفة بت الحسن ويبقىن هناك 3 ايام وكالو شوفي حمزة يقبل تجين ويانا ...ابتسمت بنهاية كلامي وهو فتح عيونه يباوعلي بأستغراب ..واني منتظرة جوابه وصده الي ...بس صدمني برده
حمزة: مادام ويا امج عادي حبيبي ماكو اشكال
نجمة: دنكت راسي وعيوني تباوعله باستغراب ممصدكة...هاي انت دتحجي ! اوكف الله عليك مجاي اصدك
حمزة : هههه حقج شبعانة ومتدمغة بكلمة لا
نجمة: يعني تعرف روحك كلشي عندك لا ..ولله الحمد
حمزة: هسه شلون نبطل !؟
نجمة: لا لا عيني هذا لساني وبلعته التوبه اذا احجي
خل اروح احضر غراضي .....حضرت جنطة الي وللجهال وثاني يوم من الصبح اخذني حمزة وداني لاهلي قبل ليروح لدوامة هم لكيت خواتي متحضرات ،قمر وثريا ما كدرن يجن عدهن مسؤوليات ،ابوية جان بدوامة وامي بالغرفة نايمة جانت دائما تعبانة بسبب الجرعات الي تاخذهن كل شهر
دخلت عليها بستها وهي اتلكت الجهال روحها من الدنيا احفادها حتى النا تنسانا من تشوفهم
ليلى: شعجب قبل ابو راس الناشف
نجمة: يمه سكتي وخليها حتى بالليل من نام لزمت راسه كلت خاف مصخن شو طلع مابي شي ..ردت بضحكة
ليلى: الله يهدي والله حمزة درة مال الله وماكو منه بس لو يبطل نحاسة جان كملت السبحة
نجمة: ماكو واحد كامل لازم تطلع بي شغله عوجه
ليلى: اي عفييية
نجمة: سكتت عبالي اسالها عن ابويه بس ماردت افتح وياها موضوع ممكن يضوجها
عفتها ورحت يم خواتي جانن ينطن غراضهن لامير يصعدهن بالسيارة صحت شمس وكعدت وياها بالمطبخ
كوليلي شخبار ابويه؟! اخر احداثه شديسوي ووضعه ويا امي شنو
شمس: مادري والله شو ابويه وضعه محير مرات تحسين خوفه عليها راح يطلع من عيونه ومرات تشوفي يطب ويطلع ولا مهتم ولا جن عنده مرة مريضة بالبيت ومرات حتى هم يتناكر وياها مثل قبل ،مجاي يصفاله على بر ومتعرفين علته وين
نجمة: هو شنو لعب جهال !! زين هو بعده ويا ذيج الساقطة افراح؟
شمس: ريا وسديم يكولون بعده ،مو تدرين هن يبحوشن وراه دايماً فجاي يشوفنه هم يراسل ويتبسم لو يتسنطن عليه من يخابر ويكولن بعده يحاجيها
نجمة: امداني اي والله ،غميت روحي بحركة
ولج شمس اني من اسمع هالسوالف استحي من يمي واخجل ،ليش ابويه هيج ممهتم؟! والله سالفته تحير اكبر واحد ،هسه لو هو واحد خفيف وماعنده شخصية جان كلنا راكع الدنيا بطكاكية وميهمه احد
بس ابوية بعمره مجان هيج جان يتخبل على امي وعنده اهم شي يحفظ احترامه كدام الناس وخصوصي كدامنا احنا بناته
شجراله هسه ؟!
أنت تقرأ
كواكب امي
General Fictionامٌ حنون لاخوانها ،وقلبٌ فاح منه الحب والعطاء لذاك الذي فتحت رمق عينيها عليهِ، وسماءٌ دافية احاطت ببناتها السبعة..... من سيأخذ بيدها ،ومن سيعبر من فوقها ... تابعو معي..
