اسيرة قدرك

البارت 33

اسيرة_قدرك..
بقلمي رسل..
البارت الثالث و الثلاثون..

يلخليتني وبگلبي انا مخليك
بصدري اتعاركن عطرك وعطابه
بين الي يجيني وبين لا ميعود
وبين الخان ولفة و يوفي لاحبابه
ضنوني اتکافشن من روسهن بجفاك
وماكو براسي شيخ يفض الطلابة..

-كعدت من الفجر لكيت فارس كاعد سلم
عليه وطلع واحس اخذ روحي ويا حتى
بجي بجيت واسر يحجي عليه..

-هاي من اني اروح للدوام هم هيج تبجين..

-لعد شلون ما اضوج عليك اصلا اختنك
بغيابك اسر اني ما عندي غيرك انت وامي
وفارس و بناتي الباقين كلهم ما يهموني بكدكم..

-حضني.. مسحي دموعج و اني باقرب فرصة
اخذج تشوفين امج بس هسه مشغول وعيونج
كافي عاد لا تفاولين لاخوج وهو وراه طريق..

-سكتت بس بداخلي مقهوره تمنيت يبقى اكثر
يمي احس بي حنيه ماما الي كلبي طاك عليها
وعلى شوفتها..

-مر شهر حياتنا عاديه اسر من دوامه للبيت
ما يكدر يمر هناك بعد هنا فرق وامان اكثر
شبه تعودنا على الكعدة هنا بس وجود سماح
كلش تعبني هواي تغث واني اتجاهل لخاطر
اسر ما اريد انك و اشكيله عنها هواي وتالي
يمل مني و انولها الي تريده..

-حضري جنطتي باجر اروح دزوا عليه..

-صار.. حضرتها و احس اختنكت اول مره
هيج صدري ينقفص لليل اني ضايجة و ما ادري
شبيه ساعة اشتاك لاهلي ساعه اريده يمي
وما يروح لدوامه كعدنا الصبح هو بدل
و بوس البنات قبل لا يطلع حس عليه اختنكت..

-شبيج حبيبتي منو وياج؟!..

-هو حجه هيج واني بجيت..

-ذب الجنطة و حضني.. ليش تقلقيني عليج
منو وياج سماح؟!..

-لا ما بيه شيء بس مشتاقة لاهلي لا يضل بالك
تروح و تجي بالسلامة حبيبتي..

-هو باسني وطلع بعد ما طمنته مابيه شيء..

-اسبوع كامل اني روحي طالعه وكلبي مقبوض
اسر هواي اتصل بي كلبي ضل يمه اهلي
احجي وياهم و اسمع اخبار خواتي من امي.

-كم يوم واتصلت عليه نورهان كالت ريا
امي مالها خلك تعبانه.. احس اديه تربطت
خفت لا بيها شيء و ما يكولولي لان بعيده
حلفتها شبيها تالي طلع السبب من اختي..

-امي طالبه منها تبيع سيارتها و تنطي الفلوس
لفارس وهو بعدين يرجعهن لان محتاج فلوس حتى يتعين وهي ما قابله و مسمعه امي كلام
هي هاي اختي ابوي مكبر راسها اداوم بالمستشفى و سياره خاصة عندها..

-انقهرت على امي.. لا تخلونها تنقهر اني
ابيع ذهبي و اكمل فلوس فارس كليلها لا تهتم
نورهان ديروا بالكم على امي..

-لا تبيعينه هي راح تروح لخالو وتاخذ منه
تكول هاي فرصة فارس ما اريدها تضيع منه..

-سديته منها و كلبي يمهم كلش زين اعرف
فارس شكد منتظر التعيين حبيبي نفسه ابيه
من اجه ابد ما حجه بهذا الموضوع..