اسيرة قدرك

البارت 77

اسيرة قدرك..
بقلمي رسل..
البارت السابع والسبعون..
واتباد rasolaa7

‏الحب غريب
كيف يمكن لشيء بهذه الروعة
أن يتسبب بهذا القدر من الألم..

-التفتنا كلنا على صوتها وهي تركض ومن
بين دموعها لمحت ابتسامة مطمنه
وتصيح.. ابنكم رجع كلبه ينبض ما مات
ولج نورهان ابنج عايش والله عايش..

-طفر مهاب وايده ترجف خطية ما كدر يحجي
شيء ركضت على ريا واني اهز بيها
الي سمعته ما اكدر اصدكه واني لسه كلام
الطبيب يرن باذني.. احلفي فضل عايش ريا كلبي وكف فدوه اروحلج يعني مو تجذبين عليه
وهيج تحجين حتى اسكت وما ابجي
اي يمكن انتي هيج تحجين حتى اسكت..

-والله عايش كافي حبيباي تعالي وياي شوفي تحجي وتبجي..

-ركضت ومهاب وياي للغرفة اني شفت
نفسه يصعد وينزل واني مدري شصار
بحالي جسمي رجف ودموعي تصب بس
هالمرة دموع فرح
دموع واحد ايس من الدنيا والله برد كلبه
بلطفه وكرمه اي الله اكرمني بشوفة
ابني وهو يتنفس ورجعه الي..

-رحت على ريا.. شلون احجيلي شلون هيج
صار لعد ليش ذاك هيج حجه ووكع كلبي..

-هي كالت.. هاي الممرضة الله ينطيها
من شافت حالتج وشلون فرفحتي تقدمت
على فضل و تردد آيات شالته من رجله كلبته و ركضت بي على سديه بغير غرفة بقت تسويله تمارين تنفس تضغط على مكان القلب وحسيتها ابنها الي بين ايدها من كد ما حاولت ويا
والله نورهان بمعجزة رجع يتنفس حبيبي..

-نزلت دموعي الله ينطيها الله دزها الي
هي خطية من اول ما دخلنا ما عافتنا وانكسر خاطرها علينا سجدت بالكاع واني
اشكر رب العالمين لو شكد ما اطول ما اكدر
اعبر عن شكري..

-ما مصدكه كل شوي وعيني عليه اخاف
ابتعد ويصير شيء سرى و ريا باتو يمه مقبلوا
ابقى اصروا عليه اروح ارتاح سرى
كالت اني يمه راح تموتين بس ارتاحي شوي..

-طلعنا واني كلبي يمه التفتت على مهاب.. اطلع بيه الكربلاء اريد سلامة هل طفل من ابو عبدالله اريد احلفه بأولاده يبرد كلبي اريد فضل
من اهل البيت عليهم السلام..

-مكال لا بالعكس هو هم محتاج
يدعي لابنه طلعنا بوجهنا الكربلاء عمتي وزيد رجعوا للبيت الطريق كله ابجي وما مصدكه
عشت يوم احسه اطول واتعس يوم بحياتي
كلام الطبيب والحزن الي خيم علينا
لو من اتخيل ابني يروح مني شلون تفرفح روحي
كلام ريا
وشلون طمنتنه الله ينطيها الهاي الممرضة
الفضل لربي والها والا لو ضاله على هذا
الطبيب جان دفنت ابني لا يمه اسم الله
مجرد اتخيل هالشيء انرعب الف حمد وشكر
الك يارب من جبرت بخاطري..

-وصلنا كربلاء دخلت للامام اني شفت
الضريح ودموعي صارن يتسابقن بالنزول
حلفته ميردني بجيت بجي خليت الكل يصفن
ويبجي عليه واني اسولف ويا الضريح
واردد بالدعاء لابني النسوان يدعلي
وهاي الي تكول
الله يبرد كلبج
وذيج الي تمسح على ظهري واني مو يمهم
احس وحدي واريد بس انخه الامام واطلب
سلامة ابني منه..