ပယင်းကြိုးသီ ချစ်သောမောင့်ဆီ(Complete)

အပိုင်း✨🍁(၉)

‌ဖြူလွှလွှအိပ်ရာပေါ်တွင် ခေါင်းမစည်းထားသဖြင့် ဆံနွယ်လေးတွေပြန့်ကြဲကာ အိပ်ပျော်နေသော အဖြူလုံးလေးတစ်လုံးအား ပယင်းရောင်မျက်ဝန်းတစ်စုံက တစ်ချက်လေးတောင် မျက်တောင်ခတ်ခြင်းမရှိပဲ စိုက်ကြည့်နေသည်က တယုတယပင်။
အပေါ်စီးမှမြင်နေရသည့် ခပ်တိုတို ခပ်စိပ်စိပ် မျက်တောင်လေးများနှင့် ပိတ်ကျနေသော မျက်ခွံကြည်ကြည်လေး၊တဖြောင့်ထဲတန်းနေသည့် မျက်ခုံးတစ်စုံ၊နှာတံစင်းစင်းနှင့်အတူ အနီရောင်သွေးနေသော ဘေးတစ်စောင်းအိပ်နေသဖြင့်  ခပ်ဖူးဖူးပြည့်ပြည့်‌လေးဖြစ်နေသော နှုတ်ခမ်းတစ်စုံ စသည့်မက်‌မောဖွယ်အရာများကို ဒဝီဦးခိုက်တစ်ယောက် အခေါက်ခေါက်အခါခါကြည့်နေမိသည်။

အင်္ကျီကြိုးစအား တင်းတင်းဆုပ်ကိုင်ထားသော လက်တစ်ဖက်ကိုငုံ့ကြည့်ရင်း ပယင်းရောင်မျက်ဝန်းများက ပြုံးယောင်သန်းသွားသလို နှုတ်ခမ်းတစ်စုံဟာလည်း ကော့ညွတ်သွားသည်။
လူကသာအိပ်ပျော်နေပေမယ့် ကြိုးစအားကိုင်ထားသော လက်လေးတစ်ဖက်ဟာတော့ ဒဝီဦးခိုက် ဖြုတ်မရအောင်ထိ မြဲမြံနေခဲ့သည်က မနေ့ည ကတည်းကပင်ဖြစ်သည်။

အမျိုးသားတစ်ယောက် အိပ်ပျော်နေသည့်ပုံစံက ထိုမျှလောက်လှနေသည့်အတွက် ဒဝီဦးခိုက် အနည်းငယ်တော့ အံ့ဩမိသည်။
ပုရိသတွေနှင့်ထိတွေ့ခြင်းမရှိခဲ့ပေမယ့် နတ်သမီးတမျှလှပပါသော မိန်းမပျိုလေးများကိုတော့ ဒဝီဦးခိုက် ပညာသင်သွားတုန်းက တွေ့ခဲ့ဖူးသည်။

အဝတ်အစားဝတ်သည်ကအစ ပွင့်လင်းမြင်သာသော အိန္ဒိယအမျိုးသမီး‌လေးများကတောင် ဒဝီဦးခိုက် နှလုံးသားကို ကိုင်လှုပ်နိုင်ခြင်းမရှိခဲ့။
သို့သော် မပီမပြင်ဝိုးတဝါးလရောင်အောက်တွင် မြင်တွေ့ခဲ့ရသော ဝိုင်းဝိုင်းစိုစို မျက်ဝန်းပြာလေးများနှင့် ချစ်စဖွယ်ကလေးလေးသဖွယ်အိပ်မောကြနေသော အမျိုးသားတစ်ဦးကတော့ သူနှလုံးသားကို တဖြည်းဖြည်းချင်း ကိုင်လှုပ်နေခဲ့သည်။

သေရည်လေးတစ်ကျိုက်သောက်ရုံဖြင့် မူးပြီး ရစ်နေပါသော ကောင်ငယ်လေးသည် ဒဝီဦးခိုက်၏ အသက်18နှစ်အရွယ်ထိ မြင်ဖူး၊တွေ့ဖူးခဲ့သမျှ ကလေးများအားလုံးထက်ပင် ချစ်စရာကောင်းသည်။
ဒဝီ မျက်တောင်မခတ်ကြည့်နေမိသည့်အခိုက်မှာပဲ မျက်ခုံးတစ်စုံဟာ ကြုံ့သွားပြီးနောက် တိုတိုစိပ်စိပ် မျက်တောင်လေးများဟာ လှုပ်ခပ်လာပြီး  မျက်ဝန်းပြာလေးများက တဖြည်းဖြည်းချင်းပွင့်လာသည်။