නපුරු පුස් ඌරා!
පාට මාරු කරන කටුස්සා!
හැලි වඳුරා!
ජොල් බඩා!
කුණු බිත්තරයා!
ලොං හැලිච්ච ඇලි හිවලා!
කැතම කැත බකමූණා!
මං ආයෙම කතා කරන්නෙත් නෑ.
බලන්නෙත් නෑ.
හිතන්නෙවත් නෑ ඔය පුස් ඌරු තඩියා ගැන.
මාත් එක්ක හිනාවෙන්න ආවොත් කට අලවනවා තාත්‍තගෙ මල්ටිබොන්ඩ් ගාලා. ආයෙම birthday presentsනුයි අරවයි මේවයි ඉල්ලගෙන ආවොත් දෙකට නවලා ඔබනවා කුණු කාණුවක් අස්සට!
මීට පස්සෙ විභාග වලදි හිස් පේපරේ තමයි ටීචර්ට දෙන්නෙ!
ඉස්කෝලෙ යන්නෙම නැතුව ඉන්නවා!
අම්මා ගැහුවොත් එවෙලෙම යනවා යන්න බස් එකක නැගලා ආච්චිලගෙ ගෙදර. එහේ ගිහින් පාලු ගල් ගුහාවක් වගේ හොයාගන්න පුළුවන් වෙයි කැලේ අස්සෙ. එතකොට පුළුවන්නෙ supermanගෙ වැඩ ටිකත් කරදරයක් නැතුව කරගන්න. ආයෙම පුස් ඌරාව නම් දකින්නවත් එන්න හොඳ නෑ. මට වමනෙ යන්න වගේ ඒකගෙ ගඳ මතක් වෙලා දැනටම.
බොවෑ...ක්!!!
අපරාදෙ අර ඉස්සර ගල් ගහන්න පුරුදු වෙච්ච එක නතර කරලා දැම්මෙ. ආයෙම ඒ වැඩේ ට්‍රයි කරන්න ඕනෙ. පුස් ඌරගෙ කාමරේ ජනේල සේරම කුඩු කරන්න ඕනෙ. එතකොට කෙල්ලො එක්ක මල් කඩන හැටි හැමෝටම ඇහෙයිනෙ.
ඕකගෙ කටහඬ කැතම කැත ඩයිනොසෝර් කෙනෙක්ගෙ වගේ වෙන්න ඕනෙ. කතා කරද්දි කට දිගේ කෙල බේරෙන්න ගන්න ඕනෙ. තව කුණු බිත්තර ගඳ ගහන්නත් ඕනෙ.
එතකොට කෙල්ලො සේරම මූව දාලා යයි. වේලි වේලි ඉන්න වෙයි කරවල වාඩියෙ වගේ.
ඊට පස්සෙ තම්බරු, ගොම්බරු ගගා ආවොත්නෙ මාව හොයාගෙන. පයින් ගහලා චප්ප කරලා චප්ප කරලා වීසි කරලා දානවා krypton වලටම.
මෝඩයා!!!
හැබැයි මූණටම කියන්න යන්න වැඩක් නෑ තරහයි කියලා. එතකොට මේ දීපු තෑගි ටික ඉල්ලගන්න ඉඩ තියෙනවා. ඒවා ඇත්තටම මගේ මහන්සියෙන් උපයගත්ත ඒවනෙ.
ඒක නිසා මට තමයි අයිති. අනික ලෝකෙ කොහේ හිටියත් supermanලා සේරම අයිති supermanටම තමයි.
හැබැයි කොච්චර මොනවා වුනත් පුස් ඌරගෙ මූණ නම් ආයෙ බලන්නෙ නෑ නෑ නෑම තමයි!
ගෙදර ආවට මොකද මල කම්මැලියි!
ඒ නිසා මං අර dancing dvd එකක් දාගෙන නටන්න පටන්ගත්තා. තාම දවල් වෙලත් නෑ. මුළු දවසම ඉතුරුයි. කරන්න දේකුත් නෑ. නටලා නටලා හති ඇර ඇරම මං ගිහින් නාගත්තා.
මේ නාන්නෙ දවස් කීයකින්ද මන්දා.
කම්මැලි වැඩනෙ නානවා කියන්නෙ. කරන්න දෙයක් නැතිම වෙලා යන මෙන්න මේ වගේ තේරුමක් නැති දවස්වලට හොඳයි!
