The Legendary Master's Wife [မြန်မာဘာသာပြန်]

Chapter-639- အောင်မြင်ခြင်း

Unicode
အပိုင်း ၆၃၉- အောင်မြင်ခြင်း

ကျောက်စင်မြင့်မှထွက်ပြီးနောက် ယူရှောင်းမိုသည်
အကျဉ်းထောင်သို့ဦးတည်လျက် လာရာလမ်းအတိုင်း
ပြန်လှည့်လာခဲ့၏။

သို့သော်လည်း အကျဉ်းထောင်အတွင်းကလူများကို
ကယ်ဖို့ သွားမှာမဟုတ်ပေ။ ယခုလောလောဆယ်မှာ
သူ့လုံခြုံမှုသူတောင် မသေချာသေးချေ။ သူ့မှာ
ထိုမျှစိတ်ဆန္ဒပြင်းပြသည့်နှလုံးသားမျိုးမရှိပေ။
မရဏအစီအရင် အသက်ဝင်ပါက သူတို့တွေအကုန်
ထုံထျန်းနန်းတော်အတွင်း ပိတ်မိကုန်မှာဟု
သက်လတ်ပိုင်းအရွယ်လူကြီးက ပြောခဲ့တာကြောင့်
ဖြစ်သည်။

ထုံထျန်းဧကရာဇ်လှုပ်ရှားတာကို ယူရှောင်းမို
ကိုယ်တိုင်ကိုယ်ကျမမြင်ဖူးပေမဲ့ ထုံထျန်း
တိုက်မကြီးမှာအသန်မာဆုံးလူဖြစ်သည့်အလျောက်
အားနည်းမှာမဟုတ်တာတော့ သေချာသည်။
သူ့အကြံအစည် ဖျက်ဆီးခံလိုက်ရတာကို
ထုံထျန်းဧကရာဇ်သိပါက ပေါက်ကွဲမှာစိုး၍
သူနဲ့လင်းရှောင်အတွက် ထွက်လမ်းတစ်ခု
ချန်ထားရပေမည်။ ထုံထျန်းနန်းတော်ပတ်လည်ရှိ
ရှေးအစီအရင်အား အသက်ဝင်ခွင့်ပြု၍မရပေ။

အစီအရင်အသက်ဝင်ခြင်းမှ တားဆီးရန်နည်းကို
သက်လတ်ပိုင်းအရွယ်လူကြီးက မပြောပြခဲ့ပေ၊
ယူရှောင်းမိုကလည်း မသိပေ၊ သို့ပေမဲ့ ထောင်ထဲက
လူတွေလွတ်ကုန်ပြီး အစီအရင်အတွက်
လုံလောက်သည့်စွမ်းအင်မရရှိပါက မရဏအစီအရင်
အသက်ဝင်တော့မှာမဟုတ်တာကိုတော့သိသည်။

အစက လာခေါ်သည့် ဝတ်ရုံဖြူလူက သူ့ကို
မျက်လုံးစည်းခြင်းမပြုခဲ့ရာ ပြန်သွားသည့်လမ်းကို
သူ သိသည်။ အကျဉ်းထောင်ကိုရောက်ပြီး
တိုက်ခိုက်နေသံများကြားလိုက်ရဖို့ သိပ်မကြာပေ။

မလှမ်းမကမ်းရှိ ထောင်အဝင်ဝမှာ အပျက်အစီးပုံဘဝ
ရောက်နေလေပြီ။

သူထွက်သွားပြီးတဲ့နောက် ဟယ့်သုံ့တို့အစီအစဉ်က
အောင်အောင်မြင်မြင်လည်ပတ်နေတာပင်။

သံစားသားရဲက လူလေးယောက်ပဲကယ်မှာဟု
ပြောခဲ့ပေမဲ့ ယူရှောင်းမို၏စိတ်စွမ်းအင်ရေကျေးဇူးဖြင့်
အခြားသူများကိုလည်း လွှတ်ပေးခဲ့ပြီး
အဝင်ဝရှိထောင်စောင့်နှစ်ယောက်ကိုလည်း
ကိုင်တွယ်ဖြေရှင်းပြီးနှင့်ပြီဖြစ်၏။