Unicode
နဂါးမင်းသားဆီက သတင်းအချို့ကို ရရှိခဲ့ပြီ
_________________
နီမြန်းသော အဆင်းရှိ၍ ပတ္တမြားရည်လဲ့နေသည့် နဂါးမျက်ရှင်သည် လေပေါ်တွင် ဝဲပျံကာ အလင်းရောင်များ ဖိတ်ဖိတ်တောက်ဖြာကျနေသည်။
ယုဂန်နှင့် အရုဏသည် အဆိုပါနဂါးမျက်ရှင်ကို အချိန်အတန်ကြာသည်အထိ အံ့ဩတကြီး ငေးစိုက်ကြည့်မိနေကြသည်။
အရုဏသည် ယုဂန် ကိုယ်နှင့်မကွာ အမြဲဆောင်ထားလေ့ရှိသည့် လည်ဆွဲအတွင်း နဂါးမျက်ရှင်ရှိနေလိမ့်မည်ဟု တစ်ခါမျှ မတွေးဖူးခဲ့ပါချေ။
ယုဂန် ဒီဘက်စကြဝဠာကိုရောက်ကတည်းက မူလယုဂန်နိုင်၏လည်ပင်းတွင် အနှီဆွဲကြိုးရှိနေခဲ့သည်ဟု ယုဂန်ကပြောပြဖူးသည်။ ယင်းမှာ မင်းလွင်ဘဝ၌ မင်းလွင်၏မိခင်ပေးခဲ့သည့် ဆွဲကြိုးနှင့်တူသည်မို့ ယုဂန်သည် သူ၏မိခင်ကိုအမှတ်ရသောအားဖြင့် ဤဆွဲကြိုးကို တောက်လျှောက်ဆွဲထားခဲ့ခြင်းဖြစ်သည်။
မင်းလွင်က အဆိုပါဆွဲကြိုးကြောင့် သူကမ္ဘာကူးပြောင်းလာသည်ဟု ယုံကြည်ကြောင်း အရုဏကိုပြောပြဖူးသည်။
ယခု မူလယုဂန်၏ဆွဲကြိုးက နဂါးမျက်ရှင်ဆွဲကြိုးဖြစ်နေပါမူ မင်းလွင်၏ဆွဲကြိုးကရော မည်သို့သောဆွဲကြိုးဖြစ်ပါသနည်း။
စဉ်းစားလေ၊ ဤသည်မှာ ရှုပ်ထွေးစရာကိစ္စဖြစ်လာသည်။
ပထမဆုံးပဟေဠိမှာ မူလယုဂန်ဆီ အနှီဆွဲကြိုး မည်ကဲ့သို့ရောက်ရှိလာသနည်းဟူသော အချက်ပင်။
" အဲ့ဟာက ဘယ်လိုလုပ်ပြီး ကျွန်တော့်ဆီ...မဟုတ်ဘူး...မူလယုဂန်နိုင်ဆီ ရောက်နေတာလဲ"
ယုဂန်က တအံ့တဩနှင့် အထစ်ထစ်အငေါ့ငေါ့မေးသည်။
နဂါးမင်းသားက သူ၏နဂါးမျက်ရှင်ကို လက်ထဲဆုပ်ကိုင်လိုက်ကာ အေးဆေးစွာပင်ပြန်ဖြေသည်။
" ငါပေးခဲ့တာ"
ယုဂန် : " မူလယုဂန်ကိုလား"
အဏ္ဏ: " မဟုတ်ဘူး။ မင်းကြီးမဟီကို ပေးခဲ့တာ"
ယုဂန် စိတ်ရှုပ်ထွေးသောဟန်ပန်ဖြင့် မျက်ခုံးများတွန့်ချိုးသွားသည်။
YOU ARE READING
The Everlasting One (volume 2 + 3 )
FantasyStart Date : 24.11.2021 End Date : 1.4.2024 Unicode ဥတ္တရနိုင်ငံရဲ့ မင်းသားအရုဏဟာ သူ့ချစ်သူ ယုဂန်နိုင်နဲ့အတူ ပျော်ပျော်ရွှင်ရွှင်နေထိုင်သွားဖို့ပဲ ဆန္ဒရှိခဲ့တယ်။ ဒါပေမဲ့ မထင်မှတ်ထားတဲ့အရာတွေ သူတို့နှစ်ဦးဆီ ရောက်ရှိလာတဲ့အခါ.... ယုဂန်ကိုလက်တွဲပြီး သူက...
