Unicode
The Everlasting One
___________________
တစ်နှစ်ခန့်ကြာသော်.....
လေပြည်အေးတို့ အပြေးအလွှားလေး သော့သောအခါ နှင်းဆီငယ်တို့၏ နူးညံ့မွေ့သိမ်သော ရနံ့လေးများက လောကတစ်ခွင် ပျံ့နှံ့လာခဲ့သည်။
မဏိသည် ထိုအမွှေးရနံ့တို့ကို အဆုတ်ထဲပြည့်သည်အထိ ရှူသွင်းလိုက်၏။ သူ ကျေနပ်ပိတိအပြုံးတို့ဖြာရင်း လှပစွာဖူးပွင့်အာနေသော နှင်းဆီပန်းတို့ကို အနီးကပ်ငုံ့ကြည့်လိုက်သည်။
နောက်ဆုံးတော့ သူနှင်းဆီပန်းစိုက်သည့် နေရာတွင် အောင်မြင်ခဲ့လေပြီ။ ထိုသို့သော ဂုဏ်ယူစိတ်နှင့်အတူ သူ ကျယ်လောင်စွာအော်ခေါ်လိုက်သည်။
" ဒေါဏ...ဒေါဏ လာပါဦး"
သူ့ခေါ်သံကြောင့် တခြားနေရာတွင် အပင်ရေလောင်းနေသည့် ဒေါဏမှာ ရေပုံးကိုအသာချရင်း မဏိအနားသို့ ပြေးလာသည်။
" ဘာများလဲ အစ်ကို..."
" အစ်ကိုတို့ရဲ့ နှင်းဆီပန်းတွေပွင့်ပြီ။ ကြည့်ပါဦး အများကြီးပဲ"
ဒေါဏ ကြည့်လိုက်သောအခါ နီရဲပွင့်အာနေသော နှင်းဆီပန်းများကို တွေ့လိုက်ရသည်။ လှပမှုကြောင့် ဒေါဏ၏မျက်ဝန်းလေးများ တောက်ပသွားသည်။
" ဟုတ်ပါ့ လှလိုက်တာ..."
မဏိသည် ဒေါဏကို ရွှန်းရွှန်းစားစားငဲ့စောင်းကြည့်၍ ယင်းနောက် သူ၏လက်ထဲမှ နှင်းဆီနီတစ်ပွင့်ကို ဒေါဏဆီကမ်းပေးလာသည်။
ဒေါဏ နှင်းဆီကိုယူလိုက်သော်လည်း မဏိကို အူကြောင်ကြောင်ဖြင့် မော့ကြည့်လာသည်။
" ဒါက?"
" ပထမဆုံးပွင့်တဲ့ပန်း...မင်းကိုပေးမလို့"
ဒေါဏ မပြုံးမိဘဲမနေနိုင်ချေ။
အမြဲတစေ အစ်ကိုက သူစိုက်၍ပွင့်လာသည့် ပထမဆုံးပန်းကို ဒေါဏအတွက် ဖယ်ဖယ်ထားတတ်သည်။ သူတို့ လက်ထပ်ပြီး၍ အတူနေလာသည့် တစ်နှစ်အတွင်း ဒေါဏမှာ မဏိဆီက ပန်းပေါင်းများစွာကို လက်ခံရရှိထားပြီးဖြစ်သည်။
YOU ARE READING
The Everlasting One (volume 2 + 3 )
FantasyStart Date : 24.11.2021 End Date : 1.4.2024 Unicode ဥတ္တရနိုင်ငံရဲ့ မင်းသားအရုဏဟာ သူ့ချစ်သူ ယုဂန်နိုင်နဲ့အတူ ပျော်ပျော်ရွှင်ရွှင်နေထိုင်သွားဖို့ပဲ ဆန္ဒရှိခဲ့တယ်။ ဒါပေမဲ့ မထင်မှတ်ထားတဲ့အရာတွေ သူတို့နှစ်ဦးဆီ ရောက်ရှိလာတဲ့အခါ.... ယုဂန်ကိုလက်တွဲပြီး သူက...
