شتل عنبر

البارت السابع

السلام عليكم

شتل عنبر

بقلمي. Wasan Alsaad

البارت. السابع

مدد ابوي.   ويون من. المه. ويه  ونته  امي وخواتي يونن  وياه وانه. اهيس روحي. مربط  
مابيدي. شي اسويله.  كبل. ثلاث ايام . ردينة. من. المستشفى  بولاية البصره   ما خليت
احد.  يشيله وياي   شلته. على ظهري مثل ما چان يشيلني. وانا صغير.
ردت.  اكله. من غير ما احجي وادري بابوي. يفهم. كل شارده وارده مني
حتى لو  انكسر. ظهره. انه حزام ظهره. ... حتى لو  تگرم ( فقد القدره على المشي )

انه رجليه اللي يمشي بيهن  بس شبيدي على  الالم وهو يوصفه نار وتسعر. بظهره وتسعر. بگلبي

احتارينه شنسوي. ونخفف عنه عمي ضمد. راح. وجاب. رجال حكيم من بيت. شاوي
يعرفون علاج.  المكسور 

وكال نفس حجي. الطبيب   بس زاد. عليهم  يخف الالم.  شويه شويه.
بس. هاي ظلته وهذا حاله. لا يشيل أيد ولا رجل.   مدد مثل خشبه
وطانه طبوبه ( دواء) مال. حشايش ( الأعشاب ).  ودهونات.  ندهن ظهره. ونگلبه.  على صفاحة. كل حين وحين

الوادم. وعمامنه اللي كابلونه اول ايام.  بدات  تخف. جياتهم هم الوادم. حكها.  كلمن ملتهي. بعيشته
وشبيدهم عليه  بس عمي. ضمد ما. تركه ولا تركنه.   كل يوم. صبح. وليل. يجي يجسه
ويشوف.ويسال. شنهي اللي عايزنه  وانه اجاوبه.مثل العاده. الحمد لله ما عايزنه شي
بس. عوفية  ( صحة) ابوي.  فكام. ما يسال. لچن يعرف. طبعي كام يودي. مسواك البيت
بيد عمتي ام قادر  أدري بعمي. ما مسويها فضل. ولا شفكان ( شفقه)

بس روحي ما تتحمل. ذل  وابوي ما رباني هيج. وأحس. بعيون ابوي.  كلام.  جثير.
وعتب. بس. حاله. مخليه ساكت.  امتعنت. بعيونه.  وفهمت. شيريد. جنه يگلي.
اليوم. اريد. اشوف. تربيتي   تگدر.  يا ابن ظهري. تشيل امانتي.

عمي ضمد احسه بكسر. ظهر. ابوي. هم انكسر.  لان ابوي.  جان.   أخيه. الصغير مو بس ابن عمه. ومتربي حدر ( جوه ) ايده  وشايل عنه كل شغل الكاع وهمومها.

بيوم.  حسمت امري  ويجي. عمي ضمد اكله. وصدگ من اجه ومثل عادته راد. يخلي. بجيبي. مصرف  للبيت.
دنكت وبست. ايده. وكتله

" ما اخذنه عمي. "

رد عليه.  بتعب وضيچة خلگ
  " بويه خلف لا تشلع گلبي. فوگ ما هو مشلوع. واخذهن. ادري. انت ليش ميبس رأسك
ومخلي. فرگ. بينك وبين ناصر.  ... شنهي ما حاسبني.مثل ابوگ"

" العفو منگ عمي. انت جبيرنه وأبونه كلنه. ،.. اخذهن منك ما اردگ بس توعدني
تگبل اللي. راح اطلبه منگ "

رد بتعجب
" كول. يا خليف لا مو.  تكول امر. وركبة عمگ سداده"

" سالم وغانم عمي ابو قادر. انه ردت. اشتغل بالكاع.  حالي. حال. الوادم
ياله اقبل اخذ فلوس وتصرفها على اهلي من غير. تعبي تعذرني عمي "