شتل عنبر

البارت ٧١

السلام  عليكم

شتل  عنبر 

بقلمي Wasan Alsaad

البارت  ٧١

سكته سكته والصبر بعده صبر
وذاك انه ثياب الوكت ما بدلتني
نخيت الروح بيها وشدت الحيل
اليكصر ردي والسابج كحيل
انا باز معشبات ويطرد المذيور
ياكل مزته ويرمي لغريمه الذيل
يشرب لو عطش من وردة الغندور
والغربان تشرب من بكايا السيل
طبع الفهود تصيد ..عز الصيد
تاخذ مزته وتترك يسير النيل
وانا طبعي من اصاحب صاحب المضنوك
لا ابجي بشديده ..ولا يرك الحيل
لا اذل خاطره ..ولا اوصخ الماعون
ولا ادفه بمنامه شما يجور الليل

( عريان  السيد  خلف )

..........................................

الحله    اول  ايام  شهر اب ١٩٨٨

لحظات   من   القلق  والخوف  والترقب    عاشتها  فاطمه    يعرق   الها  الجبين   اظافه  الى  حر  الجو   بهاي   الايام  من  السنه  واللي  يوصفوها  ب  (  آب  اللهاب )  وهي  جالسه    بانتظار   دخولها  على الدكتوره  وبيدها   ورقه  التحليل  اللي   متاكده   من  نتيجتها 

٨  اشهر   مرت   على   إجهاضها  بطفلها  الثاني   ،  ومن    اقل  شهر   تحس  بأعراض  الحمل  
بس كانت  من  خوفها  تكذب    الحقيقه   الواضحة 

لكن   البارحة  من   شافت  البسمة   الحزينه  اللي  نرسمت  على  وجه  فاتنه (  زوجة  ريسان)  وهي  تتحسس بطنها   وطفلها    يركل  بيها    ،  تمنت   تعيش هاي  اللحظه  وقررت
تتخطى حاجز  الخوف  وتتأكد   عندها  حمل  مثل ما  متوقعه

سمعت  رقمها   من  السكرتيرة  دخلت  ومثل  ما  دخلت   بخوف   طلعت   بشعور   اكبر    فرحه  ممزوجه  بخوف من  الخساره  مرة  ثانيه

وصلت  قريب  للبيت     شافت    ازهر     يلعب   بالبايسكل   هو   و ظافر   ابن  ريسان   يم  
بابهم  وامها   متلفلفه  بعباتها   وكاعده  يم  الباب    تعاين  عليهم    خاف   يتأذون  

  ازهر  من  شافها  عاف  بايسكله   وركض  الها 

"  ماما  وين  رحتي    ليش خليتيني   نايم   وما  خذيتيني   "

ابتسمت  بوجه  ولزمته من  ايده  

"   ما يصير   أخذك  وتخلي    البيت  فارغ ما بيه  رجال  غير   انت  بدل    جدك  وأبوك  من  يطلعون "

نفخ صدره   ورفع  ايده  حتى  يراويها  عضلاته

"  اي   ماما  شوفي  انا     قوي  مثل  خماسي   اكتل الاشرار   "

وهو   يحاول  يفلت  ايده منها   حتى  يركض  ويسوي  نفس  الحركات  اللي  يشوفها  بالرسوم  المتحركة
لكن  هي   ماسكته  وهو    يطفر   ويرفع  برجله  مثل   يطير    بالهواء