السلام عليكم
شتل عنبر
بقلمي Wasan Alsaad
البارت ٧٩
............
" وكل طباخ سم سوف يأكله
وكل حافر بئر واقع فيه "
إيليا أبو ماضي
............................
شباط ١٩٩٢
أمام باب الدخول للمدرسه الابتدائية وكفت فاطمه وهي شايله جنطة مدرسه بناتيه
مخيطة من قماش بناطير الكابوي ( الجينز القديمه ) ومزخرفه بلاصقات ورديه حلوه
خلت الجنطة بيها روح هاي كانت من شغل نهلة لزينب بنت اخوها اللي السنه داومت صف اول ابتدائي
دنكت وصارت بمستوى الطفله ذات البشره الخمريه والعيون الواسعه العسليه خشمها ناعم وقصير وحلكها صغير وردي شعرها الكستنائي المضفور ضفيرتين مربوطات بالنهايه شكالات ( قرصات) بيها اكسسوار على شكل سمجه بيضه وأعلى الكصيبه مشدوده شرايط بيض ولابسه صدريه تركال نيلي حفر جواها قميص وجوه القميص بلوز ابيض ابو الركبه وفوك الصدريه ملبستها فاطمه جاكيت حياكه وفوك الجاكيت كوت صوفي ثخين بيه كلاو
كان لغنى من جانت بعمر زينب وجوه لابسه كولون ابيض شكته من اول اسبوع لبسته من يم الركبه لمن اجتها بالساحه دفعه من بنيه وهم يلعبون و رافته الها فاطمه
مسحت على وجه اتدفيه لان بس هو المعرض للهوا البارد انطتها الجنطه والكوشه اللي راح تكعد عليها لان اكو نقص بالرحلات
والطلاب يجيبون من بيوتهم لو كوشات او كواني ( اكياس الطحين النايلونيه الفارغه ) لو ألعلب المعدنية الفارغه
" يله يمه هج جنطتج والكوشه مو تضيعيها عفيه بنيتي صيري لسباعيه وحافظي على سلعتج لا تنباك وأكلي لفتج سويتلج لفة بتيته سلك وطماطه فد طيبه ،يله عيوني راح يدك الجرس دخلي خلي اروح خواتج خطيه مناك "
جاوبتها الطفله الي تذوب دلع حتى بكلامها الطبيعي نبرتها هادئه
وكلها دلع من غير ما تصنع وهي شويه وتبجي
" ماما عفيه ما اكدر أتحرك ما اريد الكوت ثكيل
والبنات يضحكون عليه يسموني الدب"
جاوبتها فاطمه وهي تحاول تقنعها
" ياااا كلابهن انوب زنوبه جنها دب انت ِ غصن بان بس غير برد وصفكم لا جام بالشبابيك لا باب و كاعدين بالارض تتمرضين امي عاد خلي الهدوم مدفيتج
وتراهن ميتات غيره وين عدهن قبوط مثل هذا .... يله حبيبه يله ورده
اليوم يجي بابا وشوفي شنو يجيبلج وياه عفيه بنيتي "
YOU ARE READING
شتل عنبر
ChickLitقصة اجتماعيه. تتمحور أحداثها. على صديقين. يجمعهم. الصداقه. والمحبه الصافيه. والقرابة. والنسب تمتد. قصتهم. لأولادهم. وأحفادهم ترى. هل تعيش. الصداقه الصافيه
