شتل عنبر

تكملة البارت ٨٠

السلام عليكم

شتل عنبر

بقلمي Wasan Alsaad

تكملة البارت ٨٠

...............................

الحق
يحتاج إلى رجلين
رجل ينطق به ورجل يفهمه

جبران خليل جبران

..........

مثل رياح الخريف المتقلبة اللي تلعب مع شراع المراكب ساعه هادئة وساكنه وبلحظة يتغير هذا السكون الى عاصفه ترفع المركب وشراعه بين امواج عاتيه
كان هذا ابسط وصف لليله اللي مرت على بيت خلف

طلع خلف من باب الديوانيه على صوت الشاب اللي دخل بيتهم دخيل

وتقدم من الشاب اللي كان يتلفت وراه والخوف مبين على كل قطعه بجسمه المرتجف

" ادخل بويه ادخل .. زهير سد الباب بسرعه "

زهير اللي كان مسيطره عليه المفاجاه رجع ابوه عاد عليه الكلام

" زهير بويه شبيك أتحرك كبل لا احد يلمحه "

جاوبه زهير
" هااااا ايه ايه هسه "

مد راسه بالشارع لكاه فارغ محد بيه
رجع السياره اللي مالحك يدخلها وسد الباب

دخل للديوانيه لكه ابوه يناوش الشاب كلاص ماي وهو يحاول يطمنه

" خلي الرحمن بكلبگ بويه وتطمن اذا ربك دفع عنك وعنه فانت بحمانه وكلنا بحماية رب العالمين وبعد سكوت ساله خلف يتأكد من شكه ... كول بويه احجي منهو اللي حايدگ
( يطاردك) وشنهي سالفتك بلكت نكدر نعينك "

جاوبه الشاب وهو متكرمش على نفسه ويدقق بكل شي حواليه يحاول يطمن نفسه

" عمي انا انا ما اريد اورطكم شويه واروح بدربي بس اريد يأيسون مني "

ساله خلف
" ياهم بويه "

جاوب الشاب بصوت منخفض
" الحكومه ، انا لبست جندي من اشهر والضابط نشب ويايه نشبه
لان بيوم لكفني أقلد عليه جم عقوبه بعقوبة وسجن
ردته بس يفگ ياخه مني ماكو طكت روحي عمي چم دوب هل المذله

الركض وره العيشه بذله بالجيش ذله فريت
وجنت أتنقل بين خوالي بالعماره
واجيت للبصره اريد احصل واحد يعبرني الحدود
كعدت يم خالتي ورجلها زلمه جبير ومريض وما عندهم خلفه
وما ادري منو وشه بيه الجيران ما ادري مناك من يم الخوالي طش الخبر
ما شفتهم الا وهم بنص الحوش وانا اركض على الدرج