شتل عنبر

البارت ١١٩

السلام عليكم

عيدكم مبارك مرة ثانيه
البارت طويل جدا ومتعب ارجوكم اقروه بتمعن بيه هواي تفاصيل مفيده مو مال تطفر

شتل عنبر

بقلمي Wasan Alsaad

البارت ١١٩

..............

سأصبر حتى يعجز الصبر عن صبري

سأصبر حتى ينظر الرحمن في أمري
سأصبر حتى يعلم الصبر
أني صبرت على شي أمر من الصبرِ

( من روائع الآمام علي عليه السلام )

............

بالقرب من ردهة الطوارئ كانوا ازهر ومحمد واكفين ينتظرون رجوع الطبيب الهم حتى يقرا نتيجه جهاز التخطيط بعد ما وترهم بفرضياته با سألته الروتينية الطبيعيه عن التاريخ المرضي للعائلة

بنين كانت مسلتقيه على السرير بغرفة الطوارى وبجانبها نهله واعيه وتسمع وحالتها مستقرة حتى جهاز التنفس شالته الممرضه

التفتت على امها نهلة
" يمه ما تشوفين الولد يمته نطلع تأخرنا وابني هسه شلون حاله
انا احس نفسي زينه مابيه شي "

تقربت منها نهله
" هااا بعد امج الحمد لله عساج زينه ، بس غير نّتظر الطبيب صلبنه خله الجهاز عليج يسجل وراح اجه الممرضه فصلته وكالت انتظروا الطبيب
وابنج لا تخافين ماعليه شي يم بيبته وعماته هل كل شويه يخابرن "

لزمت راسها ونت
" اخ يا راسي "

توترت نهله
" هااا يمه شبيج"

جاوبتها بنين
" يمه الصداع موتني صارله فتره ملازمني
حتى مرات احس عيني تنشل "

تتلفت بين الحواجز بلكت تشوف ممرضه
" ماكو ممرضه تشوف ضغطج تنطيج مسكّن
زين هاي العصره بالكلب اول مره تجيج لو صايره قبل
وانتِ ما حجيتي "

جاوبتها وهي تغمض عيونها من الالم
" لا اول مرة ، بس الصداع لا من ايام فاتحه امي الله يرحمها بس
كان يجي مرات متباعده جنت اكول يمكن لان ابجي ومقهورة

بس هل الفتره يوميه ملازمني بساعات معينه مثل البسمار ويدك بطرف كصتي"

عاتبتها
" ولج امج الله يرحمها شهرين وتدور سنتها وانتِ من ذاك الوكت ساكته
عفيه عليج هاي انتِ عود الفاهمه ، ليش ما حجيتي لرجلج ياخذج للطبيب
لو لخالتج او انا "

جاوبت بتعب
" فدوه يمه لا يسمعج أزهر هو صاير بارود هسه ما اريده
يقلق ويعصب بالزايد ، كل ظني صداع عادي
لو من كثر البجي على المصايب اللي تمر بينه وعلى الوضع اللي نشوفه
عيوني يرادلها فحص ، يمه بس الله يعلم بحالي من يروحون ازهر لو محمد
للمناطق الساخنه و ادك عليهم بالتلفون ويتأخرون ما يردون
والله ينهد حيلي واتمنى الموت ولا مرار الانتظار "