شتل عنبر

البارت ١١٥

السلام عليكم

شتل عنبر

بقلمي Wasan Alsaad

البارت ١١٥

.......................

غداً أمسك يدك
وأضع خاتماً في إصبعكِ
وأهمس ( أحبكِ) في أذنكِ
ثم اطبع قبلة سمراء
على بياض يدكِ

........................

بعد خروج حجي خلف وزهير وحسين واكيد ازهر وياهم جايين لخطبة بنين
اكثر واحد كان فرحان وأعطه موافقته وبينت سعادته هو خالد
رغم شاف الخوف على وجه ايهاب والحيرة على وجه علي والوجوم على وجه محمد

ابتدات سلسله مناقشات والكل انطه رايه بين الموافقه القلقله من ايهاب بسبب معرفته بشخصيه ازهر العصبيه المستأثره بالراي الواحد وماعنده نقاش على اخته وطباعها الهادئة الوديعه

وعلي اللي وضح ان موافقتهم شي مهم لكن الاهم هو موافقه اختهم

اما محمد اللي احتد بالنقاش وذكرهم بمواقف ازهر قبل وياهم
شلون يأمنون اختهم عنده وغنى كانت تأييده الراي
الى ان خالد اوقف النقاش

" خلصتوا حجيكم لو بعد عدكم؟ كل واحد عنده راي يحتفظ بيه لنفسه
الراي بهذا الموضوع يخص اثنين اختكم اللي هي صاحبه الشأن

وانا ابوها والحمد الله بعدني عايش مالكم اي حق تدخلون باي وحده من خواتكم و بحياتهن ، فاهميني لو لا "

رادت تعترض غنى
" بابا بس احنه من خوفنه عليها انت ما يخفى عليك ازهر وطباعه وبعدين نسيت هو تربيه منو وشنو اللي زرعت بيه "

راد يجاوبها ايهاب لكن ابوه وكفه وهو رد عليها

" اي اعرف منو اللي رباه والنعم منهم ورحمه الله على ارواحهم العدل والميت
رباه جدج وخالي وربته خيرة نسوانه عمتي الله يرحمها
وبعدها الفضل كل الفضل للطيبه ام غفران ، والولد اثبت طيب اصله
وحسن تربيته وان الزرع اللي شتلوه هل الثلاثه بيه هو الي نمى وكبر وأزهر
مو اللي تقصديها الله يغفر الها

وانتِ هسه واخوج وهو يشير على محمد شنو فرقكم عنه لا بالعكس هو احسن منكم
لان اعترف بغلطه واعتذر وانا عذرته ومسامحه لكن إنتم محملين عليه
بدون سبب وهاي أفه اسمها الضغينه الله يجيرنا ويجيركم منها
واذا على طبعه العصبي فماكو رجل ما عنده عصبيه اكيد باختلاف النسب
واعتقد ماكو واحد عصبي وما ينجرع وقت العصبيه مثل رجلج
والحمد لله هاي صارلج سنين وياه ما وصلت بيج كلتي يستحيل اعاشره بسبب طبعه
واللي اشوفه تغير هواي ويحاول يضبط نفسه صحيح لو انا غلطان "