شتل عنبر

البارت ٧٢

السلام  عليكم

شتل  عنبر

بقلمي Wasan Alsaad

البارت ٧٢

"الثقة  أسمى مراتب  الحب
أن تثق  بشخص يعني ان تعطيه
بلا تردد مفاتيح  قلبك !"

جبران  خليل  جبران

....................

اول  أسبوع  من  آذار  سنة ١٩٨٩

باحدى  مقصورات ( غرفة منام )    قطار   الليل  المنطلق  من  البصره  لبغداد  ،

كان  خالد   متكي على  جدار  المقصوره  ومدد رجله  اليسرى  المصابه  و ثاني   الرجل  اليمنى    يعاين  للنايمه   بالسرير  المقابل وهي  طاويه  ايدها تحت  راسها    وأثار   الدموع  بعدها  على خدها    من  بكائها   بعد  ما ودعت  اولادها  وخصوصا  ايهاب  اللي  بقى  يبجي  وراها

تنهد  بحسره   وهو  يحس  الدنيه   طابكه  على  انفاسه   هواي   غربلته   وبقسوه  ،  هو   مطمئن  واثق   ان  رب  العالمين   راح  يطلعهم  من  هذا  الاختبار   خصوصا  بعد  ما تأكد من  كلام دكتورتها 
اللي  أيده  احمد  باتصال  تلفوني     بينهم  وهو  اللي  الاخير  (  احمد   اخو خالد )   اصر  عليه   يجيبها  للفحص  بمدينه  الطب  كونها تملك  اجهزه    اكثر  دقه  (  في  تلك  الحقبه  الزمنيه )

بدات  عجلات  القطار   بالتحرك   وانطلق صوت  صفيره  معلن   تركه  المحطه  اللي  توقف  عنده   خلال  طريقه   الى  بغداد   احساسه     بالحركة    حرك  معاه  الذاكره  اللي  عادت  بيه
الى  يوم   اللي  دخل  عليها   بعد  رجوعها من  الطبيبه  وهي  تبجي  ...

وبعد  محاولاته  لتهدأتها  حتى  يفهم  منها   شنو  اللي صاير

بدون  اي مقدمات   فجرت   أمامه  خبر  حاجتها   لعمليه   سريعه   ما  عرف  شنو  وليش  ظل    صافن   بوجه   يريد   يستوعب  اللي  سمعه  وهو  الأفكار  المخيفة  تلعب  براسه   وكأنه  ساحه   كرة  قدم 

اخذ   دقايق   يلم  شتات  نفسه   ويحاول   يقويها  الى  ان    كدر   يركز   ورجع  مره ثانيه   رفعها من  على  مخدتها  اللي  غركتها  بدموعها 

"   نهله   تعوذي  من  الشيطان   وبس بجي  كومي    وياي "

كامت  وهي   خائرة  القوة     حس بيها  ورغم  خوفه من اللي راح يسمعه  حاول  يجمع   الجَلد  والصلابة  المتبقيه  عنده   حتى  يكدر   يواجه  الجاي  ويدعمها  
اخذها للحمام   وكان   يتمنى ان  تحصل  معجزه  وأيده اليمنى   تتحرك    وتحط  على  كتفها  يضمها  اله 
وتسد  انشغال  ايده  اليسرى  اللي  مستند  تحتها   العكازه