السلام عليكم
شتل عنبر
بقلمي Wasan Alsaad
البارت ٩٨
......................
ولا أزود
ترافه..
وليل..
ودك ريحان
يا أسمر لا تواخذنه
يلن كل دگه من حسنگ
شتل ريحان للجنه
ليالي
و دك نحر حداّر
واحنه الشوگ ناحرنه
" مظفر النواب "
..............
صوت تنفسه العالي وكأنه كان يركض لأميال بعيده ،العرق اللي يتصبب من جبينه وهو يمسحه بكف ايده، عيونه اللي تتنقل بين الكاعدين ، واخيرا عقله استوعب اللي سواه
لكنه ظل واكف مثل المدان ينتظر حكم القاضي و هو جده اللي مدنك على سبحته وكالعادة ملامحه الجامده ما تعطي اي انطباع عن رده
لحظات عصيبه حس الدنيا افترت بيه من كثر الشد العصبي اللي من شدته عليه
خله تركيزه على شخص واحد بين العشرات الكاعدين بالديوان ما استوعب اي كلمه من كلام الضيف ابو مجيد وهو يتصوره يلومه لان عرضلهم وخرب خطبتهم
ما رحم حاله ورجعه الى نقطة الاستيعاب ولا كدر يفرزن الا كلام جده من رد الضيف
" " هذا الواكف كدامك ابن بنتي مو غريب وحاجته يمي
بس كونك دكيتله صدرك اريدك تنطي رايك بسالفه وانت ابو المفهوميه والدرايه
وبعدها يجرالك ابو مجيد ، كام على حيله خلف وكال من رخصة الحاضرين كلكم اصحاب مجان ان شاء الله ، تفضل وياي ابو مجيد لداخل بويه ايهاب سوينه درب ، وأشر لحسين تعال ورانا"
حسين صارت عيونه بعيون عمامه كأنه يطلب منهم الدعم وهم أشروله يتبع جده
بعدها وباستقبال البيت لان الديوان بناء جديد مفصول عن البيت بناه خلف بالسنين الاخيره خلال تعديله وتوسيعه للبيت اللي اصبح بناء حديث بطابقين استغلوا بيه كل متر من الحديقه اللي كانت تشغل المساحة سابقا اكثر من البناء القديم اللي بقى على وضعه كمشتمل او بيت صغير لازهربالمستقبل ....
كعدوا الثلاثه ورابعهم ايهاب اللي واكف خاف جده يحتاجه بشي
كال خلف
" الله بالخير "
ردوا
" الله بالخير والكرامه "
قبل لا يشرح الموضوع رفع راسه لإيهاب وكال
" بويه ايهاب روح صيح ابوك خلي يجي يمنه گله جدي محتاجك "
YOU ARE READING
شتل عنبر
ChickLitقصة اجتماعيه. تتمحور أحداثها. على صديقين. يجمعهم. الصداقه. والمحبه الصافيه. والقرابة. والنسب تمتد. قصتهم. لأولادهم. وأحفادهم ترى. هل تعيش. الصداقه الصافيه
