شتل عنبر

البارت ٨٧

السلام  عليكم

شتل عنبر

بقلمي Wasan Alsaad

البارت  ٨٧

..............

بعد بيه الصبر واجد ..
يشب بيدي المكابر نار تلهم باث ..
يگضيني الشرار وطبعي اظل بارد ..
ازم شفه اعله شفه ..
وناب يخلف ناب ..
كل واحد شكل وصوابهن واحد ..
مگالب والليالي تريد وسعة بال ..
وهموم العلي .. ما مرن بواحد ..
كفاني اترفعت عن چلمة الياحيف ..
وسهمي شما نگص من هالوكت زايد ..
اكابر عالنزف ..
حد وشلة النتاك ..
دامنته .. وجزِت .. لاجبر ولا شد ..
گبل مهرة احلامي ..
تظل باثرها الخيل ..
هسه .. اشما اعسها .. امحدده اتحدد ..
ومشاچچ زماني وياي .. عين بعين ..
اتمهمز الگومه .. وصاح بيه اگعد ..
حجرني الصبر .. لاسمِح لا مغتاظ ..
حالي لحالتي .. لا وادد ولا ضد ..
لا ملگه اليدب بالروح ..
دفگة روح ..

ولا عصرة حزن .. للراد عني يصد ..
دِخلها شما تصح .. خنياب لو صيهود ..
طيبت النفس ..
لا طيّر ولا سِد ..

عمت عين الليالي .. وهجم بيت الموت ..
يتخطه الرعيع .. وياخذ الماجد ..

(  للكبير  عريان  السيد  خلف)

.......................

هناك   أشخاص  في  حياة  الانسان مثل   البوصلة   دائما   يشيرون  لك
الى  طريق  الصواب   ، فالصدق  عنوانهم   والاخلاق  الطيبه  هي  كينونتهم

هناك  أشخاص   في  حياتنا    نحس  بفقدانهم   رغم   انهم  لا يعيشون  معنا   ولا يخوضون
تفاصيل  أيامنا   لكنهم   ما   ان   تبحث   من  حولك   قبل   النداء  يتواجدون
ويدعمون  
حالهم    بالنسبه  لگ   كحال  الوتد  للخيمه  ان   ذهب  الوتد   تهاوت   الخيمه  

دحام    بالنسبه  لكل   اهله  وعمامه   لا بل  لكل  شخص  عرفه  وعاشره  كان  الوتد والسند 
ما يوم  تاخر  عن  احد  ،  ولا  يوم   رد  طالب ،  ما  يرضه  على  الباطله ولا  على   العيله

زلمه  حيد  ابن  حيد  والديوان   يشهد  له ....

شعور  الاسف  والحزن  اعتلى   تفاصيل  وجه  خلف  وهو   يسمع   بطارمة  بيته
الخبر   اللي  نقله    ابن  اخته  خالد

تحرك  بؤبؤ  عينه   الاسود  حتى  يمنع  دمعه  حاره    تنزل  من  عينه

"  دحام    ،   ابو   عباس  "

جاوبه   خالد 
"  اي  خالي   عكال الراس    وهيبتنا  تفرهد منا "

جاوبه  وهو   يطك  الراح  بالراح 
"  يا وسفه   والف  يا حيف ،  شلون     گبل  خمس  ايام   شفته بفاتحة وادم  كرابتنا  كل  شي  مابيه
ما يشكي  من  عله  ،  استغفر  الله  وأتوب  اليه     لا اعتراض  على  امره 
،  انا  لله  وانا  اليه  راجعون  "