عشق ليليان 💥💕

😘58😍

فاقت من الرقاد على كرشها الي تخرج فاصوات من الجوع ( مكراشة ما تفيقها غير الماكلة 😂😂 كيفي ) تقعدت على السرير و ضمت رجليها و تتفكر وش صرا اليوم و الاخبار الي سمعتها ... تفكرت انو مزالها تعاني و تضحي بحياتها ... جاها احساس انو خوها مش حاسس بصعوبة الموقف الي هي فيه ... انسانة عاشة حياتها ذليلة بش تحمي خوها و فالاخير نهار توقعت انها خرجت من الجحيم الي هي فيه راحت كل احلامها انها ترجع تعيش كيف اندادها و تحقق احلامها .. الناس الكل تخمم غير فمصالحها مكاانش الي سقساها و قالها لكان راهي مرتاحة ... صحيح راهي حابة تنتقم و ترجع حقهم بصح و هي متهنية و فبلاصة آمنة جنب خوها و بعيد على الحس و التبهديل تاع كل مرة ... قعدت قريب نص ساعة و هي فنفس الوضعية تخمم .. جا في بالها مهدي .. اكيد راح يكون عدو ليها فهاد المعركة قلبها عصر عليها كفاش راح تواجهو كفاش راح تتسببلو فضرر ... حتى هو ما ساعدهاش و مكانش فصفها بافعالو رغم انها تحس انو يكنلها نفس المشاعر كيما يقربلها ... حطت يديها على شفايفها و تتفكر كيف حط شفايفو عليهم .. غمضت عينيها و نزلت يدها لرقبتها و تتفكر فانفاسو السخونة عليها .. ترسمت تبسيمة صغيرة على وجهها تبين انها موجوعة و بعدها راحت التبسيمة و هبطو دموعها سخونين يحرقو فيها ... - سامحني مش بيدي لازم نرجع حق بابا و ماما الغالط لازم يسلك ... تغلبت على روحها و مسحت دموعها قامت غسلت وجهها و جات خارجة تفكرة انو لابسة المفضوح صدرها نصو يبان و رجليها عريانين مهيش ناوية تكون من ضحايا عبدو ههههه ... لبست جيلي طويل يوصل لركبة و قفلتلو قفايل اللولين ما تبانش صدرها ... نزلت للكوزينة كانت الساعة 00:30 ما لقات حتى عبد فطريقها .. فتحت الفيريجيدار سخنت و كلات كي كملت حبت تاكل كراب بصح ما تعرفش طيبهم ... سندت يدها على الرخامة و حاكمة خدها تتحسر على سعدها ( تعرف تسخف و ما تعرفش طيب كيما حالتي 😇 ) و هي تخمم هكاك سمعت صوت وراها .. مهدي كان مزال ما رقدش نزل للجنينة يتنفس شاف الضوء تاع الكوزيتة راح ليها يشوف فيها تخمم و غاااايسة و مرة على مرة تقلب شفايفها كي الصغار الي راح يبكيو
- مهدي : احم احم
- ليليان : اسمله الرحمان الرحيييم ... حطت يدها على قلبها و تشوف معاه تاهت مع جسمو كان لابس شورط بررررك ... من فوق عريان تتفحص فيه شبر بشبر و عينيها قلوب .. فاق بيها مهدي عاود حمحم
- احم احم ... وش كاين علاه راكي هنا
- اااه وش قلت !... ااا والووو كنت ناكل و درك خلصت ..