عشق ليليان 💥💕

114

سمعتو داخل و يعيط باسمها صوتو خلعها .. حتى هي ولات تعيط باسمو ..مهدي كيف سمعها رجعلو عقلو قبل ما تخرج جبدها ليه حضنها و يتنفس يرجع فنفسو ليليان مش فاهمة وش بيه جبدت منو شوي و يديها ملويين على رقبتو حطت جبينها على جبينو و هو باقي حاكمها من حزامها
-ليليان : وشبيه حبيبي .. وش كاين
- مهدي : والو يا روحي توحشتك برك ( مهدي مقالهاش سبب خوفو بش ما تخافش حتى هي مش ناقصها توتر هي اصلا على اعصابها اي حاجة تبدا تبكي و تنهار )
- ليليان : تخبي عليا ؟ ... قولي وش خوفك
- مهدي : دخلت و ما لقيتكش قلت رحتي و خليتيني ولا داوك عليا ... منصبرش بلا بيك ... نتي حياتي
- ليليان : اشششش مكانش لي يفرقنا و عمري ما نروح و نخليك ... حياتي نتا
- باسها على جبينها : ربي يخليك ليا ... اممم وشيا الريحة هادي وش طيبتي
- ليليان : ههههههههههههه ( جبدتو وراها من يدو و ماشية بيه جيهة الطابلة ) ... ارواح دوق و قولي الا نعرف ولا منعرفش ... بصح مندرك نقولك نعرف و بلاك تقلي مش بنينة نقتلك عادييي
- مهدي : ههههههههههههه ايييه نشوفو
بعد ما خلصو ماكلة راحو لصالون و قاعدين يتفرجو ... مهدي هز تيليفون .. كانت متكية على حجرو هزت راسها تشوف معاه
- ليليان : وش كاين مع تيليفون
- مهدي : عادي خدمة برك
- ليليان : اممم اوكي
- مهدي : وي عادل
- عادل : منيش مصدق كفاش تفكرتني ... متقوليش توحشتني برك
- مهدي : يا خانز انا نعيط دايما
- عادل : وي دايما على خاطر الخدمة
- مهدي : هههههههه خلاص المرة الجاية نعيط نسقسي عليك و نحكي معاك مليحة ؟
- عادل : هههه صدقتك ... خير وش تحتاج
- مهدي : احم ... عادل منقدرش نكمل الخدمة مع كامي
ليليان تنفضت من بلاصتها ربعة رجليها و قعدت تشوف معاه ... مهدي يشوف معاها و كمل يحكي
- مهدي : كاين 2 احتمالات ... يا اما تكون معايا و نشريو الاسهم تاعها و نفسخو شراكتها ... ولا تروح نتا معاها و تمدولي حقي و ننسحب من الشركة ...
- عادل : وش صرا ؟ .. راك تخير فيا بينكم ... احكيلي وش صرا مبعد القرار ساهل تعرف اللي انا مستحيل نخليك عرفتك قبلها و رانا كيف الخاوة