عشق ليليان 💥💕

151

حكمت الصحن و قعدت فوق الطابلة و بدات تاكل ... مرة على مرة تهبط دمعة تمسحها و تكمل تاكل ... عادل كان مقابلها حتى هو ياكل بالسيف ... نفسو مسدودة اما لازمو ياكل بش يرضيها و تبعو
بعدما خلصو ناضو خارجين ...
- ليليان : راح تصعب علينا بلا طوموبيل ... لازمنا وحدة
- عادل : ايه فكرت فيها و حوست على وكالة نكري طوموبيل ... كاينة وحدة قريبة منا درك نروحو ليها هداك هو يكونو فتحو نرفدو طوموبيل و نروحو لسبيطار
- ليليان : سبيطار !!
- عادل : ايه ليليان لازم نروحو بلاك كشما كاين و راهو فسبيطار ... بلاك دخل ليه البارح ... راح ندورو على كامل كلينيكات لي كاينين
تبعتو ليليان .. اكتفات بالصمت ... بعدما رفدو طوموبيل راحو الكلينيكات لي فالولاية كامل ... منين يدخلو يتاملو انو يلقاوه اما مع الاسف ملقاوه فحتى واحد ... ليليان مفهمتش تفرح انو ملقاوهش فسبيطار يعني مصرالو والو ... ولا تحزن لانو ما لقاتوش ... كانت ساكتة و تبع فالطريق حتى تفكرت و شافت مع عادل
- ليليان : حقا عادل ... تلهيت ما سقسيتكش
- عادل : وي سقسي ...
- ليليان : علاش جيت ؟ .. يعني مكش عارف بلي كنا اليوم رايحين لماريكان
- عادل : صااار كنتو اليوم تروحو !!! ... كان جيت عارف راني ما جيتش ...
- ليليان : لالا على حساب الحالة راك جيت احسن ... راك في وقتك .. مقتليش السبب لي جابك
- عادل : ااا .. كاميليا
- ليليان : كاميليا ؟؟ ... وشبيها .. وش دخلها !
- عادل : للصراحة انا حكيت معاها و كانت هدرتها ما تبشرش بالخير و خفت كشما ديرلك نتي ... ما حبيتش نقول لمهدي لانو مشاكل فوق راسو ... جيت بش نعسها و نوقفها عند حدها ... حبيت نوقف مع مهدي هادي هياا
- ليليان : علابالك ... من اول نهار شفتها فيه محبيتهاش ... الشر خارج من عينيها .... راني حايرة كفاش نتا و مهدي بالطيبة لي عندكم ... صاحبتوها
- تنهد : اييه حتا انا حاير ... ليليان نروحو للمطار نشوفو الطيارة وقتاش و لكان مهدي الغى التذاكر تعكم ولا لالا
- ليليان : ايييه ... و تاني نقدرو نعرفو لكان صرف من كارت بونكار تاعو !؟؟ نعرفو منين و وقتاش راح نقربولو بزاف
- عادل : مراحتش من بالي هادي مي حنا ما نقدروش ... هادي خدمة لابوليس ... حتا تكمل 24 ساعة بش يبداو يحوسو عليه و يحققو ...