عشق ليليان 💥💕

121

- ليليان : راك تظحك
- مهدي : نون نبكي ... وش ليليان حابتني نلبس المبهدل ؟ ... مهدي بن جابر راهو قدامك
- ليليان : وي نعرف اسمك ... بصح نتا تاعي وحدي غير انا نشوف الزين و الحطة ... ديجا ارجع ارجع منيش رايحة
طبقت يديها و عدلت قعدتها و قلبة شفايفها كيما الصغار اللي يشنفو
- بنبرة حنينة دوبها : روحي غارت ولا كفاش ؟ ... يااا حبيبي مكانش لي تتجرأ تشوف ... نتي معاي و في جنبي شكون راح تقدم ااه ؟
- ليليان : متمسخرش بيا يشوفو معاك ياكلوك بعينيهم
- قدم جيهتها باسها على رقبتها : مغيارتي وصلنا هيا انزلي و مبعد نحيلك تشنيفة هادي
نزلت وراه بلاما تهدر ... هو يكشي و هي تبع فيه و تمتم بين شفايفها راح تطرطق ... تعرف البنات لي فنادي مش راح يفوتوه و راح يتقبوه بعينيهم ... دار ليها و حبس
- مهدي : هيا ليليان خفي رجلك
- ليليان : روح غمشي و متهدرش معايا
- ظحك و كمل مشا عارفها مش راح تصبر و تلحقو تمشي بجنبو : هههه اوكي
وصلو للباب قبل ما يفتحو زربة خطواتها وقفت جنبو و حكمتو من يدو ... شاف معاها و تبسم ... طلعت رجليها وصلت قريب لودنو و همستو
- ليليان : مزلت مشنفة ... هادي بش ما يدوروش بيك برك
- نزل لمستوى ودنها و يهمس : مبعد نفهمك (بعد عليها و غمزها )
فتحت الباب دخلو كيفكيف مكنوش منتابهيلهم ... حوست على امين و طبعا يد مهدي فيدها ... كل ما تفوت على واحد ولا وحدة يهدرو معاها ولا يسلمو عليها ... كامل لتما يعرفوها و متوحشينها ... شافت مروة راحت ليها من وراها و غمضتلها عينيها
- مروة : يااااا ليلييي
- بعدت يديها : كييي لعادة عرفتينيي
- تحضن فيها و تحكي : كفاش منعرفش يااا حبيبيتي ... وينك هدا نسيتيزا كامل وليتي متبانيش
- ليليان : جامي ننساكم وشيا اكي تعرفي اوضاع شوي مخلطة
- مروة : معليش عادراتك ( شافت مع مهدي و مدة يدها تسلم عليه ) مرحبا بيك مسيو للمرة التانية
- شاف مع ليليان لقاها تتبسملو يعني مسموووح يصافح مروة ( عندو حق يستنى الإذن خير ما ترصيلو فمعركة ) : بيك يعيشك ... اا وين راه امين