هزيت راسي باستني هيه وايات وطلعن اتمددت واجتي خالتي بصفي سحبتني لحضنها بچيت لحد ما تعبت وغفيت.
حسيت ثگل على جسمي تحركت وفتحت عيوني لگيته حاضني ومخلي راسه برگبتي بسرعة دفعته وعدلت گعدتي وصحت بي.
ضي:: لتتقرب عليه انته شجابك هنا گوم اطلع بره وخالتي منار وينها.
لزم مابين حواجبه وغمض عيونه وحچه بصوت تعبان وبي بحه.
سدير:: راحت الفاتحة هيه وشيماء وايات جوه تسويلچ ريوگ لصيحين هوه انتي صوتچ رايح اهدي وعلى كيفچ.
ضي:: اطلع بره ماريد اشوفك.
دار وجه وكمل نومته ولا عبالك احچي گمت اخذت ملابسي ودخلت الحمام بدلت وطلعت نزلت جوه ل ايات.
ضي:: صباح الخير ايو.
اجتي حضنتني وتبوس بيه.
ايات:: صباح الخير والعافية حبيبتي شلونچ اليوم.!؟
هزيت راسي وگعدت مختنگه صبتلي چاي وجبن وبيض اكلت شويه وصعدت لغرفة ابوي فتحت الكنتور وطلعت ملابسه حضنتهن.
ونمت على چربايته اصرخ كل قوتي بس صوتي رايح واحيل مابيه بقيت وحدي مو المفروض هسه اني بفاتحة ابوي حالي حال خلود ونبراس.
دخل سدير وسد الباب وگعد گدامي بالگاع وعيونه عليه بس لزم ايدي صرت اصرخ بزايد لحد ماتعبت وهديت يمسح بدموعي.
شلت عيني عليه لگيته يبچي هاي اول مره اشوفه يبچي حچيت وصوتي گوه يطلع.
ضي::اذا تبچي عليه ليش ماصدگته.!؟
نزل راسه وماحچه ندست ايده وحچيت.
ضي:: رد لتغلس لييش ماصدگته من گال مو اني ليش خليته يموت بالسجن.
رفع راسه و وخر شعري عن وجهي وگال.
سدير:: ابچي عليچ وندمان لأن ماصدگته ادري ميفيد الندم بس مو ذنبي موته اني مالي ايد بالموضوع وبارق جاي يحقق وبس اعرف منو الي گتله اله اخذ روحه.
ضي:: گوم اطلع بره.
مسح وجهه وطلع جگارة وخلاها بحلگه ورجع راسه على الچربايه وصافن بالسگف اضوج منه من يجاهلني.
ضي:: اكرهك لأن تجاهلني اتمنى اضربك حقير نذل.
ضحك بصوت وگال.
سدير:: دخيل ربچ شگد غلطتي عليه شني سالفتچ ماكلتني حاصل فاصل بالسانچ وبعدين ماريد اطلع واعوف مرتي وحدها.
ضي:: تمرمرت روحك لتسميني مرتي.
سدير:: يلا زوجتي.
ضي:: ولا زوجتك
