နတ်ဘုရားမအဖြစ် ပြန်လည်ပေါ်ထွက်လာခြင်း[ဘာသာပြန်] ✔️✔️✔️

Chapter [101]

[Unicode]

အခန်း (၁၀၁)

နဉ်ရှီက အုတ်ဂူထက်ရှိ ကမ္ဗည်းကျောက်စာတိုင်ကို သုံးကြိမ်သုံးခါ ဂါရဝပြုပြီး မတ်တပ်ထကာ ချန်းရှီကွေ့ကို ပြောလိုက်သည်။ “ပြန်ကြစို့”

ချန်းရှီကွေ့က နှုတ်ဆိတ်နေလျက် ခေါင်းညိတ်လိုက်ပြီး အုတ်ဂူအရှေ့ သုံးကြိမ်တိုင်တိုင် အလေးအနက်ဂါရဝပြုကာ နဉ်ရှီ၏လက်ကိုကိုင်လိုက်သည်။ “နောက်ဆို အဖေနဲ့အမေကို ဂါရဝသွားပြုရင် ကိုယ် အဖော်လိုက်ခဲ့မယ်”

သူတို့ကို အဖေနဲ့အမေလို့တောင် ခေါ်နေနှင့်ပြီပေါ့? နဉ်ရှီက သူ့ကို မျက်စောင်းထိုးလိုက်သော်လည်း နှုတ်ခမ်းတို့ကတော့ အပြုံးတစ်ပွင့်အဖြစ်သို့ ကွေးတက်နေလေ၏။ “ဟုတ်ပါပြီရှင်”

စုံတွဲနှစ်ယောက်သား လှေကားထစ်ပေါ်မှဆင်းလာပြီး တောင်ခြေရောက်ရုံတင်ရှိသေး နဉ်ရှီ၏ဖုန်းကမြည်လာသည်။ ခေါ်ဆိုသူက တုန်းနန်ရဲစခန်းမှ ခေါင်းဆောင်လီပင်။ သူမမိဘ၏အုတ်ဂူတွေဘက်ကြည့်ရင်း ဖုန်းကိုင်လိုက်သည်။

“ခေါင်းဆောင်လီ”

ချန်းရှီကွေ့က ကားရှိရာဆီလျှောက်သွားပြီး နဉ်ရှီကို တံခါးကူဖွင့်ပေးလိုက်သည်။ နဉ်ရှီက ကိုယ်ကိုကိုင်းပြီး ကားပေါ်တက်သွားစဉ် တစ်ဖက်လူက ဘာပြောလိုက်သည်မသိ၊ သူမ မျက်မှောင်ကြုတ်သွား၏။

“‌ဟုတ်ပြီလေ” ဖုန်းပြောပြီးနောကိ နဉ်ရှီ၏မျက်နှာထက်မှ အပြုံးတို့က မှိန်ဖျော့သွားသည်။ သူမက ချန်းရှီကွေ့ဘက်လှည့်ပြောလိုက်သည်။ “ရှီကွေ့၊ ကျွန်မ ရဲစခန်းသွားရမယ်”

“ကိုယ်လည်းလိုက်ခဲ့မယ်” ချန်းရှီကွေ့က ကားတံခါးပိတ်လိုက်သည်။ သူ့လေသံက ညင်သာနေသော်လည်း ခိုင်မာသော ဆုံးဖြတ်ချက်က အထင်းသားပင်။

တုန်းနန်ရဲစခန်းရှိ အရာရှိများခမျာ သူတို့ဖမ်းမိထားသည့် သံသယရှိတရားခံအသစ်က တော်တော်လေးကို ပူးပေါင်းမှုမရှိသဖြင့် အကျဉ်းအကျပ်ကျနေရ၏။ ထိုသူက ခေါင်းမာရုံသာမက ရဲကိုပင် သွားဆွလိုက်သေးသည်။ မသိလျှင် ဟိုက သူ့ကိုလာပိတ်တီးမည်ကို မစောင့်နိုင်တော့သည့်အလား။