လူအများရှေ့တွင် အနိုင်ကျင့်ခြင်း
"မင်း ကိုယ့်ကိုကြောက်နေတာလား"
မျက်နှာချင်းဆိုင်တွင်ထိုင်နေသည့်ယောက်ျားက ခက်ရင်းနှင့်ဓါးကိုချလိုက်ပြီး သူ၏နှုတ်ခမ်းတစ်လျှောက်ကို လက်ကိုင်ပုဝါနှင့်ခပ်ဖွဖွသုပ်ရင်း ဝေ့ရှီအားမေးလာ၏။
ဝေ့ရှီက ချိတုံချတုံဖြင့်သူ့အားမော့ကြည့်လိုက်၍ မည်သို့ပြန်ဖြေပေးရမှန်းမသိသေးကာ နှုတ်ဆိတ်နေလိုက်၏။အမှန်အတိုင်းဆိုရလျှင် သူမအရှေ့ရှိ သူ့အား တကယ်ကိုကြောက်ပါ၏။
ရွမ်ရှောက်နန်က ခပ်ရေးရေးပြုံးလိုက်ပြီး လက်နှစ်ဖက်ကိုအလျင်းသင့်သလိုထပ်ထားလိုက်ကာ
"ကိုယ် အဖြေကိုသိလောက်ပြီလို့ထင်တာပဲ...ပွင့်ပွင့်လင်းလင်းပြောရရင် ဝေ့ချိန်ပေါက်က ဘယ်လိုနည်းလမ်းမျိုးကိုသုံးလိုက်မှန်း ကိုယ်မသိဘူး..ဒါပေမယ့် ကိုယ်လိုချင်တဲ့အခြေအနေမျိုးထိရလိုက်တာမလို့ကျေနပ်တယ်...ကိုယ် မင်းရဲ့ပုံစံကို အတော်လေးသဘောကျနေတာမလို့ အချိန်ဆွဲမနေချင်တော့တာ..တကယ်လို့များ မင်းအပေါ် တစ်ခုခုအဆင်မပြေသလိုဖြစ်အောင်လုပ်မိသွားတာမျိုးရှိခဲ့ရင် ကိုယ်ကပဲတောင်းပန်ပါတယ်.."
ဝေ့ရှီတွင်လည်း ပြောစရာစကားမရှိသလို သူကလည်း နားထောင်ပေးဖို့ရန်အစီအစဥ်မရှိ။တန်းတူညီမျှသောစကားဝိုင်းတစ်ခုမဟုတ် အာဏာရှိသောသူတစ်ယောက်၏စကားကို နားထောင်ပေးရုံသက်သက်ဖြစ်သည်။
စီးကရက်တစ်လိပ်ကိုထုတ်လိုက်ပြီး သူမအား လူကြီးလူကောင်းဆန်ဆန်မေးလာ၏။
"သောက်လို့ရမလား?.."
ဝေ့ရှီက ခေါင်းငြိမ့်ပြလိုက်၏။မီးခြစ်ကိုထုတ်ပြီး စီးကရက်အား အသာအယာမီးညှိလိုက်၏။Givenchy မီးခြစ်မှ မီးတောက်များက လိမ္မော်ရောင်ပွင့်ဖတ်လေးများအတိုင်း တောက်ပလာကာ ဤပုံစံ ဤမြင်ကွင်းက မှောက်သွန်ခုံပစ်ဖြစ်သွားခဲ့သည့်ထိုည၏မြင်ကွင်းနှင့် တစ်ထေရာတည်း။
<<<<<<<
ထိုနေ့ညတွင် သူက အခန်း၏ထောင့်ဆုံးကျသည့်နေရာတွင် ထိုင်နေခဲ့ပြီး စီးကရက်ကိုမီးညှိနေခဲ့သည်။လိမ္မော်ရောင်ပွင့်ဖတ်နှင့်တူသည့်မီးတောက်များ တောက်ပလာသည်က အမှောင်ထုတစ်ခုလုံးကိုမီးထွန်းညှိပေးလိုက်သည့်အတိုင်း သူမ၏ပင်လယ်သမုဒ္ဒရာလိုနက်ရှိုင်းနေသည့်မျက်ဝန်းအတွင်း ထင်ဟပ်လာခဲ့သည်။အမှောင်ထဲတွင် စကားမပြောဘဲတစ်ချိန်လုံး ထိုင်နေခဲ့သည်ဖြစ်ကာ သူ့အား မှတ်မိနိုင်ရန် ဝေ့ရှီအတွက် အခွင့်မသာခဲ့ပေ။မှိန်ပျပျမီးရောင်အောက်တွင် ထိုလူကိုသဲသဲကွဲကွဲမမြင်ရဘဲ သူ၏အသံကိုသာ ကြားလိုက်ရခြင်းဖြစ်၏။
YOU ARE READING
Alluring [ ဘာသာပြန် ]
Romance绝色倾城 ဆိုတဲ့စကားလုံးက အရိုးရှင်းဆုံးဆိုရလျှင် 'မိန်းမောသွားလောက်တဲ့ထိစွဲလမ်းခြင်း' လို့အဓိပ္ပါယ်ရပါတယ်။လူတစ်ယောက်ကိုပဲဖြစ်ဖြစ် အရာဝတ္ထုတစ်ခုကိုပဲဖြစ်ဖြစ် မသိစိတ်ကနေရော အသိစိတ်ကပါ ရူးသွပ်သွားတဲ့အထိစွဲလမ်းခြင်းမျိုးပါ။