သည်းခံနိုင်စွမ်းထက်ကျော်လွန်းပြီး ထပ်၍သည်းမခံနိုင်ခြင်း
ပင်လယ်ကမ်းစပ်မြို့ဖြစ်သဖြင့် နှင်းပွင့်များက လမ်းမထက်တွင်ကြာကြာရှိမနေနိုင်ပါ။အရည်ပျော်လုနီးနီးဖြစ်သည့် နှင်းစက်ရည်များက ကားဘီးရာများဖြစ်သွားခဲ့ရ၏။
Alluring ၏မီးလင်းဆိုင်းဘုတ်ထက်တွင် အနည်းငယ်တင်ကျန်ရစ်နေခဲ့သည့် နှင်းစက်ရည်များရှိနေသေးသဖြင့် ဝေ့ရှီက ခပ်သေးသေးတံမြက်စည်းတစ်ချောင်းကိုယူပြီး သန့်ရှင်းနေလေ၏။
ညဘက်တွင်တိုက်လာသည့်လေညှင်းက ချမ်းစိမ့်စိမ့်ဖြစ်ကာ ဝေ့ရှီက ယူနီဖောင်းကော်လံကိုဆွဲတင်ပြီး နီရဲအေးစက်နေသည့်လက်ချောင်းများကို အနည်းငယ်နွေးထွေးလာစေလိုငြား ပါးစပ်နားကပ်၍ အာငွေ့ပေးလိုက်၏။
သတ်မှတ်ထားသည့် အလုပ်စခါနီးအချိန်လည်း ရောက်ပြီဖြစ်သဖြင့် ဤနေရာတွင် အလုပ်လုပ်ကြသည့်ကောင်မလေးက ရှေ့ဆင့်နောက်ဆင့်အသီးသီးရောက်လာကြ၏။အရောင်အသွေးစုံလှသည့်ရေသူမလေးများ ဖြတ်သွားတိုင်း မတူညီသည့်မွှေးရနံ့များနှင့် ကွဲပြားသည့်ပြင်ဆင်ပုံအလှများကို ခံစားကြည့်လိုက်ရ၏။
လူတော်တော်များများပြောကြသည့်စကားတစ်ခွန်းက Alluring တွင်အလုပ်လုပ်သည့်ကောင်မလေးတော်တော်များများက Mercedes-Benz , BMW တို့ဖြင့် အလုပ်လာသည့်အကြောင်းဖြစ်သည်။စစချင်းကြားဖူးသည့်အခါက ဝေ့ရှီအနေဖြင့် မြှောက်စားပြောဆိုနေသည်ဟုသာ ထင်ခဲ့ဖူးသည်။ဤနေရာတွင် အလုပ်လုပ်ချိန်ကြာမြင့်လာပြီးနောက်မှ အပြင်ဘက်တွင်ပြောနေကြသည့်အတင်းအဖျင်းများက မှန်ကန်နေကြောင်းကို ယုံကြည်သွားခဲ့၏။အချို့က နာမည်ကြီးကားများပေါ်မှ ဆင်းလာကြပြီး အချို့က ကိုယ်တိုင်မောင်းလာကြသည်အထိ။
ဒီနေရာရှိကောင်မလေး၏ ဝင်ငွေက ပမာဏများလွန်းသည့်အထဲတွင်လည်းပါသလို သုံးဖြုန်းသည့်နေရာတွင်လည်း အတူတူဖြစ်၏။တော်တော်များများက နာမည်ကြီးတံဆိပ်များသုံးစွဲရသည်ကို အရူးအမူးစွဲလမ်းကြသည်ဟုဆိုရမည်။Cartier နာရီ၊ LV အိတ်၊ Chanel ရေမွှေး၊ Lancome တံဆိပ်မိတ်ကပ် စသည့်စသည့်တို့ဖြင့် အပြိုင်အဆိုင်။ခေါင်းအစခြေအဆုံးဝတ်ထားသည့်ဝတ်စုံများကလည်း နာမည်ကြီးတံဆိပ်များသာဖြစ်ရာ မည်သို့နည်းလမ်းနှင့်များ ကားဝယ်ရန်အတွက် အပိုငွေကျန်နေပါသေးသနည်း။
YOU ARE READING
Alluring [ ဘာသာပြန် ]
Romance绝色倾城 ဆိုတဲ့စကားလုံးက အရိုးရှင်းဆုံးဆိုရလျှင် 'မိန်းမောသွားလောက်တဲ့ထိစွဲလမ်းခြင်း' လို့အဓိပ္ပါယ်ရပါတယ်။လူတစ်ယောက်ကိုပဲဖြစ်ဖြစ် အရာဝတ္ထုတစ်ခုကိုပဲဖြစ်ဖြစ် မသိစိတ်ကနေရော အသိစိတ်ကပါ ရူးသွပ်သွားတဲ့အထိစွဲလမ်းခြင်းမျိုးပါ။