အထိအတွေ့ဆန္ဒ
ချဥ်ပြီးစပ်လွန်းနေသည့် ထိုင်းအစားအစာက ခံတွင်းမတွေ့ခြင်းလည်းဖြစ်နိုင်သလို ဆိုင်ထဲတွင်ဖွင့်ထားသည့် ထိုင်းသီချင်းသံနှင့်အကဖျော်ဖြေမှုတို့နှင့် အသားတကျမဖြစ်ခြင်းလည်း ဖြစ်နိုင်ကာ ဒါမှမဟုတ် ယနေ့၏စိတ်အခြေအနေက အမှန်တကယ်ကိုမကြည်လင်ခြင်းလည်းဖြစ်နိုင်၍ အမြဲတမ်း လက်ဖျားခါရလောက်အောင်စားကောင်းသောက်ကောင်းနေသည့် လင်းလော့ချွမ်က ယခုအချိန်တွင် သုံးလေးလုတ်မျှသာစားပြီး တူ ကို ချထားလေသည်။အကဖျော်ဖြေပေးနေရာ စင်ဘက်သို့ မမှိန်မတွေစိုက်ကြည့်နေပြီး မျက်ဝန်းထဲတွင်လည်း စိုးရိမ်ပူပန်ကြောင့်ကြနေသည့်အရိပ်များကို မြင်နေရ၏။
ဝေ့ရှီက ထိုင်းအစာအစာ၏အရသာများကို တကယ်ခံတွင်းမတွေ့လှသည့်အပြင် လင်းလော့ချွမ်၏မသက်မသာဖြစ်နေသည့်ပုံစံကိုပါမြင်ပြီး ကိုယ်တိုင်လည်း အလိုလိုစိတ်ရှုပ်ထွေးလာရ၏။မျက်နှာချင်းဆိုင်တွင်ရှိနေသည့် ထိုလူကို တစ်ခဏမျှငြိမ်သက်၍ကြည့်နေပြီးမှ မနေနိုင်တော့သည့်အဆုံး သူ၏မျက်ဝန်းများရှေ့တွင် လက်ဝှေ့ရမ်းပြကာ လက်ဟန်ဖြင့်မေးလိုက်၏။
"ဘာဖြစ်နေတာလဲ"
လင်းလော့ချွမ်က ပြန်လှည့်လာခဲ့ပြီး လှပကြည်လင်သည့်မျက်ဝန်းတစ်စုံက နှလုံးသားထဲမှကို အလေးအနက်စိုးရိမ်နေသည့်အလား စိုက်ကြည့်လာခဲ့သည်။ယခုအချိန်တွင် ဝေ့ရှီခံစားမိလိုက်သည့်တစ်ခုတည်းသောအရာက ဤလူတွင် စကားပြောတတ်သည့်မျက်ဝန်းတစ်စုံရှိနေကြောင်းပင် ဖြစ်၏။ဤအခိုက်အတန့်တွင် ဘာဆိုဘာမှဖွင့်ဟပြောဆိုခြင်းမရှိပါသည့်တိုင် ထိုမျက်ဝန်းတစ်စုံထဲတွင် မျှော်လင့်ခြင်းများထပ်ခါထပ်ခါ ထင်ဟပ်နေပြီး သူမကိုလည်း စကားများ ထပ်ခါထပ်ခါ ပြောဆိုနေခဲ့သည်။ထိုမျက်ဝန်းများက သန့်ရှင်းပြီးကြည်လင်နေခဲ့ကာ သူမလိုအရာအားလုံးကြောက်တတ်နေသည့်ငှက်တစ်ကောင်နှင့်တူသည့်သူတစ်ယောက်ကိုပင် ထိခိုက်နစ်နာစေလိုခြင်းအလျင်းမရှိသည့်ခံစားချက်မျိုးကို ခံစားမိစေနိုင်ခဲ့၏။
YOU ARE READING
Alluring [ ဘာသာပြန် ]
Romance绝色倾城 ဆိုတဲ့စကားလုံးက အရိုးရှင်းဆုံးဆိုရလျှင် 'မိန်းမောသွားလောက်တဲ့ထိစွဲလမ်းခြင်း' လို့အဓိပ္ပါယ်ရပါတယ်။လူတစ်ယောက်ကိုပဲဖြစ်ဖြစ် အရာဝတ္ထုတစ်ခုကိုပဲဖြစ်ဖြစ် မသိစိတ်ကနေရော အသိစိတ်ကပါ ရူးသွပ်သွားတဲ့အထိစွဲလမ်းခြင်းမျိုးပါ။